Read Tedim Chin PIANCILNA 27 Bible Online

PIANCILNA 27 - Tedim Chin bible

PIANCILNA 27

¹Isaac teekin a mitte maangin khua a muh theih nawn loh ciangin a ta upa zaw Esau samin ama kiangah, “Ka tapa aw,” a ci hi. Amah in dawngin, “Hiah om ing,” a ci hi.

²Amah in, “En in, kei ka teek hi. Ka sih ding hun ka thei kei hi.

³Tua ahih ciangin tu-in, na hiamte ahi na thallawng le na thal la inla, gamlakah pai-in kei a dingin sa va beng in.

⁴Ka sih ma-in nang thupha kong piak theih nadingin kei’ duh bangin an lim hong bawl inla, ka nek dingin hong paipih in,” a ci hi.

⁵Isaac in a tapa Esau a hopih laitakin Rebekah in na ngaisim hi. Sa bengin a ciahpih dingin Esau gamlakah a kuan ciangin,

⁶Rebekah in a tapa Jakob kiangah, “Na sanggampa Esau’ tungah na pa’ thugen ka za a,

⁷‘Ka sih ma-in TOPA’ mai-ah nang thupha kong piak theih nadingin ka nek dingin na sa matsa hong paipih inla, kei a dingin an lim hong bawl in,’ ci hi.

⁸Tua ahih ciangin tu-in ka ta aw, kong thupiak bangin gamta in.

⁹Ama duh bangin na pa a dingin an lim ka bawl theih nadingin keelhon lakah va pai inla keelno a hoih nih hong paipih in.

¹⁰Na pa in a sih ma-in nang thupha hong piak theih nadingin a nek dingin na pa kiangah na va paipih ding hi,” a ci hi.

¹¹Ahih hangin Jakob in a nu Rebekah kiangah, “En in, ka sanggampa Esau pen mulnei mi hi a, kei pen cineel mi ka hi hi.

¹²Ka pa in kei hong lawngkha leh, amah in ka khemna hong thei ding a, kei’ tungah thupha hi loin samsiatna hong tung zawsop ding hi,” a ci hi.

¹³A nu in ama kiangah, “Nangma thuak ding samsiatna kei tungah hong tung ta hen, ka ta aw; ka thu hong mang peuh inla, pai-in keelnote kei’ kiangah hong puak in,” a ci hi.

¹⁴Tua ahih ciangin amah pai-in keelnote va la-in a nu kiangah paipih a, a pa’ duh bangin a nu in an lim a bawl hi.

¹⁵Tua ciangin Rebekah in inn-a a kep, ama ta upa zaw Esau’ puan hoihpente la-in a ta nauzaw Jakob a silhsak hi.

¹⁶Amah in keelnote’ vun ama khut tung le a neelna mun a ngawng sanah silhsak a,

¹⁷a bawlsa meh lim le an a tapa Jakob a pia hi.

¹⁸Tua ahih ciangin a pa’ kiangah amah pai a, “Ka pa aw,” a ci hi. Amah in, “Hiah om ing, ka ta aw; kua na hi hiam?” a ci hi.

¹⁹Jakob in a pa kiangah, “Na ta upa zaw Esau ka hi hi. Nong gen bangin ka hih khin hi. Kei thupha nong piak theih nadingin tu-in tuto inla, ka sa matsa ne in,” a ci hi.

²⁰Ahih hangin Isaac in a tapa’ kiangah, “Ka ta aw, bangci-a hong hici manlan pak na hi hiam?” a ci hi. Amah in dawngin, “TOPA nangma Pasian in kei hong tuahphasak hi,” a ci hi. Tua ciangin Isaac in Jakob kiangah,

²¹“Ka ta aw, ka ta Esau taktak na hi hiam, na hi kei hiam kong lawn theih nadingin ka nai-ah hong pai in,” a ci hi.

²²Tua ciangin a pa Isaac’ kiangah Jakob pai a, amah lawngin, “A aw, Jakob’ aw hi, ahih hangin a khutte, Esau’ khut hi,” a ci hi.

²³A khutte in a sanggampa Esau’ khut bangin mul nei ahih manin amah in thei lo hi. Tua ahih ciangin amah in thupha pia dingin kithawi a,

²⁴“Ka ta Esau taktak na hi hiam?” ci-in dongkik hi. Amah in dawngin, “Ka hi hi,” a ci hi.

²⁵Tua ciangin amah in, “Ka tapa nangma sa matsa ne-in thupha kong piak theih nadingin ka kiangah hong paipih in,” a ci hi. Tua ahih ciangin amah in a kiangah paipih a, amah in a ne hi. Amah in leenggahzu paipihin, amah in a dawn hi.

²⁶Tua ciangin a pa Isaac in ama kiangah, “Ka kiangah hong pai inla hong nam in, ka ta aw,” a ci hi.

