Read Tedim Chin PIANCILNA 47 Bible Online

PIANCILNA 47 - Tedim Chin bible

PIANCILNA 47

¹Tua ahih ciangin Josef pai-in Faro’ kiangah, “Ka pa le ka sanggamte a tuuhon uh le a bawnghon uh le a neih khempeuh uh tawh Kanaan gam panin hong pai uh a, amaute tu-in Goshen gamah om uh hi,” ci-in a gen hi.

²A sanggamte’ lak panin amah in mi nga la-in Faro’ kiangah va paipih hi.

³Faro in a sanggamte kiangah, “Na nasep uh bang ahi hiam?” a ci hi. Amaute in Faro’ kiangah, “Ka pate uh mah bangin na nasem kote pen gankemte ka hi uh hi,” a ci uh hi.

⁴Amaute in Faro kiangah, “Hih gamah tawlkhat a om dingin kong pai uh hi. Bang hang hiam cih leh Kanaan gamah kialpi nasia lua ahih manin tua lai-ah na nasemte’ tuuhonte a’ ding lonona om nawn lo hi. Tu-in kong thum uh hi. Goshen gamah na nasemte hong tengsak in,” a ci uh hi.

⁵Tua ciangin Faro in Josef kiangah, “Na pa le na sanggamte na kiangah hong tung khin hi.

⁶Egypt leitang khempeuh nangma thu ahi hi. Na pa le na sanggamte lei hoihna penah tengsak in. Goshen leitangah amaute tengsak in. Amaute’ lakah a hih thei mi na muh leh ka ganhingte a kem dingin koih in,” a ci hi.

⁷Tua ciangin Josef in a pa Jakob tumpihin Faro’ mai-ah koih a, Jakob in Faro thupha a pia hi.

⁸Faro in Jakob kiangah, “Na nuntak kum bangzah pha ta ahi hiam?” a ci hi.

⁹Jakob in Faro kiangah, “Tawlkhat sung ka nuntak hun pen kum za le kum sawmthum ahi hi. Ka nuntak hun tom sungah siatna bekbek om a, ka pate tawlkhat a omsung uh a nuntak hunte ban nai lo hi,” a ci hi.

¹⁰Jakob in Faro thupha pia-in tua lai panin a paikhia hi.

¹¹Tua ciangin Faro’ thupiaksa bangin Josef in leitang a hoihpen, Rameses leitang, Egypt gam sungah neihsa pia-in a pa le a sanggamte a tengsak hi.

¹²Josef in a pa, a sanggamte, le a pa’ innkuante khempeuh a ne ding zah tawh kizui-in an a pia hi.

¹³Tu-in kialpi nasia mahmah ahih manin gam khempeuhah an om nawn lo a, kialpi hangin Egypt mite le Kanaan mite vulgawp uh hi.

¹⁴Amaute in antang a leina hangin, Egypt gam sung le Kanaan gam sunga sum khempeuh Josef in ngah khin hi. Josef in Faro’ inn-ah tua sumte paipih hi.

¹⁵Egypt gam sung le Kanaan gam sunga sum a bei khit ciangin Egypt mite khempeuh Josef kiangah hong pai-in, “Kote an hong pia in. Bang hangin na muhna-ah si ding ka hi uh hiam? Bang hang hiam cih leh ka sum uh beita hi,” a ci uh hi.

¹⁶Josef in dawngin, “Na ganhingte uh hong pia un. Na sum uh bei ahihleh na ganhingte uh khekna-in an kong pia ding hi,” a ci hi.

¹⁷Tua ahih ciangin amaute in Josef kiangah a ganhingte uh paipih uh hi. Josef in sakolte, tuuhonte, bawnghonte, le late a khekna-in amaute an a pia hi. A ganhingte uh khekna-in Josef in tua kum sung amaute an a pia hi.

¹⁸Tua kum a bei, a kum kik ciangin amaute Josef kiangah hong pai-in, “Ka sum uh a bei khitna ka topa uh tungah kong im kei ding uh hi. Ganhing honte ka topa a’ ahi hi. Ka pumpi uh le ka leitang uh cih simloh ka topa’ muhna-ah bangmah dang om nawn lo hi.

¹⁹Bang hangin kote si-in ka leitang uh nangma muhna-ah maimawk ding ahi hiam? Kote le ka leitang uh an tawh hong lei in. Kote, Faro’ sila ka hi ding uh a, ka leitang uh zong ama a’ hi ding hi. Leitang mawkval loin, kote si loin ka hin theih nadingun khaici hong pia in,” a ci uh hi.

²⁰Tua ahih ciangin Josef in Egypt gam khempeuh Faro a dingin a lei hi. Kialpi nasia lua ahih manin Egypt mi khempeuh in a lote uh a zuak uh hi. Leitang khempeuh Faro-a’ suak khin hi.

²¹Mihingte ahihleh, Egypt mongkhat panin a mongkhat dongin amah in sila-in bawl hi.

²²Siampite’ leitang bek amah in lei lo hi. Bang hang hiam cih leh siampite in Faro’ tung panin a kiciangtan zah an ngah uh a, amaute tungah Faro in a piak tawh amaute nungtazo uh ahih ciangin amaute in a leitang uh zuak lo uh hi.

²³Tua ciangin Josef in mite kiangah, “En un, tuni-in note le na leitang uh Faro a dingin kong lei hi. Tu-in hih lai-ah no a dingin khaici om a, note in leitang tungah na vawh ding uh hi.

²⁴Anlak ciangin Faro’ tungah nga-ah khat na pia ding uh a, nga-ah li pen lo-ah khaici ding, note le na innkuanpihte uh le na tate uh’ an dingin na tang ding uh hi,” a ci hi.

²⁵Amaute in, “Nang in ka nuntakna uh nong honkhia khinzo hi. Ka topa uh lungdam hen; kote pen Faro’ sila ka hi ding uh hi,” a ci uh hi.

²⁶Tua ahih ciangin Faro in nga-ah khat nei ding hi cihna, tuni donga a om, Egypt leitang tawh kisai-in Josef in ngeina kip khatin a bawl hi. Siampite’ leitang bek Faro-a’ suak lo hi.

²⁷Tua ahih ciangin Egypt gam sung Goshen leitangah Israel-te teng uh hi. Tua lai-ah amaute in neihsa ngah uh a, pungin tampi tak pha uh hi.

²⁸Egypt gamah Jakob kum sawm le sagih nungta lai ahih manin ama khan kum za le kum sawmli le sagih ahi hi.

²⁹Israel a sih ding hun a nai ciangin, amah in a tapa Josef samin ama kiangah, “Tu-in na muhna-ah maipha ka ngah leh, ka phei nuai-ah na khut hong koih inla, thumantak le citakin kei nong bawl ding thu hong ciam in. Egypt-ah kei hong vui kei inla,

³⁰ka pate tawh hong sial khawm in. Egypt panin kei hong puakhia in la, amau’ kivuina munah kei hong vui in,” a ci hi. Amah in dawngin, “Na gen bangin ka gamta ding hi,” a ci hi.

³¹Amah in, “Kei’ tungah hong kiciam in,” a ci hi. Amah zong a pa’ tungah a kiciam hi. Tua ciangin Israel lungdamin a lupna lukhungah amahmah a kunsuk hi.