Read Tedim Chin PIANCILNA 29 Bible Online

PIANCILNA 29 - Tedim Chin bible

PIANCILNA 29

¹Tua ciangin Jakob in a khualzinna zom a, nisuahna lam mite’ gam a tung hi.

²A khuadak leh gamlakah tuikhuk khat a mu hi. Tua gei-ah tuuhon thum na lum hi. Bang hang hiam cih leh tua tuikhuk panin tuuhonte tui kipia hi. Tuikhuk gong hukna suang lian hi.

³Tua lai munah tuuhonte khempeuh a kikaihkhop khit ciangin, tuucingte in tuikhuk gong panin a suang khukkhia uh a, tuute tui pia-in, tuikhuk gong ama omna ngei-ah a suang koih kik uh hi.

⁴Jakob in amaute kiangah, “Sanggamte aw, koi pana hong pai na hi uh hiam?” a ci hi. Amaute in, “Haran pan hi ung,” ci uh hi.

⁵Amah in amaute kiangah, “Nahor’ tapa Laban na thei uh hiam?” a ci hi. Amaute in, “Thei mah ung,” a ci uh hi.

⁶Amah in amaute kiangah, “Amah a cidam hiam?” a ci hi. Amaute in, “Dam hi; en in, a tanu Rachel zong a tuuhon tawh hong pai!” a ci uh hi.

⁷Amah in, “En un, ni sang lai a, gan kaihkhop hun nai lo hi. Tuute tui pia unla, pai-in an nesak lai un,” a ci hi.

⁸Ahih hangin amaute in, “Tuute kikaikhawm a, tuikhuk gong panin a suang a kikhuk khiat mateng tui ka pia thei kei uh hi. A kikhuk khiat khit ciang bekin tuute tui ka pia thei pan uh hi,” a ci uh hi.

⁹Tua bangin amaute tawh a kiho laitakin, Rachel a pa’ tuute tawh hong tung hi. Bang hang hiam cih leh amah in tuate kem hi.

¹⁰Tu-in Jakob in a nu’ sanggampa Laban’ tanu Rachel le a nu’ sanggampa Laban’ tuute a muh ciangin paito-in tuikhuk gong panin a suang khukkhia a, a nu’ sanggampa Laban’ tuute tui a pia hi.

¹¹Tua ciangin Jakob in Rachel nam a, a gingin kapkhia hi.

¹²Jakob in Rachel’ kiangah amah pen a pa’ behte hi a, Rebekah’ tapa ahihna zong a kigen hi. Tua ciangin Rachel tai-in a pa’ kiangah a gen hi.

¹³Laban in a sanggamnu’ tapa Jakob’ thu a zak ciangin amah a dawn dingin hong tai a, amah kawi-in nam a, a inn-ah a ciahpih hi. Jakob in Laban’ tungah a thute khempeuh gen a,

¹⁴Laban in ama kiangah, “Nang pen keima si keima sa na hi takpi hi,” a ci hi. Tua hi a, amah tawh kha khat a omkhawm hi.

¹⁵Tua ciangin Laban in Jakob’ kiangah, “Nang pen keima beh na hih ciangin, a man nei lopi-in kei’ na hong sem ding na hi hiam? Hong gen in; na thaman ding bang hi ding hiam?” a ci hi.

¹⁶Tu-in Laban in tanu nih nei hi. A uzaw’ min Leah hi a, a nauzaw’ min Rachel ahi hi.

¹⁷Leah’ mit-hah nem a, ahih hangin Rachel melhoihin ngaihbaang hi.

¹⁸Jakob in Rachel ngai hi. Amah in, “Na tanu a nauzaw Rachel thalawh nadingin nangma na kum sagih kong sem ding hi,” a ci hi.

¹⁹Laban in, “Midang tungah amah ka piak ding sangin nang’ tungah amah kong piak ding hoihzaw hi; kei kiangah om in,” a ci hi.

²⁰Tua ahih ciangin Jakob in Rachel a ngah nadingin kum sagih sung na sem a, amah a itna hangin tua hunte ni tawmno khat tawh kibang a sa hi.

²¹Tua ciangin Jakob in Laban kiangah, “Ka hun cingta ahih ciangin amah tawh ka lupkhawm theih nadingin ka zi hong pia in,” a ci hi.

²²Tua ahih ciangin Laban in tua mun a mi khempeuh kaikhawmin pawi khat a bawl hi.

²³Ahih hangin a nitak ciangin amah in a tanu Leah la-in Jakob kiangah paipih hi. Amah in tua nu luppih hi.

²⁴(Laban in ama numei nasem Zilpah a tanu Leah tungah a nasem numei dingin a pia hi.)

²⁵A zingsang ciangin, Leah na hi mawk hi. Jakob in Laban kiangah, “Bangci a kei hong hici bawl na hi hiam? Rachel ngah nadingin na na hong sem hi lo ka hi hiam? Tua ahihleh bang hangin kei hong khem na hi hiam?” a ci hi.

²⁶Laban in, “A u’ ma-in a nauzaw piak ding ko’ gamah ngeina hi lo hi.

²⁷Hih nu a dingin nipikal khat sung pawi beisak phot inla, adang kum sagih ka na nong sepsak thamanin a khat pen zong kong pia ding hi,” a ci hi.

²⁸Jakob zong tua bangmahin gamta a, tua nu’ pawi hun sung beisak phot hi. Tua ciangin Laban in a tanu Rachel zong a zi dingin a pia hi.

²⁹(Laban in ama nasem numei Bilhah a tanu Rachel’ tungah a nasem numei dingin a pia hi.)

³⁰Tua ahih ciangin Jakob in Rachel zong luppih a, amah in Leah sangin Rachel itzaw hi. Laban’ na adang kum sagih sung a semlai hi.

³¹TOPA in Leah a kimuhdahna a theih ciangin, amah in a naubu honsak hi; ahih hangin Rachel ciing hi.

³²Leah gai-in tapa khat nei a, amah in a min Reuben a phuak hi. Bang hang hiam cih leh amah in, “TOPA in ka thuakna hong muzo hi; tu-in ka pasal in kei hong it taktak ding hi,” a ci hi.

³³Amah gai kikin tapa khat nei a, amah in, “Keimah hong kimuhdahna thu TOPA in za khin ahih manin, amah in hih tapa zong hong pia hi,” ci hi. Amah in a min Simeon a phuak hi.

³⁴Amah gai leuleu-in tapa khat nei a, “Amah tawh tapa thum nei ta ka hih manin tu-in ka pasal in kei hong pawl ding hi,” ci hi. Tua ahih ciangin ama min Levi a phuak hi.

³⁵Amah gai leuleu-in tapa khat nei a, “Tuhunin TOPA ka phat ding hi,” ci hi. Tua ahih ciangin amah in a min Judah a phuak hi. Tua ciangin a ta neih a tawp hi.