Read Tedim Chin PIANCILNA 46 Bible Online

PIANCILNA 46 - Tedim Chin bible

PIANCILNA 46

¹Tua ahih ciangin Israel, a neih khempeuh tawh a khualzin kipanin Beersheba tung a, a pa Isaac’ Pasian tungah biakpiakna a bawl hi.

²Pasian in Israel tungah zanin thu gen a, “Jakob, Jakob,” ci hi. Amah in, “Hiah om ing,” ci hi.

³Tua ciangin amah in, “Kei pen na pa’ Pasian ahi, Pasian ka hi hi. Egypt-ah paisuk ding lau kei in. Bang hang hiam cih leh minam lian khatin tua lai-ah nang kong bawl ding hi.

⁴Egypt-ah nang tawh kong paisuk ding a, tua ciangin zong keimah in nang kong paipihto kik ding hi. Josef’ khut sungah na si ding hi,” a ci hi.

⁵Tua ciangin Beersheba panin Jakob ding khia hi. Israel’ tapate in a pa uh Jakob, a tate uh, le a zite uh, amah puak nadinga Faro in a khak leeng sungah a pua uh hi.

⁶Amaute in zong Kanaan gam sunga a lam uh a ganhingte uh le a nate uh la-in, Jakob le ama suanlekhakte ahi,

⁷a tapate, ama tapate’ tapate, a tanute, a tapate’ tanute tawh Egypt-ah a pai uh hi. Amah in a suanlekhakte khempeuh Egypt-ah a paipih hi.

⁸Tu-in hihte pen Israel’ suanlekhak, Egypt-ah a pai Jakob le a tate’ min ahi hi. Jakob’ ta u pen Reuben

⁹le Reuben’ tapate: Hanok, Pallu, Hezron, le Karmi ahi hi.

¹⁰Simeon’ tapate: Jemuel, Jamin, Ohad, Jakhin, Zohar, le Kanaan numei’ tapa Shaul ahi hi.

¹¹Levi’ tapate: Gershon, Kohath, le Merari ahi hi.

¹²Judah’ tapate: Er, Onan, Shelah, Perez, le Zerah ahi hi. (Ahih hangin Er le Onan Kanaan gamah si hi.) Perez’ tapate: Hezron le Hamul ahi hi.

¹³Issakhar’ tapate: Tola, Puvah, Job, le Shimron ahi hi.

¹⁴Zebulun’ tapate: Sered, Elon, le Jahleel ahi hi.

¹⁵(Hihte pen Paddanaram-ah Leah tawh a neih Jakob’ suante hi a, a tanu Dinah tawh zong ahi hi. Numei le pasal a vekpi-in sawmthum le thum ahi hi.)

¹⁶Gad’ tapate: Zifion, Haggi, Shuni, Ezbon, Eri, Arodi, le Areli ahi hi.

¹⁷Asher’ tapate: Imnah, Ishvah, Ishvi, Beriah, le a sanggamnu uh Serah ahi hi. Beriah’ tapate: Heber le Malkhiel ahi hi.

¹⁸(Hihte pen Laban in a tanu Leah tungah a piak Zilpah’ tapate ahi hi. Amah in Jakob tawh hihte nei a, mi sawm le guk ahi hi.)

¹⁹Jakob’ zi Rachel’ tapate: Josef le Benjamin ahi hi.

²⁰Josef in Egypt gamah On khua siampipa Potifera’ tanu Asenath tawh Manasseh le Efraim nei hi.

²¹Benjamin’ tapate: Bela, Bekher, Ashbel, Gera, Naaman, Ehi, Rosh, Muppim, Huppim, le Ard ahi hi.

²²(Hihte pen Rachel tawh a neih Jakob’ suante hi a, a vekpi-in mi sawm le li ahi hi.)

²³Dan’ tapa Hushim ahi hi.

²⁴Naftali’ tapate: Jahzeel, Guni, Jezer, le Shillem ahi hi.

²⁵(Hihte pen Laban in a tanu Rachel’ tungah a piak Bilhah in Jakob tawh a neih tapate hi a, a vekpi-in mi sagih ahi hi.)

²⁶Egypt gamah a pai Jakob-a’ ahi ama suanlekhak, Jakob’ tate’ zite a kisim loin, a vekpi-in mi sawmguk le guk ahi hi.

²⁷Josef in Egypt gamah a neih a tapate nih ahi hi. Egypt gamah a pai Jakob’ innkuan khempeuh sawmsagih ahi hi.

²⁸Jakob in ama mai Goshen-ah amah lam a lak dingin Josef kiangah Judah ma sawl hi. Amaute Goshen gamah hong pai uh hi.

²⁹Tua ciangin Josef in a leengte kithawisakin Goshen-ah a pa Israel a dawn dingin a paito hi. A pa a muh phetin ngawng kawi-in tawlkhat sung a kap hi.

³⁰Israel in Josef kiangah, “Na maitang mu khinin nang na nuntak lai thei ka hih manin tu-in ka si zongin phamawh nawn lo hi,” a ci hi.

³¹Josef in a sanggamte le a pa’ innkuanpihte kiangah, “Kei paito-in Faro’ kiangah ka va gen ding a, ama tungah, ‘Kanaan gam a om ka sanggamte le ka pa’ innkuanpihte kei kiangah hong pai hi.

³²Amaute pen tuucing ahih manin gan kemte ahi uh hi. Amaute in a tuuhonte uh le a bawnghonte uh le a neih khempeuh uh hong paipih uh hi,’ ka va ci ding hi.

³³Faro in note hong samin note kiangah, ‘Na nasep uh bang ahi hiam?’ hong cih ciangin,

³⁴Goshen leitangah na ten theih nadingun note in, ‘Kote hitaleh ka pate uh hitaleh ko na nasemte pen ka neu lai uh a kipan tuhun dongin gankemte ka hi uh hi,’ na ci ding uh hi. Bang hang hiam cih leh Egypt mite a dingin tuucing peuhmah a kihhuai ahi hi,” a ci hi.