Read Tedim Chin PIANCILNA 28 Bible Online

PIANCILNA 28 - Tedim Chin bible

PIANCILNA 28

¹Tua ahih ciangin Isaac in Jakob sam a, amah thupha pia-in thuhilh a, “Nang in Kanaan numeite na tenpih kei ding hi.

²Kithawi inla, na nu’ pa Bethuel’ inn, Paddanaram-ah pai in. Tua lai munah na nu’ sanggampa Laban’ tanute khat na zi dingin la in.

³Nang, mihonpi khat na suah theih nadingin Vanglian Pasian in nang thupha hong pia-in, hong pungsakin, tampi hong phasak hen.

⁴Pasian in Abraham’ tunga a piak, tawlkhat sung na omna leitang na neih theih nadingin nang le na suanlekhakte tungah amah in Abraham’ thupha hong pia ta hen!” a ci hi.

⁵Tua bangin Isaac in Jakob sawlkhia hi. Jakob le Esau’ nu Rebekah’ sanggampa, Aram mi Bethuel’ tapa Laban’ omna Paddanaram-ah amah a pai hi.

⁶Isaac in Jakob thupha pia-in, zi la dingin Paddanaram-ah sawl a, thupha a piak kawmin amah thuhilhin, “Kanaan numeite na tenpih kei ding hi,” a cihna le,

⁷Jakob in a nu le a pa’ thu mangin Paddanaram-ah a paina thu tu-in Esau in thei hi.

⁸Tua ahih ciangin Kanaan numeite in a pa lungkimsak lo cih Esau in a theih ciangin,

⁹Ishmael’ kiangah Esau pai-in, ama zi neihsa banah, Nebaioth’ sanggamnu, Abraham’ tapa Ishmael’ tanu Mahalath zi-in a la hi.

¹⁰Jakob in Beersheba khua nusia-in Haran lamah a pai hi.

¹¹Amah mun khat tungin, ni tum khin ahih manin tua lai-ah tua zan a giak hi. Tua mun a suangte khat la-in, amah in lukhamin zang a, a ihmu dingin tua munah a lumsuk hi.

¹²Amah in mang man a, leitungah kahlei khat kiphutin, a kahlei dawn in van ban hi. Pasian’ vantung mite tua kahlei tungah kah to-in a kum suk a mu hi.

¹³En in, tua sanah TOPA ding a, “Kei pen na pa Abraham’ Pasian le Isaac’ Pasian, TOPA ka hi hi. Nang le na suanlekhakte’ tungah tu-a na lupna leitang kong pia ding hi.

¹⁴Na suanlekhakte leilak leivui zah pha ding a, nitumna lam le nisuahna lam, leilu lam le leitaw lamah na kizelthang ding uh hi. Nang le na suanlekhakte thupha kong piak bangin leitung minam khempeuh in thupha a ngah nadingun hong ngen ding uh hi.

¹⁵En in, keimah in nang hong ompihin na paina peuhah kong kem ding a, hih leitangah nang kong paipih kik ding hi. Bang hang hiam cih leh nang’ tunga kong gensa thute ka hih khit matengin nang kong nusia kei ding hi,” a ci hi.

¹⁶Tua ciangin a ihmutna panin Jakob khang lo a, “Hih lai munah TOPA om taktak hi; keimah in tua thu ka thei kei hi,” a ci hi.

¹⁷Amah lau a, “Hih mun bangzahin lauhuai ahi hiam! Hih pen Pasian’ inn lo adang hi lo a, hih pen vantung lutna kongpi ahi hi,” a ci hi.

¹⁸Tua ahih ciangin zingsangin Jakob tho baih a, amah in lukhamin a zat suang la-in khuamin phut a, a tungah sathau a sung hi.

¹⁹Amah in tua mun Bethel ci hi. Ahih hangin a masa-in tua khua min pen Luz ahi hi.

²⁰Tua ciangin Jakob in thuciamna khat bawlin, “Pasian in kei hong ompih a, hih ka paina lampi-ah kei hong kep a, nek ding an le silh ding puan hong piak a,

²¹lungnuam takin ka pa’ inn-ah ka ciahkik leh, TOPA pen keima Pasian hi ding a,

²²khuamin ka phuhsa hih suang pen Pasian’ inn hi ding hi. Keima tungah nangmah in nong piak khempeuh sawm-ah-khat nang’ tungah kong pia kik ding hi,” a ci hi.