Read Tedim Chin PIANCILNA 35 Bible Online

PIANCILNA 35 - Tedim Chin bible

PIANCILNA 35

¹Pasian in Jakob kiangah, “Kithawi-in Bethel-ah paito inla, tua lai-ah teng in. Na sanggampa Esau’ kiang panin na tai hun lai-a nang’ tungah a hong kilang Pasian a dingin biakna tau khat bawl in,” a ci hi.

²Tua ahih ciangin Jakob in a innkuanpihte le amah tawh a omte khempeuh kiangah, “Note lakah a om gamdang pasian-te koihkhia unla, nomau kisiansuahin, na puante uh khek un.

³Ka lungkham hunin hong huhin, ka paina khempeuhah a hong ompih Pasian a dingin biakna tau khat ka bawl theih nadingin eite kipanin Bethel-ah paito ni,” a ci hi.

⁴Tua ahih ciangin amaute in Jakob’ tungah amau’ neih gamdang pasian khempeuh le a bil uha om bilbahte a pia uh hi. Jakob in Shekhem khua gei-a tawsaw nuai-ah tuate a seel hi.

⁵Jakob le a tapate khualzinin a pai laitakun amau’ kiima om khuapite’ tungah Pasian’ kiang panin lauhuaina lianpi khat tung ahih manin amaute in Jakob le a tapate delh lo uh hi.

⁶Kanaan gam sunga om Luz (Bethel)-ah Jakob le amah tawh a om mi khempeuh tung uh a,

⁷tua lai-ah amah in biakna tau khat lamin, tua mun Elbethel, ci-in min a phuak hi. Bang hang hiam cih leh a sanggampa kiang panin a tai lai-in tua munah ama tungah Pasian mahmah kilang hi.

⁸Tua ciangin Rebekah a cingnu Deborah si a, Bethel khang tawsaw nuai-ah amah kivui hi. Tua ahih ciangin tua mun min pen Allonbakuth, kici hi.

⁹Paddanaram panin amah hong pai ciangin Jakob’ tungah Pasian kilang kik a, amah thupha a pia hi.

¹⁰Pasian in ama kiangah, “Na min Jakob ahi hi. Ahi zongin tu-a kipanin nangma min pen Jakob kici nawn lo ding a, Israel, hong kici ding hi,” a ci hi. Tua ahih ciangin ama min Israel, kici hi.

¹¹Pasian in ama kiangah, “Kei pen Vanglian Pasian ka hi hi: Pung inla, tampi pha in. Minam khat le minamte honkhat nang’ sung panin piang ding a, nang’ sung panin kumpite zong piang ding hi.

¹²Abraham le Isaac tunga ka piak leitang nangma tungah kong pia ding a, nang’ khit cianga na suanlekhakte’ tungah tua leitang ka pia ding hi,” a ci hi.

¹³Tua ciangin amah tawh a kihona mun ama kiang panin Pasian paikhia to hi.

¹⁴Jakob in amah tawh a kihona munah suang khuam khat phut a, amah in tua tungah leenggahzu tawh biakpiakna a sungkhia hi. Tua tungah sathau zong a sung hi.

¹⁵Tua ahih ciangin Jakob in, Pasian in amah a hopihna mun a min Bethel, a ci hi.

¹⁶Tua ciangin Bethel panin amaute ding khia uh a, Efrath panin a gamla sim lai mun a tun laitakun Rachel a nausuah hun tung a, amah nakpi takin a gim hi.

¹⁷Amah a gim mahmah laitakin naudom nu in ama kiangah, “Lunghimawh kei in. Tu-in tapa dang khat na nei ding hi,” a ci hi.

¹⁸Amah a bei laitakin amah in a min dingin Benoni, a ci hi. Ahih hangin a pa in ama min Benjamin, ci-in a phuak hi.

¹⁹Tua ahih ciangin Rachel si-in, Efrath (Bethlehem) paina lampi-ah kivui a,

²⁰Jakob in ama han tungah mualsuang khat a phut hi. Tua pen tuni dongin tua lai mahah a om Rachel’ han mualsuang khuam ahi hi.

²¹Israel in a khualzin zomlai a, Eder tausang galkhatah a puanbuk a lam hi.

²²Tua gamah Israel a ten laitakin Reuben in a pa’ zineu Bilhah luppih hi. Israel in tua thu za-in heh mahmah hi. Tu-in Jakob’ tapate, sawm le nih ahi hi.

²³Leah’ tapate: Reuben (Jakob’ ta u pen), Simeon, Levi, Judah, Issakhar, le Zebulun ahi hi.

²⁴Rachel’ tapate: Josef le Benjamin ahi hi.

²⁵Rachel’ nasem numei Bilhah’ tapate: Dan le Naftali ahi hi.

²⁶Leah’ nasem numei Zilpah’ tapate: Gad le Asher ahi hi. Hihte pen Paddanaram gamah ama sunga suak Jakob’ tapa sawm le nihte ahi hi.

²⁷Abraham le Isaac tawlkhat a omna Mamre, ahih kei leh Kiriatharba (Hebron)-a a pa Isaac a omna-ah Jakob hong pai hi.

²⁸Tu-in Isaac’ khansung, kum za le kum sawmgiat ahi hi.

²⁹Isaac in a nunung pen a hu sang hi. Amah a teek, kum tampi a pha-in si a, ama mite’ kiangah kigawm hi. Ama tapa Esau le Jakob in amah a vui uh hi.