Read Tedim Chin PIANCILNA 5 Bible Online

PIANCILNA 5 - Tedim Chin bible

PIANCILNA 5

¹Hih pen Adam’ suanlekhakte’ laibu ahi hi. Pasian in mi a piansakin, amah in Pasian tawh a kisunin a bawl hi.

²Amah in numei le pasal a piangsak hi. Amaute a kipiansakin amah in amaute, “Mi,” ci a, amaute thupha a pia hi.

³Adam kum za le kum sawmthum a phak khit ciangin, amah a sun tapa khat nei a, Seth ci-in a min a phuak hi.

⁴Seth a suah khit ciangin Adam kum zagiat sung nungta lai hi. Amah in tanu le tapa dang zong a nei hi.

⁵Tua ahih ciangin Adam’ nuntak hun sungteng pen kum zakua le kum sawmthum hi a, tua ciangin amah si hi.

⁶Seth kum za le kum nga a phak ciangin Enosh kici tapa khat a nei hi.

⁷Enosh a suah khit ciangin Seth kum zagiat le kum sawmthum nungta a, tanu le tapa dang nei lai hi.

⁸Tua ahih ciangin Seth’ khan sungteng pen kum zakua le kum sawm le nih hi a, tua ciangin amah si hi.

⁹Enosh kum sawmkua a phak ciangin, amah in Kenan kici tapa khat nei hi.

¹⁰Kenan a suah khit ciangin Enosh kum zagiat le kum sawm le nga nungta a, tanu le tapa dang nei lai hi.

¹¹Tua ahih ciangin Enosh’ khan sungteng pen kum zakua le kum nga hi a, tua ciangin amah si hi.

¹²Kenan kum sawmsagih a phak ciangin, Mahalalel kici tapa khat nei hi.

¹³Mahalalel’ suah khit ciangin Kenan kum zagiat le kum sawmli nungta a, tanu le tapa dang nei lai hi.

¹⁴Tua ahih ciangin Kenan’ khan sungteng pen kum zakua le kum sawm hi a, tua ciangin amah si hi.

¹⁵Mahalalel kum sawmguk le kum nga a phak ciangin Jared kici tapa khat nei hi.

¹⁶Jared’ suah khit ciangin Mahalalel kum zagiat le kum sawmthum nungta a, tanu le tapa dang nei lai hi.

¹⁷Tua ahih ciangin Mahalalel’ khan sungteng pen kum zagiat le kum sawmkua le nga hi a, tua ciangin amah si hi.

¹⁸Jared kum za le kum sawmguk le nih a phak ciangin Enok kici tapa khat nei hi.

¹⁹Enok’ suah khit ciangin Jared kum zagiat nungta a, tanu le tapa dang nei lai hi.

²⁰Tua ahih ciangin Jared’ khan sungteng pen kum zakua le kum sawmguk le nih hi a, tua ciangin amah si hi.

²¹Enok kum sawmguk le kum nga a phak ciangin, Methuselah kici tapa khat nei hi.

²²Methuselah’ suah khit ciangin kum zathum sung Enok le Pasian kikhawl a, tanu le tapa dang nei lai hi.

²³Tua ahih ciangin Enok’ khan sungteng pen kum zathum le kum sawmguk le kum nga ahi hi.

²⁴Enok pen Pasian tawh kikhawl hi. Enok kimu nawn lo hi; bang hang hiam cih leh Pasian in amah la hi.

²⁵Methuselah kum za le kum sawmgiat le kum sagih a phak ciangin Lamek kici tapa khat nei hi.

²⁶Lamek’ suah khit ciangin Methuselah kum zasagih le kum sawmgiat le nih nungta a, tanu le tapa dang nei lai hi.

²⁷Tua ahih ciangin Methuselah’ khan sungteng pen kum zakua le kum sawmguk le kua hi a, tua ciangin amah si hi.

²⁸Lamek kum za le kum sawmgiat le nih a phak ciangin tapa khat nei a,

²⁹ama min Noah phuakin, “TOPA in a samsiatsa leitang panin hih pa in i nasepna le i gimnate-ah eite hong khahkhia ding hi,” a ci hi.

³⁰Noah’ suah khit ciangin Lamek kum zanga le kum sawmkua le nga nungta a, tanu le tapa dang nei lai hi.

³¹Tua ahih ciangin Lamek’ khan sungteng pen kum zasagih le kum sawmsagih le sagih hi a, tua ciangin amah si hi.

³²Noah kum zanga a phak khit ciangin Shem, Ham, le Jafeth, tapa thum a nei hi.