Read Tedim Chin PIANCILNA 33 Bible Online

PIANCILNA 33 - Tedim Chin bible

PIANCILNA 33

¹Jakob khuadak a, Esau tawh mihing zali hong pai a mu hi. Tua ahih ciangin amah in Leah, Rachel, le nasem numei nihte’ lakah a naupangte a khen hi.

²Amah in nasem numeite le a tate a masa penin, tua ciangin Leah le a tate, tua ciangin Rachel le Josef a nunung penin a koih hi.

³Amah ahihleh amaute’ mai-ah pai-in, a sanggampa’ kiang nai a tun matengin leilak lamah sagihvei a kun hi.

⁴Ahih hangin amah a dawn dingin Esau hong tai-in, amah ngawng kawi a, pomcipin nam a, amaute a kap uh hi.

⁵Esau khuadak to-in nupite le naupangte a muh ciangin amah in, “Nang tawh a om hihte kua ahi hiam?” a ci hi. Jakob in, “Pasian in hehpihna tawh na nasempa a piak tate ahi hi,” a ci hi.

⁶Tua ciangin nasem numeite in hong naih uh a, amau le a tate hong kun uh hi.

⁷Leah le a tate in zong tua bangmahin hong naihin a kun uh hi. A nunung penin Josef le Rachel in hong naihin a kun uh hi.

⁸Esau in, “Ka kituahpih hih a honte khempeuh bang na cihnopna ahi hiam?” a ci hi. Jakob in dawngin, “Ka topa’ maipha zon nading,” a ci hi.

⁹Ahih hangin Esau in, “A kicing nei ing, sanggam aw; nang’ neihte nangma a dingin kem in,” a ci hi.

¹⁰Jakob in, “Hi lo hi, nang’ tungah hong thum ing. Na muhna-ah maipha ngah ka hih leh ka khutsung panin ka letsongte hong sang in. Bang hang hiam cih leh hih banga maipha tawh kei nong sanna, na maitang ka muh ding pen Pasian’ maitang muh tawh kibang taktak hi.

¹¹Nang’ kianga hong kipaipih ka letsong nong san nadingin hong thum ing. Bang hang hiam cih leh Pasian in kei hong hehpih mahmah a, a kicing ka nei hi,” a ci hi. Tua bangin amah in kun teitei ahih manin Esau in zong a sang hi.

¹²Tua ciangin Esau in, “Tu-in paikhawm ni. Na mai-ah kei ka pai ding hi,” a ci hi.

¹³Ahih hangin Jakob in ama kiangah, “Naupangte a hat lohna ka topa in na thei hi. Tuuhonte le bawngte, a nongek neite ka lungphamawh hi. Ni khat sung kinak hawl lua leh ganhonte khempeuh si ding uh hi.

¹⁴Na nasempa’ mai-ah ka topa na pai inla, Seir-ah ka topa’ kiang kong tun matengin ka mai-a om ganhingte’ thahatna le naupangte’ hatna tawh kituakin damdamin kong makaih ding hi,” a ci hi.

¹⁵Tua ahih ciangin Esau in, “Kei tawh a om mite pawlkhat, nang’ kiangah hong nusia ning,” a ci hi. Ahih hangin amah in, “A kisapna bang om ahi hiam? Ka topa’ muhna-ah kei maipha hong ngahsak in,” a ci hi.

¹⁶Tua ahih ciangin Esau in tua ni-in ama lampi zui-in Seir-ah a ciahkik hi.

¹⁷Ahih hangin Jakob, Sukkoth lamah pai a, ama a’ ding inn le a ganhingte a’ ding hampheng a lam hi. Tua ahih ciangin tua mun a min Sukkoth, kici hi.

¹⁸Paddanaram panin hong pai lampi, Kanaan gam sunga om Shekhem khuapi-ah lungmuang takin Jakob hong tung a, a khuapi kiangah phual a sat hi.

¹⁹Amah in Shekhem’ pa Hamor’ innkuante’ tung panin a puanbuk lamnasa leitang dangka zakhat tawh a lei hi.

²⁰Tua lai-ah amah in biakna tau khat bawl a, El-Elohe-Israel, ci-in min a phuak hi.