Read Tedim Chin PIANCILNA 40 Bible Online

PIANCILNA 40 - Tedim Chin bible

PIANCILNA 40

¹Tua zawh tawlkhat khit ciangin, Egypt kumpipa’ an piapa le a anhuan pa in Egypt kumpipa ahi amau’ topa hehsak uh hi.

²An piapi pa le anhuan pipa ahi, ama nuai-a mangte nih tungah Faro heh a,

³Josef a kikhumna thong sung, inncing mangpa’ inn sungah amah in amaute a koih hi.

⁴Inncing mangpa in amaute Josef kemsak a, amah in amaute’ na sem hi. Kikhumna sungah amaute tawlkhat om uh hi.

⁵Zan khat amau tegel in mang man uh hi. Thong sunga a om an piapa le anhuan pa, amau’ mang a tuam tuak, a mang khiatna zong a tuam tuak mah ahi hi.

⁶Zingsang ciangin amaute kiangah Josef pai-in amaute a muh ciangin, amaute na lungkham uh hi.

⁷Tua ahih ciangin a topa’ inn sunga amah tawh a kikhumin a om Faro’ nuai-a mangte amah in dong a, “Bang hangin tuni-in maimial na hi uh hiam?” a ci hi.

⁸Amaute in ama kiangah, “Mang ka man uh a, tuate a khiathei ding om lo hi,” na ci uh hi. Josef in amaute kiangah, “Mang khiat theihnate Pasian’ hong piak hi lo ahi hiam? Kei kiangah hong gen un, hong thum ing,” a ci hi.

⁹Tua ahih ciangin an piapi pa in Josef kiangah a mang gen a, “Ka mangin ka mai-ah leenggui khat om a,

¹⁰tua leenggui tungah hiang thum om hi. A sel phetin pakkhia pah a, a bomte leenggah suakin min pah hi.

¹¹Ka khut sungah Faro’ hai ka tawi hi. Keimah in leenggahte loin Faro’ hai sungah ka suk a, Faro’ khut tungah a hai ka pia hi,” a ci hi.

¹²Tua ciangin Josef in ama kiangah, “A khiatna hih bang ahi hi. Hiang thumte, ni thum ahi hi.

¹³Ni thum sungin Faro in nang hong khah ding a, na za-ah nang hong koih kik ding hi. Ama an piapa na hih lai-a mah bangin ama khut tungah Faro’ hai na pia ding hi.

¹⁴Ahih hangin kei hong phawk in. Nang tungah thu hong hoih ciangin kei tungah hehpihna hong bawl in, kong thum hi. Faro’ tungah kei’ thu genin, hih inn panin kei hong lakhia in.

¹⁵Bang hang hiam cih leh Hebru mite’ gam panin kei hong kigukhia a, hih lai-ah zong amaute in thong mial sungah kei hong koih nadingin bangmah ka gamta kei hi,” a ci hi.

¹⁶An huanpipa in a khiatna a hoihlam hi, ci-in a muh ciangin, amah in Josef kiangah, “Kei zong mang khat ka man hi: Ka lu tungah mohlawh thum om a,

¹⁷a lawh tungnung pen sungah an huansa namkim Faro a dingin om hi. Ahih hangin ka lu tunga lawh sung panin vasate in ne uh hi,” a ci hi.

¹⁸Josef in dawngin, “A khiatna hih bang ahi hi: Lawh thumte, ni thum ahi hi.

¹⁹Ni thum sungin Faro in nang hong lakhia-in na lu hong tan ding a, sing tung khatah nang hong khai ding hi. Vasate in na sa ne ding uh hi,” a ci hi.

²⁰A ni thum ni, Faro’ suah ni hunin, amah in a nasemte khempeuh a dingin pawi khat kham a, an piapi pa le an huanpipa lakhia hi.

²¹Amah in an piapi pa an piak nasepah koihkik a, amah in Faro’ khut sungah a hai pia hi.

²²Ahih hangin Josef’ khiat mah bangin an huanpipa a khailum hi.

²³Ahi zongin an piapi pa in Josef phawk nawn lo a, amah mangngilh ta hi.