Read Tedim Chin PIANCILNA 34 Bible Online

PIANCILNA 34 - Tedim Chin bible

PIANCILNA 34

¹Ni khat, Jakob le Leah’ tanu Dinah tua gam numeite kiangah va hawh hi.

²Hiv mi Hamor’ tapa Shekhem, tua gam ulianpa in amah a muh ciangin, amah manin luppih a, amah siasak hi.

³Amah in Jakob’ tanu Dinah hoihsa mahmah ahih manin itin kamkhum takin hopih hi.

⁴Tua ahih ciangin Shekhem in a pa Hamor’ kiangah, “Hih numei ka zi dingin hong laksak in,” a ci hi.

⁵Tu-in Jakob in a tanu Dinah a kisiatsakna za hi. Ahih hangin a tate, a ganhingte tawh gamlakah om ahih manin amaute hong tun matengin Jakob in bangmah gen loin om hi.

⁶Shekhem’ pa Hamor, Jakob tawh a kimu dingin ama kiangah va pai hi.

⁷Jakob’ tapate in tua thu a zak uh ciangin gamlak panin hong ciah uh hi. Amaute lungkim loin heh mahmah uh hi. Bang hang hiam cih leh Jakob’ tanu tawh a lupkhop manin amah in Israel mite’ sungah a kilawm lo hai gamtatna hong tun hi.

⁸Ahih hangin Hamor in amaute tawh thu gen a, “Ka tapa Shekhem in na tanu ngai mahmah hi. A tenpih dingin nong piak nadingin kong thum hi.

⁹Kote tawh kitenna hong bawl un. Na tanute uh kote’ tungah hong pia unla, no a dingin ka tanute uh la un.

¹⁰Kote’ lakah nong teng ding uh hi. No a dingin leitang hong kipia ding hi. Ka gam sung uhah tengin sum bawl unla, neihsa lam un,” a ci hi.

¹¹Shekhem in a numei’ pa le a numei’ sanggamte’ kiangah, “Note’ mai-ah maipha hong musak unla, kei’ tunga nong cih peuhpeuh uh kong pia ding hi.

¹²Kei kiang panin moman le letsong tampi hong ngen un. Kei’ tunga nong nget zahzah uh kong pia ding hi. Zi dingin a numei hong pia hoh un,” ci thuah lai hi.

¹³Shekhem in a sanggamnu uh Dinah siasak khin ahih manin Jakob’ tapate in Shekhem le a pa Hamor khemna tawh dawng uh hi.

¹⁴Amaute in amau kiangah, “Vun ki-at lopa’ tungah ka sanggamnu uh ka piak ding uh ka ngaihsun thei kei uh hi. Tua bangin pia le ung ko a dingin mindaina hi ding hi.

¹⁵Hih bangin nong gamtat uhleh ka thukim bek ding uh hi: Note’ sung panin pasal khempeuh vun ki-at le-uhcin kote mah bang na suak ding uh hi.

¹⁶Tua ciangin ka tanute uh note’ tungah hong pia-in, na tanute uh kote a dingin kong la ding uh a, note tawh kote hong tengin mikhat i suak ding hi.

¹⁷Ahih hangin note in ka thu uh hong ngai loin, vun na ki-at kei uh le, ka tanu uh ka la ding uh a, kote ka paikhia ding uh hi,” a ci uh hi.

¹⁸Amau’ thugente in Hamor le Hamor’ tapa Shekhem lungdamsak hi.

¹⁹Tangvalpa in Jakob’ tanu deih ahih manin tua banga a gamtat ding zekai lo hi. Amah pen, a kipahtawi a thupi pen khat ahi hi.

²⁰Tua ahih ciangin Hamor le a tapa Shekhem, amau’ khua kulhpi kongpi-ah hong pai-in a khuapih mite uh kiangah thu gen a,

²¹“Hih mite, eite’ tungah hong nop mahmah uh hi. I gam sungah tengsakin sum bawlsak ni. Bang hang hiam cih leh en un, amau a’ ding a kicing dingin i leitang a zai hi. Amau’ tanute zi-in tenpih ni. Eite’ tanute zong amau pia ni.

²²Hih thu khat bek tawh eite tawh tenkhop ding, mikhat suah ding amau thukim uh hi. Amaute vun a ki-at bangin eite’ lakah pasal khempeuh vun ki-at ding ahi hi.

²³Amau’ bawngte, amaute’ neihsate, le amau’ ganhingte khempeuh ei a’ ding hi lo ahi hiam? Amaute tawh eite thukim hoh ni. Tua hileh amaute, eite tawh hong tengkhawm ding uh hi,” a ci uh hi.

²⁴Khuapi kulhkongpi-ah a pai mi khempeuh in Hamor le a tapa Shekhem’ thu a mang uh hi. Khuapi kulhkongpi-ah a hong pai pasal khempeuh a vun ki-at uh hi.

²⁵A ni thum ni, amaute meima vei-in a om laitakun Jakob’ tapa nihte Simeon le Levi, Dinah’ sanggamte in amau’ namsau la-in theihkholh lohin khuapi va sim uh a, pasal khempeuh a that uh hi.

²⁶Amaute in Hamor le a tapa Shekhem, namsau tawh that uh a, Shekhem’ innsung panin Dinah lakhia-in a paikhia uh hi.

²⁷Jakob tapa dangte in a kithat mite’ tungtawnin khuapi susia uh hi. Bang hang hiam cih leh a sanggamnu uh kisiasak hi.

²⁸Amaute in a tuuhonte le a bawnghonte, a late le khuapi sunga om peuhmah, le lo sunga om peuhmah a laksak uh hi.

²⁹Amau’ neihsa khempeuh, a naupangte khempeuh, a zite khempeuh, le inn sunga om na khempeuh laksak uh a, amau’ neihsa a suaksak uh hi.

³⁰Tua ciangin Jakob in Simeon le Levi’ kiangah, “Hih leitangah a teng, Kanaan mite le Perez mite tungah kei a muhdahhuai-in nong bawlna uh tawh kei’ tungah haksatna nong tun uh hi. Kei’ pawl mite tawm hi. Amaute kei’ langah hong kikaikhawmin kei hong sim leh, kei le ka innkuanpihte hong susia ding uh hi,” a ci hi.

³¹Ahih hangin amaute in, “Amah in ka sanggamnu uh numei paktat bangin a bawl ding kilawm ahi hiam?” a ci uh hi.