Read Tedim Chin PIANCILNA 31 Bible Online

PIANCILNA 31 - Tedim Chin bible

PIANCILNA 31

¹Laban’ tapate in, “Jakob in i pa-a’ khempeuh la khin a, i pa’ neihsa tung panin amah in hih hauhna ngah hi,” a cihna thu tu-in Jakob in za hi.

²Laban in nidang bangin maipha tawh amah a don lohna Jakob in mu hi.

³Tua ciangin TOPA in Jakob’ kiangah, “Na pate le na behte’ gamah ciahkik in, nang kong ompih ding hi,” a ci hi.

⁴Tua ahih ciangin Jakob in mi sawlin ama tuuhon a omna gamlakah Rachel le Leah samsakin

⁵amaute kiangah, “Na pa un nidang bangin maipha tawh kei hong don lohna ka mu hi. Ahih hangin ka pa’ Pasian in kei hong ompih hi.

⁶Ka tha neih khempeuh tawh na pa’ na ka sepna na thei uh hi.

⁷Ahi zongin na pa un kei hong khemin, ka thaman sawmvei khelkhin a, ahih hangin kei hong gimsak ding Pasian in phal lo hi.

⁸Amah in, ‘A gialte na thaman hi ding hi,’ ci leh tua ciangin tuuhon khempeuh in a gial ta hong nei hi. Amah in, ‘A dung gialte na thaman hi ding hi,’ ci leh tua ciangin tuuhon khempeuh in a dung gial ta hong nei hi.

⁹Tua ahih ciangin Pasian in na pa’ ganhing khempeuh la khia-in tuate keima tungah hong piazo hi.

¹⁰“Ganhonte ta nei dingin a kikholh hunin ka khuadak to a, a honte’ tunga a diang keeltal khempeuh a dung gial, a bem gial, a puangin a omna ka mangin ka mu hi.

¹¹Tua ciangin Pasian’ vantungmi in ka mang sungah, ‘Jakob,’ hong ci a, ke’n, ‘Hiah om ing!’ ka ci hi.

¹²Amah in, ‘Khuadak to inla en in, a honte’ tunga a diang keelte khempeuh dung gial, bem gialin puang uh hi. Bang hang hiam cih leh Laban in nang’ tunga hong bawlna ka mu khin hi.

¹³Kei pen, nang in khuam khat sathau nuhin kei’ tungah thuciamna nong bawlna mun Bethel Pasian ka hi hi. Tu-in kithawi inla, hih gam panin paikhia-in, na suahna gamah ciahkik in,’ hong ci hi,” a ci hi.

¹⁴Tua ciangin Rachel le Leah in amah dawngin, “I pa’ inn sungah ei’ tanh ding ahi a, ei’ luah ding ahi zongin bang om ahi hiam?

¹⁵Amah in eite gamdangmi bangin hong ngaihsun hi lo ahi hiam? Bang hang hiam cih leh amah in eite hong zuak khin a, eite a’ ding hong kipia sum amah in zang mang khin hi.

¹⁶I pa’ tung panin Pasian in a lakkhiatsa neihsa khempeuh eite le i tate a’ ahi hi. Tua ahih ciangin tu-in, nang’ tunga Pasian’ hong cih peuhpeuh hih in,” a ci uh hi.

¹⁷Tua ahih ciangin Jakob kithawi-in a tapate le a zite kalaohte tungah a tuangsak hi.

¹⁸Amah in a ganhing khempeuh, a ngahsa a bawng khempeuh, Paddanaram gam sunga a ngah ama neihsa ganhing khempeuh, a pa Isaac’ omna Kanaan gamah a paipih dingin a hawlkhia hi.

¹⁹Laban a tuumul met dingin a paikhia hi a, Rachel in a pa’ innsung pasian-te na gu hi.

²⁰Jakob in Aram mi Laban khem a, tai ding a sawmna amah in gen lo hi.

²¹Amah a neihsa khempeuh tawh tai-in, Eufratis gun kantan a, Gilead gam mualtung lam a manawh hi.

²²Jakob tai hi, ci-in a ni thum ni-in Laban’ tungah a kigen ciangin,

²³amah in a behte zawnin ni sagih sung amah delh a, Gilead gam mualtungah amah pha dekdek uh hi.

²⁴Ahih hangin Aram mi Laban kiangah zanin mang sungah Pasian hong pai-in ama kiangah, “Jakob’ tungah a pha hitaleh a sia hitaleh kam khat beek na pau loh nadingin kidawm in,” a ci hi.

²⁵Tua ciangin Laban in Jakob pha hi. Tu-in Jakob in mualtung khatah a puanbuk na lam a, Laban le a behte in Gilead gam mualtungah phual a sat uh hi.

²⁶Laban in Jakob kiangah, “Nang in kei hong khemin, galmat bangin ka tanute bang hangin paikhiatpih na hi hiam?

²⁷Bang hangin tai simin kei hong khem a, hong gen lo na hi hiam? Tuaci gamtat kei lecin, lungdamna le lasakna, khuang le laiza tawh kong kha ding hi.

²⁸Bang hangin ka tapate le ka tanute mangpha khakna hong namsak lo na hi hiam? Tu-in na hai gamtat khin hi.

²⁹Nang kong siatsak ding keima thu ahi hi. Ahih hangin na pa’ Pasian in zan zanin kei kiangah thu hong gen a, ‘Jakob tungah a pha hitaleh a sia hitaleh na gen ding kidawm in,’ hong ci hi.

³⁰Tu-in nang in na pa’ inn nakpitakin lunggulh na hih manin na paikhia khinta hi. Ahih hangin bang hangin ka pasian-te gu na hi hiam?” a ci hi.

