Read Tedim Chin PIANCILNA 41 Bible Online

PIANCILNA 41 - Tedim Chin bible

PIANCILNA 41

¹Tua zawh kum nih bit khit ciangin Faro in mang man a, amah Nail gun gei-ah ding hi.

²Nail gun sung panin bawngpi a zol a thau sagih hong paikhia a, amaute in phai lopate ne uh hi.

³Amaute’ khit ciangin Nail gun sung pan mahin a gulhgawng a gawng bawngpi dang sagih hong paikhia a, Nail gun gei-a bawngpi dangte kiangah ding uh hi.

⁴Tua ciangin a gulhgawng bawngpi gawng sagihte in a zol a thau bawngpi sagihte netum uh hi. Tua ciangin Faro khang lo hi.

⁵Tua ciangin ihmu-in a nih veina mang man hi. A taksa a hoih buhvui sagih kung khat tungah vui hi.

⁶Tuate’ khit ciangin nisuahna huih in a theemsak a hawm vui sagih hong pokhia hi.

⁷A vui hawmte in a taksa a dim vui sagihte valhtum uh hi. Tua ciangin Faro khang lo a, tua pen a mang na hi hi.

⁸Tua ahih ciangin zingsangin a lungkham hi. Amah in mi sawlin Egypt mitphial siamte khempeuh le a mipil khempeuh samsak hi. Faro in amaute’ kiangah a mang gen a, ahih hangin Faro’ tungah a khiatna a gen thei kuamah om lo hi.

⁹Tua ciangin an piapi pa in Faro’ kiangah, “Tuni-in ka khialhnate ka phawkkik hi.

¹⁰Faro, ama nasemte tungah heh a, kei le an huanpipa, inncing mangpa’ inn sungah hong khum lai-in

¹¹amah le keimah in zan khat sungin mang ka man uh a, a mangte in a khiatna tuam ciat nei hi.

¹²Inncing mangpa’ nasem ahi Hebru mi tangval khat tua lai-ah kote tawh om hi. Ama kiangah ka gen uh ciangin, amah in ka mangte uh hong khiatsak a, ka mang uh tawh a kizui tuakin a khiatna hong gen hi.

¹³Amah in kote tungah a khiatna hong gen bangin hong tung hi. Kei pen ka za-ah hong kikoih kik a, anhuan pa kikhailum hi,” a ci hi.

¹⁴Tua ciangin Faro in mi sawlin Josef samsak a, amaute in manlang takin thongmial sung panin amah a paikhiatpih uh hi. Amah in a mul kiatin a puan a khek khit ciangin, Faro’ mai-ah hong pai hi.

¹⁵Faro in Josef kiangah, “Mang khat ka man a, a khiatna a gen thei kuamah om lo hi. Nang in mang na zak ciangin a khiatna gen thei, ci-in hong kigenna ka za hi,” a ci hi.

¹⁶Josef in Faro dawngin, “Kei’ pilna tawh mang a khiathei ka hi kei hi. Pasian in Faro’ tungah a hoihlamin dawnna hong pia ding hi,” a ci hi.

¹⁷Tua ciangin Faro in Josef kiangah, “Ka mangin Nail gun gei-ah ka ding hi.

¹⁸A thau a zol bawngpi sagih Nail gun panin hong paikhia a, phai lopate ne uh hi.

¹⁹Tuate’ khit ciangin a hehpihhuai a gulhgawng, Egypt gam sung khempeuhah tua bang ka muh ngei loh bawngpi dang sagih hong pai hi.

²⁰A gawng a gulhgawng bawngpite in a masa a thau bawngpi sagihte netum uh hi.

²¹Ahih hangin amaute in tuate a nek khit uh ciangin, a nek khitlam uh kuamah in thei lo hi. Bang hang hiam cih leh amaute pen a tunga mah bangin gulhgawng lai veve uh hi. Tua ciangin ka khang lo hi.

²²Tua ciangin ka mang mahin kung khat tungah a dim a hoih buhvui sagih a vuikhia zong ka mu hi.

²³Tuate’ khit ciangin nisuahna huihpi in a keusak a hawm, a theem vui sagih hong po a,

²⁴a vui hawmte in a vui hoih sagihte valhtum uh hi. Mitphial siamte kiangah ka gen a, ahih hangin kei kiangah hong gentel thei khat beek om lo hi,” a ci hi.

²⁵Tua ciangin Josef in Faro’ kiangah, “Faro’ mang tegel pen khat ahi hi. Pasian in ama bawl ding, Faro’ tungah hong kilangsak khin hi.

²⁶A hoih bawngpi sagihte, kum sagih hi a, a hoih buhvui sagihte zong kum sagih mah ahi hi. A mang khiatna a kibang ahi hi.

²⁷Tuate’ khit ciangin a hong paikhia, a gawng a gulhgawng bawngpi sagihte, kum sagih hi a, nisuahna huihpi in a theemsak buhvui sagihte zong kialpi kum sagih mah ahi hi.

²⁸Faro’ kianga kong gen bangin Pasian in ama hih ding, Faro’ tungah hong lak khin ahi hi.

