Read Tedim Chin PIANCILNA 37 Bible Online

PIANCILNA 37 - Tedim Chin bible

PIANCILNA 37

¹A pa tawlkhat a tenna Kanaan gamah Jakob teng hi.

²Jakob innkuante’ tangthu hih bang ahi hi. Josef kum sawm le sagih pha ahih manin a sanggamte tawh tuuhon cing hi. A pa’ zite Bilhah le Zilpah’ tapate tawh tangval ahi uh hi. Josef in a pa uh kiangah amaute’ siat gamtatnate a gen hi.

³Tu-in Israel in a ta dangte khat peuhpeuh sangin Josef itzaw hi. Bang hang hiam cih leh a teek khitin a neih a tapa ahi hi. Amah in ama a dingin puantualpi bansau khat a bawlsak hi.

⁴Ahih hangin a pa un a sanggamte khempeuh sangin amah a itzawkna a sanggamte in a muh uh ciangin, amaute in Josef mudah uh a, nuamtakin amah hopih thei lo uh hi.

⁵Tu-in Josef in mang khat man a, amah in a sanggamte’ lakah a gen ciangin amaute in amah muhdah semsemna-in nei uh hi.

⁶Amah in amaute kiangah, “Keima mat hih mang ngai un:

⁷Eite in lo lai-ah buhlom i hen a, keima buhlom tho-in ding tang hi. Tua kiimah note’ buhlom kikhawm a, keima buhlom mai-ah kun uh hi,” a ci hi.

⁸A sanggamte in ama kiangah, “Kote’ tungah nang in hong uk ding a, kote’ tungah ukna aana nei ding na hi hiam?” a ci uh hi. Tua ahih ciangin amaute in a mangte le a thugente’ hangin amah mudah semsem uh hi.

⁹Tua ciangin amah in mang dang khat man a, tua mang a sanggamte kiangah genin, “Mang dang khat ka man hi. Ni, kha, le aksi sawm le khatte kei’ mai-ah hong kun uh hi,” a ci hi.

¹⁰Ahih hangin amah in a pa le a sanggamte’ kiangah a gen ciangin a pa in amah taii-in, “Nangma mat hih mang a bangci mang ahi hiam? Kei le na nu le na sanggamte, nangma mai leilakah a kun dingin hong pai ding ka hi uh hiam?” a ci hi.

¹¹A sanggamte in amah haza uh a, ahih hangin a pa in hih thute a ciamteh hi.

¹²Khatvei a pa uh’ tuuhonte a cing dingin Shekhem gei-ah a sanggamte a pai hi.

¹³Israel in Josef kiangah, “Na sanggamte in Shekhem-ah tuuhon cing uh hi lo ahi hiam? Hong pai in, amau’ kiangah hong sawl ning,” a ci hi. Amah in a kiangah, “Hiah om ing,” a ci hi.

¹⁴Tua ahih ciangin amah in, “Tu-in va pai inla, na sanggamte le tuuhonte a cidam hiam va thei inla, kei kiangah thu hong zasakkik in,” a ci hi. Tua ahih ciangin amah in Hebron kuam panin Josef sawl a, Shekhem-ah amah va tung hi.

¹⁵Gamlakah a vak kawikawina mi khat in mu a, “Bang zongzong na hi hiam?” ci-in a dong hi.

¹⁶“Ka sanggamte a zong ka hi hi. Amaute in koi lai-ah tuuhon cing uh hiam, hong gen in, hong thum ing,” amah in ci hi.

¹⁷Mipa in, “Amaute paikhia zo uh hi. Bang hang hiam cih leh, ‘Dothan-ah pai ni,’ a cih uh ka za hi,” a ci hi. Tua ahih ciangin a sanggamte’ nungah Josef pai a, Dothan-ah amaute a mu hi.

¹⁸Amaute in gamlapi-ah amah na mu uh a, amaute’ nai-ah amah hong tun ma-in amaute in amah thah ding na vaihawm uh hi.

¹⁹Amaute khatlekhat in, “Hih lai-ah mangman pa hong pai hi.

²⁰Tu-in hong pai un. Amah thatin dum sung khatah lawn ni. Tua ciangin gamsa khat in amah netum khin hi, i ci ding hi. A mangte bang a suak hiam i mu ding hi,” a kici uh hi.

²¹Ahih hangin Reuben in tua thu a zak ciangin, “Amah that kei ni,” ci-in, amau’ khutsung panin amah honkhia hi.

²²A pa’ kiang a tunpihkik theih nadingin amau’ khutsung pan a hotkhiat theih nadingin Reuben in amaute’ kiangah, “Amah that kei un. Hih gamlak dum sungah amah lawn un. Ahih hangin amah bangmah cih kei un,” a ci hi.

²³Tua ahih ciangin, a sanggamte’ kiangah Josef hong tun ciangin, ama silh lai a puantualpi bansau a hawkkhiatsak uh hi.

²⁴Amaute in Josef la-in dum sung khatah a lawn uh hi. A dum pen a hawm hi a, a sungah tui om lo hi.

²⁵Tua ciangin amaute an ne dingin tu uh hi. A khuadak uhleh Gilead panin Ishmael mite a kalaohte uh tawh singnai, lingsi, le myrrh paknamtui pua-in Egypt-ah puaksuk dingin a pai mu uh hi.

²⁶Tua ciangin Judah in a sanggamte kiangah, “I sanggampa thatin amah i thahna im lehang bang meetna om ahi hiam?

²⁷Hong pai un, Ishmael mite kiangah amah zuak ni. Amah bangmah cih kei ni. Bang hang hiam cih leh amah i sanggampa, eima cilesa ahi hi,” a ci hi. A sanggamte in ama thu mang hi.

²⁸Tua ciangin Midian mi sumbawlte in hong nawk hi. Amaute in Josef kai to-in dum sung panin domkhia to uh a, Ishmael mite tungah ngun shekel sawmnihin amah zuak uh a, amaute in Egypt-ah Josef a paipih uh hi.

²⁹Reuben dumah paikikin dum sungah Josef a om lohna a muh ciangin amah in a puan balkek a,

³⁰a sanggamte kiangah ciahkikin, “Tangvalpa om nawn lo hi. Kei bangci ding ka hi hiam?” a ci hi.

³¹Tua ciangin amaute in Josef’ puan la-in, keel khat go uh a, a sisan sungah a puan diah uh hi.

³²Amaute in a puantualpi bansau a pa uh kiangah puak uh a, “Hih puan ka mu uh hi. Na tapa’ puan hi hiam, hi lo hiam tu-in thei in,” a ci uh hi.

³³Amah in Josef’ puan ahihlam thei a, “Ka tapa’ puan ahi hi. Gamsa khatpeuh in amah netum khinzo hi ding hi. Josef kibalnen gawp ahihna up loh nading om lo hi,” a ci hi.

³⁴Tua ciangin Jakob in ama puan balkekin, a kawngah puanhampi teng a, a tapa’ hangin ni tampi sung a kap hi.

³⁵A tapate le a tanute khempeuh in amah hehnem uh a, ahih hangin amah hehnep zawhin om lo a, “Hi lo hi. A kapsa-in ka tapa kiang Leinuai-ah ka pai ding hi,” a ci hi. Tua bangin ama hangin a pa kap hi.

³⁶Tua kikal sungin Midian mite in Egypt gam sunga inncing mang, Faro’ nuai-ah ulian ahi Potifar’ tungah Josef na zuak uh hi.