³¹Jakob in Laban dawngin, “Kei’ kiang panin na tanute thahat thu-in nong suh khak ding ka launa hang ahi hi.

³²Na pasian-te na muhna mi peuhpeuh kithat tahen! I behte’ muhna-ah nang a’ ahi na khat peuhpeuh kei’ neihsa lakah a om leh kawkkhia-in la in,” a ci hi. Rachel in Laban’ pasian-te a na guklam Jakob in thei kha lo hi.

³³Tua ahih ciangin Laban, Jakob’ puanbuk, Leah’ puanbuk, le nasem numei nihte’ puanbuk sungah pai a, ahih hangin amah in tuate mu lo hi. Leah’ puanbuk panin amah paikhia-in Rachel’ puanbuk sungah a lut hi.

³⁴Rachel in innsung pasian-te na gu a, kalaoh tutphah sungah koihin, tuate’ tungah na tu hi. Laban in puanbuk sungteng khempeuh zawt a, ahih hangin tuate mu lo hi.

³⁵Amah in a pa kiangah, “Nang’ mai-ah hong ding thei lo ka hih manin ka topa heh kei in; bang hang hiam cih leh numei ngeina nin ka nei hi,” a ci hi. Tua ahih ciangin amah in mundang khempeuh zong a, ahih hangin a innsung pasian-te mu zo lo hi.

³⁶Tua ciangin Jakob a heh suak a, Laban mawhsakin, “Ka mawhna bang ahi hiam? Nasia takin kei nong delh nadingin ka khialhna bang ahi hiam?

³⁷Ka van khempeuh na thawi khit hangin na innsung nate mu na hi hiam? Ei tegel kikalah amaute in thu a khen theih nadingin keima behte le nangma behte’ mai-ah, na muh a om leh hong koihkhia in.

³⁸Hih kum sawmnih sung nang kiangah kong om khin hi. Na tuupi le na keelpite tatolh nai lo a, na tuuhonte’ sung pan tuutal sa ka ne kei hi.

³⁹Gamlak ganhingte’ balzante, nang’ kiangah kong puak kei hi. Tua banga supnate kei mahmah in ka thuak hi. Sun-a kigu hitaleh zan a kigu hitaleh kei nong lohsak hi.

⁴⁰Kei pen tu-a bang ka hi hi. Sunin a sa in hong kang a, zanin a vot in hong tawp a, ka ihmu ngei kei hi.

⁴¹Hih kum sawmnih sung na inn sungah kong om khin hi. Na tanu nihte, kum sawm le li sung kong thalawh a, na tuuhonte, kum guk sung kong thalawh a, nangmah in ka thaman sawmvei na kheel hi.

⁴²Ka pa’ Pasian, Abraham’ Pasian, le Isaac’ Zahtak pa in kei hong ompih lo hileh, tu-in nangmah in khut hawmguakin kei nong sawlkhia taktak ding hi. Pasian in ka thuakna le ka nasepna mu a, zan zanin nang hong thuhilh hi,” a ci hi.

⁴³Tua ciangin Laban in dawngin Jakob kiangah, “Tanute pen keima tanu hi; naupangte zong keima naupang hi; tuuhonte, keima tuuhon hi a, na muh khempeuh keima-a’ ahi hi. Ahih hangin tuni-in hih ka tanute hitaleh amau’ sung pana piang naupangte’ tung hitaleh ke’n bang cih thei ding ka hi hiam?

⁴⁴Tu-in hong pai in, nang le kei in thuciamna khat bawl ni; suangcian khat bawlin nang le kei’ kikalah teci hisak ni,” a ci hi.

⁴⁵Tua ahih ciangin Jakob in suang khat la-in khuamin a phut hi.

⁴⁶Jakob in a behte kiangah, “Suang khawm un,” ci a, amaute in suang la-in suangcian khat a bawl uh hi. Tua suangcian gei-ah amaute in an a ne khawm uh hi.

⁴⁷Laban in, Jegarsahadutha, ci hi. Ahih hangin Jakob in, Galeed, ci hi.

⁴⁸Laban in, “Hih suangcian pen tuni-in nang le kei’ kikalah teci ahi hi,” a ci hi. Tua ahih ciangin amah in, Galeed, ci-in min phuak a,

⁴⁹a khuam pen Mizpah, ci hi. Bang hang hiam cih leh Laban in, “Eite khatlekhat i tuam om ciangin TOPA in nang le kei’ kikalah hong encik tahen.

⁵⁰Ka tanute na bawl siat a, ka tanute’ banah zi na lak beh leh, eite tawh kuamah a om loh hangin nang le kei’ kikalah, Pasian, teci ahihna phawk in,” a ci hi.

⁵¹Tua ciangin Laban in Jakob’ kiangah, “Nang le kei’ kikalah ka phuhsa hih suangcian mu in.

⁵²Siatna a bawl dingin keimah in hih suangcian khengin nang kiangah kong pai loh nading, nang zong hih suangcian le khuam khengin kei kiangah nong pai loh nadingin hih suangcian le suangkhuam, teci ahi hi.

⁵³Abraham’ Pasian le Nahor’ Pasian, amau’ pate’ Pasian in eite’ kikalah thu khen ta hen,” a ci hi. Tua ahih ciangin Jakob in ama pa Isaac’ Zahtak pa tawh a kiciam hi.

⁵⁴Jakob in mualtungah biakpiakna pia-in an ne dingin a behte a sam hi. Amaute in an ne uh a, zan tawntung mualtungah a om uh hi.

⁵⁵Zingsang tungin Laban tho-in, a tute le a tanute namin amaute thupha a piak khit ciangin paikhia-in a inn-ah a ciahkik hi.