Read Tedim Chin PIANCILNA 32 Bible Online

PIANCILNA 32 - Tedim Chin bible

PIANCILNA 32

¹Jakob zong ama lampi-ah paisuak a, Pasian’ vantung mite in amah na dawn hi.

²Jakob in amaute a muh ciangin amah in, “Hihte, Pasian’ galkapte!,” a ci hi. Tua ahih ciangin tua mun pen Mahanaim, ci-in min a phuak hi.

³Jakob in Edom gam, Seir leitangah a om a sanggampa Esau kiangah kamtaite ma sawl a,

⁴amaute hilhin, “Note in ka topa Esau kiangah hih bangin na ci ding uh hi: Na nasempa Jakob in, ‘Laban’ kiangah peemta-in tu ciang dong ka om hi.

⁵Keimah in bawngtal, la, tuuhon, nasem pasal, le nasem numeite ka nei hi. Na mai-ah maipha ka muh theih nadingin ka topa tungah a gen dingin kong sawl hi, ci hi’, ci un,” a ci hi.

⁶Kamtaite, Jakob kiangah hong ciahkik uh a, “Na sanggampa Esau kiangah ka va pai uh hi. Nangmah a dawn dingin amah hong pai a, amah tawh mihing zali om hi,” ci-in hong gen uh hi.

⁷Tua ciangin Jakob nakpitakin lau-in lungkham hi. Amah in ama kianga om mite, tuuhonte, bawnghonte, le kalaohte pawl nihin khen a,

⁸“Pawlkhatah Esau pai-in a suksiat leh a pawlkhat suakta ding hi,” ci-in a ngaihsun hi.

⁹Jakob in, “Ka pu Abraham’ Pasian le ka pa Isaac’ Pasian, keima kiangah, ‘Na gam le na behte kiangah ciahkik in; nang’ tungah hoihna kong bawl ding hi,’ hong ci TOPA aw,

¹⁰kei pen na itna kip khempeuh lak pan a neupen le na nasempa tunga nong lahsa na thumannate khempeuh tawh ka kilawm kei hi. Bang hang hiam cih leh ka ciangkhut guak tawh hih Jordan ka kantan a, ahi zongin tu-in pawl nih ka cing khinta hi.

¹¹Ka sanggampa Esau’ khutsung pan kei hong khahkhia in, kong thum hi. Bang hang hiam cih leh amah hong pai-in kote khempeuh, nute, naupangte tawh hong thah khit khak ding ka lau hi.

¹²Ahih hangin nangmah in, ‘Na tungah hoihna kong bawl ding a, na suanlekhakte tuipi sehnel zahin a honpi a kisim thei loin ka bawl ding hi,’ nong ci hi,” a ci hi.

¹³Tua ahih ciangin amah tua zanin tua lai-ah giak a, ama neih sung panin a sanggampa Esau a’ ding letsong

¹⁴keelpi zanih le keeltal sawmnih, tuupi zanih le tuutal sawmnih,

¹⁵kalaoh nawisuk sawmthum le a note, bawngpi sawmli le bawngtal sawm, lapi sawmnih le latal sawm a la hi.

¹⁶Amah in hihte a nasemte’ khut sungah amau’ hon ciatin pia a, ama nasemte kiangah, “Ka mai-ah na paisuak unla, hon khat le hon khat kikal kihalsak un,” a ci hi.

¹⁷Amah in a masa pente tungah thu hilh a, “Ka sanggampa Esau in note hong dawnin, ‘Kua-a’ na hi uh hiam? Koi pana hong pai na hi uh hiam? Na mai uha om hihte kua-a’ ahi hiam?’ ci-in hong dot ciangin

¹⁸note in, ‘Na nasempa Jakob-a’ ahi hi. Hihte pen ka topa Esau’ tungah letsongin hong kipuak ahi hi. Tua tham loin amah ka nung uhah om hi,’ ci un,” a ci hi.

¹⁹Amah in tua mah bangin a nihna, a thumna, le ganhing honte a zuite khempeuh kiangah, “Amah tawh na kituah uh ciangin Esau’ kiangah a kibangmahin na gen ding uh hi.

²⁰Note in, ‘Tua tham loin na nasempa Jakob ka nung uhah om hi,’ na ci ding uh hi,” a ci hi. Bang hang hiam cih leh amah in, “Ka mai-ah a pai letsong tawh amah ka lungdamsak zo kha ding a, tua khit ciangin ama maipha ka mu ding hi. Amah in kei hong sang kha ding hi,” ci-in a ngaihsun hi.

²¹Tua ahih ciangin letsong a piak dingte, ama mai-ah paisak a, amah ahihleh tua zanin giahphual ah a giak lai hi.

²²Tua zan mahin amah tho-in a zi nihte, a nasem numei nihte, le a ta sawm le khatte la-in, Jabbok ngahmun a kantan hi.

²³Amah in amaute la-in lui galkhatah puak a, tua mah bangin a neih khempeuh zong a galkahsak hi.

²⁴Jakob amah guak bek omlai a, zingsang khuavak dong mi khat in amah a lai hi.

²⁵Tua mipa in Jakob a zawh lohna a theih ciangin amah in a khelkom sung suksak hi. Tua bangin amah tawh a kilaina-in Jakob’ khelguh a kilawi hi.

²⁶Tua ciangin amah in, “Khua vak ta ahih ciangin hong khah in,” a ci hi. Ahih hangin Jakob in, “Kei, thupha nong piak kei leh kong khah kei ding hi,” a ci hi.

²⁷Amah in, “Na min bang ahi hiam?” a ci hi. Amah in, “Jakob,” ci hi.

²⁸Tua ciangin amah in, “Na min Jakob, kici nawn loin Israel, kici ding hi. Bang hang hiam cih leh Pasian le mite tawh na kilai khinzo a, na zo hi,” a ci hi.

²⁹Tua ciangin Jakob in amah dongin, “Na min hong gen in, hong thum ing,” a ci hi. Ahih hangin amah in, “Bang hanga ka min hong dong na hi hiam?” a ci hi. Tua lai-ah amah in Jakob thupha a pia hi.

³⁰Tua ahih ciangin Jakob in tua mun pen Peniel, ci-in min a phuak hi. “Bang hang hiam cih leh maitang kituahin Pasian ka mu khin a, ahi zongin kei hong kihing khawi lai hi,” a ci hi.

³¹A khelpi’ hangin amah bai kawmin Peniel a kantan laitakin ni hong suak hi.

³²Tua ahih ciangin tuni dongin Israel mite in khelkom tunga a om khel thagui ne lo uh hi. Amah in Jakob’ khelkom, a khel thagui tung a sukna hang ahi hi.