²⁹Egypt gam sung khempeuhah kum sagih sung hauhna hong tung ding a,

³⁰ahih hangin tua khit ciangin kialpi kum sagih sung hong tungin, hauhna ngeisa khempeuh Egypt gam sungah kimangngilh ding hi. Kialpi in gam sung netum ding a,

³¹nasia mahmah ding ahih manin, tua hong tung ding kialpi’ huhau-in gam sungah hauhna kithei lo ding hi.

³²Faro’ mang nih a phakna pen tua thu Pasian’ sehsa hi, a cihnopna hi a, Pasian in tomno sungin hong tungsak ding hi.

³³Tua ahih ciangin tu-in Faro in thu ngaihsun siam mipil khat tengkhia inla, Egypt gam sung a uk dingin amah koih in.

³⁴Faro in gam sungah vaihawm ulian seh inla, a kihauh kum sagih sungin Egypt gam leitang pana piang sung panin nga-ah khat la in.

³⁵Hong tung ding kum hoih sunga an khempeuh amaute khawmsak inla, khuapite sungah an nek dingin Faro’ ukna nuai-ah antangte kholin, amaute kemsak in.

³⁶Kialpi hangin gam sung a siatloh nadingin Egypt gam sungah a hong tung ding kum sagih kialpi dal nadingin a kikoihcing an hi ding hi,” a ci hi.

³⁷Hih a thugen pen Faro le a nasemte khempeuh in hoihsa uh hi.

³⁸Faro in a nasemte kiangah, “Ama sungah Pasian Kha a omna, hih bang midang mu ding ihi hiam?” a ci hi.

³⁹Tua ahih ciangin Faro in Josef kiangah, “Pasian in hihte khempeuh nang hong lak khin ahih manin, nang bangin thu ngaihsun siam le a pil midang om lo hi.

⁴⁰Nang pen ka inn sungah ulian na hi ding a, nangma thupiak bangin ka mite khempeuh gamta ding uh hi. Kumpi tokhom tawh kisai-in kei pen nang sangin ka lian zaw ding hi,” a ci hi.

⁴¹Faro in Josef’ kiangah, “Egypt gam khempeuh a uk dingin nang kong koih khinzo hi,” a ci hi.

⁴²Tua ciangin Faro in a min gelhna zungbuh ama khut tung panin suahkhia-in Josef’ khutah bulh a, puan hoih mahmah tawh amah zemin, a ngawngah kham khainiang khat oksak hi.

⁴³Ama leeng nihna tungah Josef tuangsak a, ama mai-ah uliante kiko a, “Khukdin’ un!” ci hi. Tua ahih ciangin Egypt gam khempeuh a ukin amah koih hi.

⁴⁴Tua tham loin Faro in Josef kiangah, “Kei pen Faro ka hi hi. Nangma thukim lohin Egypt gam sung khempeuhah kuamah in a khut a khe nangawn uh liik lo ding uh hi,” a ci hi.

⁴⁵Faro in Josef’ min Zafenath-paneah a phuak hi. Amah in On khua siampipa Potifera’ tanu Asenath tawh kitengsak hi. Tua ahih ciangin Egypt gam sungah Josef zin kawikawi hi.

⁴⁶Egypt kumpipa Faro’ nasemin a tum hunin Josef kum sawmthum pha hi. Faro’ omna panin Josef paikhia a, Egypt gam sung khempeuhah zin hi.

⁴⁷A kihauh kum sagih sungin leitang in tampi piangsak a,

⁴⁸Egypt gamah tampi a om laitakin amah in tua kum sagih sunga ante khempeuh khawm a, khuapite sungah an khol hi. A kiima lote panin khuapi simah amah in an khol hi.

⁴⁹A teh ding a khawl dong zahin Josef in tuipi gei sehnel zahin antang tampi khol hi. Bang hang hiam cih leh kiteh khin zo lo hi.

⁵⁰Kialpi kum hong tun ma-in Josef in On khua siampipa Potifera’ tanu Asenath tawh tapa nih nei hi.

⁵¹Josef in a ta masa Manasseh a phuak hi. Amah in, “Pasian in ka haksatna khempeuh le ka pa’ innkuan khempeuh a mangngilhin hong bawl hi,” ci hi.

⁵²A nihna pen amah in Efraim a phuak hi. “Ka thuakna gam sungah kei a pungin hong bawl hi,” ci hi.

⁵³Egypt gam sunga a om kum sagih sung hauhna hun bei ta hi.

⁵⁴Josef’ gensa bangin kum sagih kialpi hong kipan hi. Gamdang khempeuhah kialpi tung a, ahih hangin Egypt gam sung tengah an om hi.

⁵⁵Egypt gam khempeuh a kial ciangin, an ngenin mite Faro’ tungah kiko uh hi. Faro in Egypt mite khempeuh tungah, “Josef’ kiangah pai un. Note’ tunga ama hong cih bangin gamta un,” a ci hi.

⁵⁶Tua ahih ciangin gam khempeuhah kialpi a tunkim ciangin Josef in ankholna innte khempeuh hongin, Egypt mite tungah a zuak hi. Bang hang hiam cih leh Egypt gamah kialpi nasia mahmah hi.

⁵⁷Tua tham loin, leitung khempeuhah kialpi nasia ahih manin, antang lei dingin Josef’ kiangah leitung mi khempeuh hong pai uh hi.