²⁷Tua ahih ciangin amah a nai-ah hong pai-in a pa a nam hi. Amah in a puan gimnamte nam a, amah thupha pia-in, “En in, ka tapa’ gimnam pen TOPA in thupha a piak gamlak gimnam tawh kibang!

²⁸Pasian in na tungah vantung daitui hong pia hen la, na lote hoihsak tahen. An le leenggahzu tampi hong pia tahen.

²⁹Mite in nangma na hong sem hen la, minamte na mai-ah hong kun ta uh hen. Na sanggamte’ tungah topa hi inla, na sanggamte’ suanlekhakte, na mai-ah hong kun uh hen. Nang hong samsia peuhmah in samsiatna ngah hen la, thupha hong pia peuhmah in thupha ngah ta hen,” a ci hi.

³⁰Isaac in Jakob thupha a piak a man khit, a pa Isaac’ omna panin Jakob a paikhiat khit phetin, a sa betna panin a sanggampa Esau hong tung hi.

³¹Amah in zong an lim bawlin a pa’ kiangah hong paipih hi. Amah in a pa’ kiangah, “Thupha nong piak theih nadingin na tapa’ sa matsa a ne dingin ka pa hong tho in,” a ci hi.

³²A pa Isaac in ama kiangah, “Kua na hi hiam?” a ci hi. Amah in dawngin, “Kei pen na tapa, a suak masa Esau ka hi hi,” a ci hi.

³³Tua ciangin Isaac nakpitakin lingin, “Tua ahihleh, nang’ hong pai ma-in sa matsa hong paipihin, a vekin ka nek khit, amah thupha ka piakpa kua ahi hiam? Thupha pia khin ka hih manin amah in thupha ngah ding hi” a ci hi.

³⁴Esau in a pa’ kammalte a zak ciangin nakpi tak le nasia takin kikokhia-in a pa’ kiangah, “Kei thupha hong pia in, kei zong, aw ka pa!” a ci hi.

³⁵Ahih hangin amah in, “Khemna tawh na sanggampa hong pai-in amah in na thupha lakhia khinta hi,” a ci hi.

³⁶Esau in, “Amah Jakob kici mah hi lo ahi hiam? Amah in kei nihvei hong suankhia khin hi. Amah in ka innluahza hong sut hi. En in, tu-in amah in ka thupha hong sut leuleu hi,” a ci hi. Tua ciangin amah in, “Kei a dingin thupha siit lo na hi hiam?” a ci hi.

³⁷Isaac in Esau dawngin, “En in, amah nangma’ topa-in ka bawl khin a, a sanggamte khempeuh ama tungah nasemin ka pia khin a, an le leenggahzu tawh amah ka hingsak hi. Tua ahih ciangin ka ta aw, nang a dingin bang hih thei nawn ding ka hi hiam?” a ci hi.

³⁸Esau in a pa’ kiangah, “Pa aw, thupha khat beek nei nawn lo na hi hiam? Kei thupha hong pia in, kei zong, ka pa aw,” a ci hi. Tua ciangin Esau a kap hi.

³⁹Tua ciangin a pa Isaac in, “En in, leitung pana piang an le leenggahzu na nei kei ding a, na lo a dingin vantung daituite na ngah kei ding hi.

⁴⁰Na namsau tawh na nungta ding a, na sanggampa’ na na sem ding hi. Ahih hangin amah na langpan’ ciangin ama khutnuai panin na leengkhia ding hi,” a ci hi.

⁴¹A pa in amah thupha pia khin ahih manin tua thupha hangin tu-in Esau in Jakob mudah a, Esau in, “Ka pa’ sihna hangin dah nading hun hong nai ta hi. Tua khit ciangin ka sanggampa Jakob ka that ding hi,” ci-in ngaihsun hi.

⁴²Ahih hangin a tapa upa zaw Esau’ ngimna, Rebekah’ tungah kigen hi. Tua ahih ciangin amah in a ta nauzaw Jakob samin ama kiangah, “En in, na sanggampa Esau in nangmah thah ding vaihawmna tawh amah kihehnem hi.

⁴³Tua ahih ciangin tu-in ka ta aw, ka thu hong mang in. Haran-a ka sanggampa Laban’ kiangah va tai inla,

⁴⁴na sanggampa’ hehna a dam mateng tua lai ama kiangah tawlkhat sung va om in.

⁴⁵Na sanggampa’ sinsona a daih mateng, ama tunga na gamtatna a mangngilh mateng va om in. Tua ciangin mi hong sawlin hih lai munah nang kong lasak ding hi. Bang hangin no tegel tawh nikhat thu-in kei kikhen ding ka hi hiam?” a ci hi.

⁴⁶Tua ciangin Rebekah in Isaac kiangah, “Esau’ zi Hit numeite’ hangin ka lung gimin ka cimtak hi. Jakob in hih gam numeite khat ahi Hit numeite khat tenpih leh kei a dingin bang nuntak tham nawn ding ahi hiam?” a ci hi.