Read Tedim Chin PIANCILNA 30 Bible Online

PIANCILNA 30 - Tedim Chin bible

PIANCILNA 30

¹Rachel in Jakob tawh ta a neih lohna a kimuh ciangin, amah in a sanggamnu eng hi. Amah in Jakob kiangah, “Ta hong pia in, tua ahih kei leh si ning!” a ci hi.

²Rachel’ tungah Jakob heh mahmah a, amah in, “Nang’ tungah ta hong pia lo Pasian’ munah om ka hi hiam?” a ci hi.

³Tua ciangin amah in, “Hih lai-ah ka nasem numei Bilhah om hi. Ka phei tungah ka tawi ding ta hong neih nading, le ama sung panin suanlekhak ka neih theih nadingin amah tawh lumkhawm in,” a ci hi.

⁴Tua ahih ciangin a nasem numei Bilhah ama tungah zi-in a pia hi. Jakob in tua nu luppih hi.

⁵Bilhah gai-in Jakob tawh tapa khat nei hi.

⁶Tua ciangin Rachel in, “Pasian in kei’ thu a hoihin hong khen zo a, amah in ka aw zong za zo-in tapa khat hong pia hi,” a ci hi. Tua ahih ciangin amah in a min Dan a phuak hi.

⁷Rachel’ nasem numei Bilhah gai kikin Jakob tawh tapa a nihna nei hi.

⁸Tua ciangin Rachel in, “Nakpi takin hanciamna tawh ka sanggamnu ka zo hi,” a ci hi. Tua ahih ciangin ama min Naftali a phuak hi.

⁹Leah in ta neih a tawplam a kimuh ciangin, amah in a nasem numei Zilpah la-in Jakob’ tungah zi-in a pia hi.

¹⁰Tua ciangin Leah’ nasem numei Zilpah in Jakob tawh tapa khat nei hi.

¹¹Leah in, “Kaam pha!” ci hi. Tua ahih ciangin ama min Gad a phuak hi.

¹²Leah’ nasem numei Zilpah in Jakob tawh tapa a nihna nei hi.

¹³Leah in, “Kei lungdam ing! Bang hang hiam cih leh numei dangte in kei a lungdam hong ci ding uh hi,” a ci hi. Tua ahih ciangin ama min Asher a phuak hi.

¹⁴Mangbuh lak hun laitakin gamlakah Reuben pai-in zawl-ai kungte va mu a, tuate a nu Leah’ kiangah a ciahpih hi. Tua ciangin Rachel in Leah kiangah, “Na tapa’ zawl-ai kungte kimkhat kei hong hawm in, hong thum ing,” a ci hi.

¹⁵Ahih hangin Leah in, “Ka pasal nong suh thuneu sa na hi hiam? Ka tapa’ zawl-ai kungte zong hong sut lai ding na hi hiam?” a ci hi. Rachel in, “Tua ahihleh na tapa’ zawl-ai man dingin tuzanin amah, nang tawh hong lumkhawm thei ding hi,” a ci hi.

¹⁶Nitakin lo panin Jakob hong ciah ciangin, amah a dawn dingin Leah paikhia a, “Kei’ kiangah hong lum in. Bang hang hiam cih leh ka tapa’ zawl-ai kungte tawh nang kong cial zo hi,” a ci hi. Tua ahih ciangin tua zan amah tawh a lumkhawm hi.

¹⁷Pasian in Leah’ thu ngai a, amah gai-in Jakob tawh tapa a ngana a nei hi.

¹⁸Leah in, “Ka nasem numei ka pasal tungah pia ka hih manin Pasian in ka thacial hong pia hi,” a ci hi. Tua ahih ciangin ama min Issakhar a phuak hi.

¹⁹Leah gai kik a, Jakob tawh tapa a gukna a nei hi.

²⁰Tua ciangin Leah in, “Pasian in moken’ hoih kei hong guan hi. Tu-in ka pasal in kei hong pahtawi ding hi. Bang hang hiam cih leh amah tawh tapa guk ka nei khin hi,” a ci hi. Tua ahih ciangin ama min Zebulun a phuak hi.

²¹Tua khit ciangin amah in tanu khat nei a, a min Dinah a phuak hi.

²²Tua ciangin Pasian in Rachel phawk a, Pasian in ama thu ngai-in a naubu honsak hi.

²³Amah gai-in tapa khat nei a, “Pasian in kei hong kikona teng lakhia khinta hi,” a ci hi.

