Read Tedim Chin PIANCILNA 38 Bible Online

PIANCILNA 38 - Tedim Chin bible

PIANCILNA 38

¹Tua hun laitakin Judah a sanggamte kiang panin paisukin, Adullam mi Hirah min nei mi khat tawh omkhawm hi.

²Tua lai-ah Judah in Kanaan mi Shua’ tanu mu hi. Amah in tua nu tenpihin luppih a,

³tua nu gai-in tapa khat nei a, amah in a min Er a phuak hi.

⁴Tua nu gai leuleu-in tapa khat nei a, tua nu in a min Onan a phuak hi.

⁵Tua nu in tapa khat nei leuleu-in a min Shelah a phuak hi. Tua nu in amah tawh Shelah a neih laitakin Khezib-ah amah a om hi.

⁶Judah in a tapa masa Er a dingin zi khat la a, tua nu’ min Tamar ahi hi.

⁷Ahih hangin Judah’ ta masa Er pen TOPA’ muhna-ah hoih lo a, TOPA in amah that hi.

⁸Tua ciangin Judah in Onan kiangah, “Na sanggampa’ zi tawh lumkhawm inla, tua nu’ tungah pasal’ sanggamte’ tavuan sem inla, na sanggampa a dingin ta nei in,” a ci hi.

⁹Ahih hangin Onan in tate pen ama a’ ahih loh ding thei hi. Tua ahih ciangin a sanggampa’ zi tawh a lupkhawm ciangin a sanggampa’ tungah ta pia kha ding ahih manin a natui leilakah buasak hi.

¹⁰Ama gamtatna TOPA’ muhna-ah lungkimhuai lo a, TOPA in amah zong a that hi.

¹¹Tua ciangin Judah in a monu Tamar’ tungah, “Ka tapa Shelah a gol mateng na pa’ inn-ah meigongnu-in va om in,” a ci hi. Bang hang hiam cih leh a sanggamte mah bangin amah zong si kha ding ci-in lau hi. Tua ahih ciangin Tamar pai-in a pa’ inn-ah a om hi.

¹²Tua hun sungin Judah’ zi, Shua’ tanu si hi. Judah a dahna hun a ven’ ciangin a lawm Hirah tawh Timnah-a ama tuumul a mette kiangah paito hi.

¹³“Na teekpa a tuute mul met dingin Timnah-ah paito hi,” ci-in Tamar’ kiangah a kigen ciangin,

¹⁴a meigong numei puan suahkhia-in, a kituamna silhin amah kituam a, Timnah paina lampi gei-a Enaim paina munah na tu hi. Bang hang hiam cih leh Shelah a khang cing khin ahihna amah in thei a, ahi zongin amah tawh kitengsak nai lo hi.

¹⁵Judah in tua nu a muh ciangin amah in a mai tuam ahih manin numei paktat dingin ngaihsun hi.

¹⁶Lampi gei-a tua nu’ kiangah amah pai a, “Hong pai in, lumkhawm ni,” a ci hi. Bang hang hiam cih leh tua nu pen a monu ahihlam thei lo hi. Tua nu in, “I lupkhop man dingin kei bang hong pia ding na hi hiam?” a ci hi.

¹⁷Amah in dawngin, “Keelhon panin keelno khat hong puak ning,” a ci hi. Tua nu in, “Nong puak mateng khapna khat nong pia ding hiam?” a ci hi.

¹⁸Amah in, “Bang khapna nang hong pia ding ka hi hiam?” a ci hi. Tua nu in dawngin, “Na min gelhna le na khauhual le na khutsunga om na ciangkhut,” a ci hi. Tua ahih ciangin amah in tua nu tungah tuate pia-in, amah luppih a, amah tawh tua nu a gai hi.

¹⁹Tua ciangin amah dingin paikhia a, a kikhuhna puan suahkhia-in meigong numei ahihna puan a silh hi.

²⁰Numei’ khutsung panin a khapna a lakik dingin Judah in Adullam mi a lawmpa a ganno tawh a sawl ciangin, amah in tua nu mu zo lo hi.

²¹Amah in tua lai mun mite dong a, “Lam gei Enaim a om numei paktat nu koi-ah om ahi hiam?” a ci hi. Amaute in, “Hih lai-ah numei paktat om ngei lo hi,” na ci uh hi.

²²Tua ahih ciangin Judah kiangah amah ciahkikin, “Amah ka mu kei hi. Tua lai mun mite in, ‘Hih lai-ah numei paktat om ngei lo hi,’ zong hong ci uh hi,” a ci hi.

²³Judah in dawngin, “Eite hong kinuihsan kha ding ahih ciangin a nate ama a dingin kem mai hen. Hih ganno ka puak a, nang in tua nu na muh lohna na thei hi,” a ci hi.

²⁴Tua zawh kha thum ciangin Judah tungah, “Na monu Tamar paktatin gamta hi. Tua tham loin paktatna tawh naupaii hi,” ci-in kigen hi. Judah in, “Amah paikhiatpih un; amah kihaltum hen,” a ci hi.

²⁵Amah a kipaikhiatpih laitakin amah in a teekpa kiangah kam khak a, “Hih nate a nei pa tawh nau ka nei hi,” a ci hi. Tua nu in, “Ciamteh in, hong thum ing, min gelhna le khauhual le ciangkhut, hih nate kua-a’ ahi hiam?” a ci hi.

²⁶Tua ciangin Judah in tua nate thei a, “Ka tapa Shelah tawh gawm lo ka hih ciangin, tua numei, kei sangin thuman zaw hi,” a ci hi. Tua nu tawh amah lumkhawm kik nawn lo hi.

²⁷Tua nu a suah hun a tun ciangin a naubu sungah nih om hi.

²⁸Nausuak dingin a nat ciangin, khat in a khut dawksak hi. Naudom nu in khausan khat la-in a khut tungah khih a, “Hih pen hong pai masa,” ci pah hi.

²⁹Ahih hangin a khut a dawh tum kik laitakin, en in, a sanggampa hong suakkhia hi. Amah in, “Nang a dingin a vang nangmahmah in bawltawm!” a ci hi. Tua ahih ciangin ama min Perez kiphuak hi.

³⁰Tua khit ciangin a khut tunga khausan tawh a sanggampa hong suakkhia a, ama min Zerah kiphuak hi.