Read Tedim Chin PIANCILNA 49 Bible Online

PIANCILNA 49 - Tedim Chin bible

PIANCILNA 49

¹Tua ciangin Jakob in a tapate sam a, “A hong tung ding hunte-ah note’ tunga hong tung ding thu kong gen theih nadingin note hong kikhawm un.

²“Jakob’ tapate aw, hong kikhawmin za unla, na pa Israel’ thugen ngai un.

³“Reuben, nang pen ka ta upa, ka vangliatna le ka tacil na hi a, a kiphasak pen, a vanglian pen na hi hi.

⁴Tuihual bangin na kip kei ding a, na tungtuang kei ding hi. Bang hang hiam cih leh ka zi na luppih a, ka lupna na mindaisak hi.

⁵“Simeon le Levi, unau hi a, a hiam uh ngongtat nadingin a zang uh hi.

⁶Amau’ kikhopna-ah ka kihel kei ding a, amau’ pawl tawh ka kizom kei ding hi. Bang hang hiam cih leh a heh manun mi that uh a, kiphatsakna lungsim tawh amaute in mawlpih dingin bawngtalte’ zagui a sattat uh hi.

⁷Amau’ sinsona lauhuai a, amau’ hehna kihtakhuai hi. Samsiatna ngah ta uh hen! Jakob suante sungah amaute ka khenthang ding a, Israel sungah amaute ka thehthang ding hi.

⁸“Judah aw, na sanggamte in nang hong phat ding hi. Na galte’ gawl na meek ding a, na sanggamte na mai-ah hong kun ding uh hi.

⁹Judah pen humpinelkai tawh kibang a, a sa matsa a nek khit ciangin a kua-ah a ciahkik tawh kibang hi. Humpinelkai bangin kizia-in a lumsuk hi. Kua in amah phawng ngam ding hiam?

¹⁰Judah in kumpi ciangkhut len tawntung ding a, a suan a khakte in zong ukna aana nei tawntung ding hi. Minam dangte in ama tungah siah puak ding a, zahtakna tawh ama mai-ah kun ding uh hi.

¹¹A sakolno leenggui-ah khih a, a lano leenggui limci penah khih hi. Amah in a puante leenggahzu sungah sawp a, a puansilhte leenggahtui san sungah a sawp hi.

¹²Leenggahzu a neknekna-in a mit san gega a, bawngnawi a neknekna-in a ha pak hi.

¹³“Zebulun, tuipi gei-ah teng ding hi. Amah, teembaw khawlna mun suak ding a, Sidon ciang dongah a gamgi om ding hi.

¹⁴“Issakhar, a hat la tawh kibang a, vangik nih kikalah a lum hi.

¹⁵A tawlngakna mun hoihsa a, a leitang noptuak sa hi. Tua ahih ciangin van pua dingin a liangko niamsak a, sila bangin na kisemsak hi.

¹⁶“Dan in Israel minam dangte mah bangin a mite thu khen ding hi.

¹⁷Dan pen lampi-ah gulpi hi ding a, sul gei-ah gulgu nei hi ding hi. Sakol’ khetul petin a tuang pa a nungkiat hi.

¹⁸“Nong hotkhiat ding ka ngak hi, TOPA.

¹⁹“Gad pen a buluhte in buluh ding a, ahih hangin amah in amaute sulzuih kik ding hi.

²⁰“Asher’ lo-ah an tampi piang ding a, amah in kumpi anlimte bawl ding hi.

²¹“Naftali, a kikhah sakhipi hi a, sakhino suakkhiasak hi.

²²“Josef, a gah pha hiang ahi hi. Ciktui gei-a om a gah pha hiang hi a, a hiangte kulh tungah zaam hi.

²³Thal tawite in nakpitakin amah simin, amah thal tawh kap uh a, nasia takin gimsak uh hi.

²⁴Ahih hangin ama thal ling loin om a, a khutte kizaptelsak hi. Jakob’ Vanglian Pa’ khut (Israel Suangpi, Tuucingpa’ min),

²⁵nang hong huh ding na pa’ Pasian in tunga om vantung thuphate, nuai-a tuithukna sunga om thuphate, khawilevulh le tuletate, nangma tungah hong pia hi.

²⁶Na pa’ thuphate pen tawntung mual liante’ thupha, tawntung mual neute sangin vanglian zaw hi. Tua thuphate Josef’ lu tungah hong tung hen la, a sanggamte’ kiang panin a kituam koihpa’ tungah hong tung tahen.

²⁷“Benjamin, a ne bakbak keivom hi a, zingsangin a sa matsa ne-in, nitakin a ngahsa teng hawm hi,” a ci hi.

²⁸Hihte khempeuh pen Israel minam sawm le nihte ahi hi. Hih thute pen amau tawh a kituak ciatin a pa in amaute thupha pia-in a gente ahi hi.

²⁹Tua ciangin Jakob in a tate thuhilhin amaute kiangah, “Kei, ka mipihte kiangah a kigawm ding ka hita hi. Kivui nading munin neih dingin Abraham in Hit mi Efron’ tung panin a lo tawh a leikhop, Kanaan gam, Mamre nisuahna lamah a om Makpelah lo-a leihawm, Hit mi Efron’ lo-a leihawm han sungah ka pate tawh hong vuikhawm un.

³¹Tua lai munah amaute in Abraham le a zi Sarah vui uh hi. Tua lai munah amaute in Isaac le a zi Rebekah vui uh hi. Tua lai munah keimah in Leah ka vui hi.

³²Lo le tua sunga om leihawm Hit mite’ tung panin a kilei ahi hi,” a ci hi.

³³Jakob in a tapate thuhilh a man khit ciangin, a lupna tungah laitat a, a nunung pen a hu sang-in ama mipihte kiang a zuan ta hi.