²⁴Amah in a min Josef phuak a, “TOPA in tapa khat hong pia beh hen!” a ci hi.

²⁵Rachel in Josef a neih khit ciangin, Jakob in Laban’ kiangah, “Keima inn le ka gamah ka ciahkik theih nadingin kei hong sawl in.

²⁶Nang’ tunga kong thalawhsa ka zite le ka tate hong pia inla, hong paisak in. Bang hang hiam cih leh nangma na kong sepsaksa na thei hi,” a ci hi.

²⁷Ahih hangin Laban in ama kiangah, “Kei, thu hong gensak dih in. TOPA in nangma hangin kei thupha hong piakna ka thei hi.

²⁸Na thaman ding hong gen lecin kong pia ding hi,” a ci hi.

²⁹Jakob in ama kiangah, “Nangma na kong sepsak khitna le keima kep sungin na ganhingte tampi a phakna nangmahmah in na thei hi.

³⁰Bang hang hiam cih leh kei kong pai ma-in nang in tawm bek na nei a, tu-in tampi takin a khang hi. Ka sepna peuhah TOPA in nang thupha hong pia hi. Ahih hangin tu-in keima innkuan a’ ding cik ciangin ke’n vaihawm ding ka hi hiam?” a ci hi.

³¹Amah in, “Nang bang hong pia ding ka hi hiam?” a ci hi. Jakob in, “Bangmah dang nong pia kei ding hi. Hih bangin nong hih nakleh na tuuhonte vak kikin ka kem ding hi.

³²Tuni-in na tuuhonte khempeuh lakah hong paisak inla, tua sung panin tuu a puang le a gial khempeuh, le tuuno a vom khempeuh le keel lak panin a gial le a puang khempeuh hong khenkhiasak in; tuate keima thaman hi ding hi.

³³Tua ahih ciangin nang’ tung pana ka thaman a en dingin nong pai ciangin ka thumanna na hong nung muh ding hi. Keel lakah a puang lo le a gial lo peuhmah le tuuno lakah a vom lo peuhmah, kei kiangah a kimuh zenzen leh, guk-in kiseh pah ding hi,” a ci hi.

³⁴Laban in, “Hoih hi! Na cihsa bangin hisak ni,” a ci hi.

³⁵Ahih hangin Laban in tua ni-in keeltal a dung gial le a bem gialte, keelpi a puang le a gialte, a tungah a kang mun a om khempeuh le tuuno a vom khempeuh la khia-in, ama tapate’ kep dingin tuate a koih hi.

³⁶Jakob’ kiang panin ni thum paina gamlapi-ah tua ganhonte a paipih hi. Jakob in Laban’ ganhon a omlai teng an a vak hi.

³⁷Tua ciangin Jakob in poplar kung, almond kung, le hiangpa kungte tung pan ciangkhut ding a thak satin la a, a ciangkhutte a kang mun a om dingin kheh a, a ciangkang kangte kidawksak hi.

³⁸Amah in a khehsa ciangkangte tuiluang, tuipiakna tuikuang, tuuhonte tui dawn dingin a hong paina mun, tuuhonte’ mai-ah a koih hi. Amaute tui dawn dingin hong pai uh ciangin a nu le a pa omkhawm uh ahih manin,

³⁹tuuhonte tua ciangkangte’ mai-ah omkhawm uh hi. Tua ahih ciangin tuuhonte in a dung gial, a puang le a gial ta nei uh hi.

⁴⁰Jakob in tuunote khenkhia a, tuuhonte’ maitang pen a dung gialte le Laban’ tuuhon sunga a vomte khempeuh’ lam ngasak hi. Amah in ama a’ honte a tuamin koihkhia-in, Laban’ tuuhonte tawh koihkhawm lo hi.

⁴¹Tuuhon sung panin a thahat zawte a huk ciangin, amaute tua ciangkangte lakah a gai theih nadingin Jakob in tuuhonte’ muhna, tuiluang sungah a ciangkangte a koih hi.

⁴²Ahih hangin tuuhon a ginalote’ mai-ah tua ciangkangte koih lo hi. Tua ahih ciangin a ginalo zawte Laban a’ hi a, a thahat zawte Jakob-a’ ahi hi.

⁴³Tua ahih ciangin Jakob a hauhna nakpitakin khang a, tuuhon lianpi, nasem numei, nasem pasal, kalaoh, le late a nei hi.