Read Tedim Chin PIANCILNA 45 Bible Online

PIANCILNA 45 - Tedim Chin bible

PIANCILNA 45

¹Tua ciangin ama kianga dingte khempeuh’ mai-ah Josef ki-ipzo nawn lo a, “Ka kiang panin mi khempeuh paikhia un,” ci-in a kiko hi. Tua ahih manin Josef a sanggamte tungah amah a kipulak ciangin kuamah dang om lo hi.

²Amah a gingin kapkhia ahih manin Egypt mite in za a, Faro’ innkuante in zong za uh hi.

³Josef in a sanggamte kiangah, “Kei, Josef ka hi hi. I pa a nungta lai hiam?” a ci hi. Ahih hangin a sanggamte maizum uh ahih manin amah dawng thei lo uh hi.

⁴Tua ahih ciangin Josef in a sanggamte kiangah, “Ka nai-ah hong pai un, hong thum ing,” a ci hi. Amaute a nai-ah hong pai uh hi. Amah in, “Kei pen Egypt-ah nong zuak uh na sanggampa uh Josef ka hi hi.

⁵Hih lai-ah kei nong zuak manun tu-in lungkham kei un. Nomau tungah kiheh tawm kei un. Bang hang hiam cih leh nuntakna a hu dingin note’ mai-ah Pasian in kei hong sawl hi.

⁶Bang hang hiam cih leh gam sungah kum nih sung kialpi tungzo hi. Lo khawh loh, an lak loh ding kum nga omlai hi.

⁷Note a dingin leitungah a omlai mi a hingsak ding le note a dingin a suakta mi tampi a kem dingin note’ mai-ah Pasian in kei hong sawl hi.

⁸Tua ahih ciangin hih lai-ah a hong sawl mi pen note na hi kei uh a, Pasian ahi hi. Amah in Faro’ khutnuai-ah a ulian penin kei hong bawlin, ama innsung khempeuh’ topa le Egypt gam khempeuh a ukpa-in kei hong bawlkhin hi.

⁹“Manlangin i pa kiangah va ciahto unla ama kiangah, ‘Na tapa Josef in hih bangin ci hi: Pasian in Egypt gam khempeuh’ topa-in kei hong bawl khin hi. Ka kiangah hong paisuk hen, zekai kei hen.

¹⁰Goshen leitangah na teng ding a, nang le na tate’ tate le na tuuhonte le na bawnghonte le na neih khempeuh tawh, nang pen kei tawh a kinai-in na om ding hi.

¹¹Hong tung ding kialpi kum nga omlai ahih manin tua lai-ah nang kong vak ding hi. Tua hi kei le nang le na innkuanpihte le na neih khempeuh in zawnna na ngah ding uh hi, ci hi,’ va ci un.

¹²“Note’ kianga thu hong gen pen keima kam ahihna tu-in note’ mitin nong mu uh a, ka sanggampa Benjamin’ mit in zong hong mu hi.

¹³Egypt-ah keima liatna khempeuh le note’ muhsa khempeuh, i pa’ kiangah na gen ding uh hi. Manlang unla, hih lai-ah i pa hong paisukpih un,” a ci hi.

¹⁴Tua ciangin a sanggampa Benjamin ngawng kawi-in a kap hi. Benjamin in zong amah ngawng kawi-in a kap hi.

¹⁵Tua ciangin a kah kawmin a sanggamte khempeuh ngawng kawi-in a nam hi. Tua khit ciangin a sanggamte in amah hopih uh hi.

¹⁶“Josef’ sanggamte hong pai,” cihna thu Faro’ inn sungah a kizak ciangin, tua thu in Faro le a nasemte lungdamsak mahmah hi.

¹⁷Faro in Josef kiangah, “Na sanggamte kiangah, ‘Hih bangin gamta un: Na ganhingte uh van suan unla, Kanaan gamah ciahkik un.

¹⁸I pa le na innkuanpihte uh va la unla, kei kiangah hong pai un. Egypt gam a hoihpen mun note kong pia ding a, note in gam hoih sunga piangte na ne ding uh hi,’ ci in.

¹⁹Amaute zong thu pia inla, ‘Hih bangin gamta un: Na tate le na zite uh a dingin Egypt panin leeng la unla, i pa hong paipih un.

²⁰Egypt gam khempeuh a hoih penna nomau-a’ ahih ciangin na vante uh ngaihsutin nei kei un,’ ci in,” a ci hi.

²¹Israel’ tapate tua bangmahin gamta uh hi. Josef in Faro’ thupiak mah bangin amaute leeng pia a, lampi-a a nek ding uh an zong a pia hi.

²²Amah in amaute khempeuh tungah puan hoih silh khat ciat a pia hi. Ahih hangin Benjamin’ tungah ngun shekel zathum le puan hoih silh nga a pia hi.

²³Amah in a pa kiangah a nuai-ate a khak hi: Egypt na hoihte a pua la sawm; antang, anlum, le lampi-a a pa’ nek ding an a pua lapi sawm a puak hi.

²⁴Tua ciangin amah in a sanggamte sawlkhia a, amaute a paikhiat ciangin amah in amaute kiangah, “Lampi-ah kitawng kei un,” a ci hi.

²⁵Tua ahih ciangin amaute Egypt panin paito uh a, a pa uh Jakob kiang Kanaan gamah ciah uh hi.

²⁶Amaute in ama kiangah, “Josef nungta lai a, amah pen Egypt gam khempeuh a ukpa na hi hi,” hong ci uh hi. Amah in amaute’ thugen um lo ahih ciangin a lung si hi.

²⁷Ahih hangin amaute’ tunga Josef’ gen kammalte ama kiangah a gen ciang leh Josef in amah puak nadinga a khak leengte a muh ciangin, a pa uh Jakob’ lungsim hingkik hi.

²⁸Israel in, “Phazo hi. Ka tapa Josef nungta lai hi. Ka sih ma-in pai-in amah ka mu ding hi,” a ci hi.