Read Tedim Chin PIANCILNA 26 Bible Online

PIANCILNA 26 - Tedim Chin bible

PIANCILNA 26

¹Abraham’ hun lai-a kialpi banah, tu-in tua gam sungah kialpi dang khat tung hi. Filistia mite’ kumpipa Abimelek’ omna Gerar-ah Isaac pai hi.

²Ama tungah TOPA kilang a, “Egypt-ah paisuk kei inla, kong gen ding leitangah teng in.

³Hih leitangah tawlkhat om in. Nang tawh kong omkhawm ding a, thupha kong pia ding hi. Bang hang hiam cih leh nang le na suanlekhakte tungah hih leitangte kong pia ding a, na pa Abraham’ tungah ka thuciam ka tungsak ding hi.

⁴Na suanlekhakte vana aksi bangin tampi ka phasak ding a, na suanlekhakte tungah hih leitang khempeuh ka pia ding hi. Na suanlekhakte thupha ka piak bangin leitung minam khempeuh in thupha a ngah nadingun hong ngen ding uh hi.

⁵Bang hang hiam cih leh Abraham in ka thu mangin, ka sawlna, ka thupiakna, ka ngeina kip le ka thu zui hi,” a ci hi.

⁶Tua ahih ciangin Isaac, Gerar-ah teng hi.

⁷Tua mun mite in ama zi tawh kisai thu a dot uh ciangin amah in, “Ka sanggamnu hi,” a ci hi. Bang hang hiam cih leh, “Rebekah’ hangin tua gam mite in hong that kha ding ahih ciangin,” ci-in ngaihsun ahih manin, “Ka zi hi,” a cih ding lau hi. Bang hang hiam cih leh amah ngaihbaang hi.

⁸Tua lai-ah amah sauveipi a om khit ciangin, Filistia mite’ kumpipa Abimelek a tawlet panin khuadak a, Isaac in a zi Rebekah a noh laitak mu kha hi.

⁹Tua ahih manin Abimelek in Isaac samin, “En in, amah na zi ahi hi. Tua ahih ciangin bangci-in nang in, ‘Amah ka sanggamnu hi,’ ci thei na hi hiam?” a ci hi. Isaac in ama kiangah, ”‘Ama hangin si kha ding ka hih ciangin,’ ci-in ngaihsun ka hihna hang hi,” a ci hi.

¹⁰Abimelek in, “Ko tungah bangci-a hih bangin hong gamta na hi hiam? Mite khat peuhpeuh na zi tawh lumkhawm pak kha thei ding a, kote’ tungah mawhna hong tun na hi ding hi,” a ci hi.

¹¹Tua ahih ciangin Abimelek in mi khempeuh thu zasak a, “Hih mipa ahi zongin a zi ahi zongin a sukha peuhmah kithat ding hi,” a ci hi.

¹²Isaac in tua leitangah khai tuh a, tua kum mahin a zah zakhat la hi. TOPA in amah thupha pia a,

¹³a neihsa kibehlaplap ahih manin a hau mahmah khat a suak hi.

¹⁴Amah in tuuhon le bawnghon, le innkuan mi tampi nei a, Filistia mite in amah eng uh hi.

¹⁵(Ama pa Abraham’ hun lai-a a pa’ nasemte in a tawh tuikhuk khempeuh tu-in Filistia mite in hucipin lei vuk uh hi.)

¹⁶Abimelek in Isaac kiangah, “Kote’ kiang panin paikhia in. Bang hang hiam cih leh kote sangin nang na vanglian zaw hi,” a ci hi.

¹⁷Tua ahih ciangin tua mun panin Isaac paikhia a, Gerar kuam sungah phual satin tua munah a teng hi.

¹⁸Isaac in a pa Abraham’ hun lai-a a kitosa tuikhukte to pha kik hi. Bang hang hiam cih leh Abraham’ sih khit ciangin Filistia mite in tuate vukcip uh hi. Amah in a pa’ phuahsa minte mah phuak kik hi.

¹⁹Ahih hangin Isaac’ nasemte in tua kuam sung to-in tuikhuk a muh uh ciangin,

²⁰Gerar gancingte le Isaac’ gancingte kitawng uh a, “Tui, ko a’ hi,” ci uh hi. Tua ahih ciangin amah in tua tuikhuk Esek ci-in min a phuak hi. Bang hang hiam cih leh amaute le amah kitawng uh hi.

²¹Tua ciangin amaute in tuikhuk dang khat to uh a, tua tungtangah zong amaute kitawng leuleu uh hi. Tua ahih ciangin amah in tua pen Sitnah ci-in min a phuak hi.

²²Tua mun panin amah kinin tuikhuk dang khat to leuleu hi. Tua tungtangah amaute kitawng nawn lo uh hi. Tua ahih ciangin amah in Rehoboth ci-in min a phuak hi. “Bang hang hiam cih leh tu-in TOPA in eite a dingin omna hong bawlsak khin a, eite hih gamah i pung ding hi,” a ci hi.

²³Tua lai mun panin amah Beersheba-ah paito hi.

²⁴Tua zan mahin ama tungah TOPA kilang a, “Kei pen na pa Abraham’ Pasian ka hi hi. Lau kei in; bang hang hiam cih leh ka nasempa Abraham’ huhau-in nang tawh kong om a, nang le na suanlekhakte thupha hong pia-in kong pungsak ding hi,” a ci hi.

²⁵Tua ahih ciangin amah in tua lai munah biakna tau khat lamin TOPA bia a, tua munah puanbuk a lam hi. Tua lai-ah Isaac’ nasemte in tuikhuk khat a to uh hi.

²⁶Tua ciangin Gerar panin Abimelek a thu lamlak pa Ahuzzath le a galkap mangpa Fikol tawh Isaac kiangah hong pai hi.

²⁷Isaac in amaute’ kiangah, “Note in kei hong mudahin note’ kiang panin hong hawlkhia na hih uh ciangin bang hangin kei’ kiangah hong hawh na hi uh hiam?” a ci hi.

²⁸Amaute in, “Nang tawh TOPA a omna teltakin ka mu uh hi. Tua ahih ciangin, kote in nang hong sukha loin, nang’ tungah bangmah hong hih loin, a hoihin gamta-in lungnuam takin kong sawl khiat mah bangun kote’ tungah nang in siatna nong bawl loh nadingin nang le kote’ kikalah kiciamna khat om hen la, nang tawh thuciamna khat bawl ni, a ci hi ung. Nang pen tu-in TOPA’ thupha piak na hi hi,” a ci uh hi.

³⁰Tua ahih ciangin amah in amaute a dingin pawi khat bawl a, amaute in pawi an ne-in a dawn uh hi.

³¹Zingsangin amaute tho baih uh a, khatlekhat kiciamna a bawl uh hi. Isaac in amaute a lampi ding uhah kha a, ama kiang panin amaute lungnuam takin a paikhia uh hi.

³²Tua ni mahin Isaac’ nasemte hong pai-in amau’ tawhsa tuikhuk thu ama kiangah hong gen uh a, “Tui ka muzo uh hi,” hong ci uh hi.

³³Amah in tua pen Shibah ci-in min phuak hi. Tua ahih ciangin tua khuapi min pen tuni dongin Beersheba kici hi.

³⁴Esau kum sawmli a phak ciangin, Hit mi Beeri’ tanu Judith le Hit mi Elon’ tanu Basemath zi-in la hi.

³⁵A zi tegel in Isaac le Rebekah’ nuntakna haksasak uh hi.