Read Tedim Chin PIANCILNA 50 Bible Online

PIANCILNA 50 - Tedim Chin bible

PIANCILNA 50

¹Tua ciangin Josef a pa’ tungah pukin, ama tungah kap a, amah a nam hi.

²A pa a muat loh nadingin a bawl dingin Josef in a nasem zatui siamte thu pia hi. Tua ahih ciangin zatui siamte in zatui tawh Israel a bawl uh hi.

³Zatui tawh bawlna nasep hun tampi kisam a, ni sawmli sung sep ding kisam hi. Egypt mite ama hangin ni sawmsagih sung a kap uh hi.

⁴Ama hangin kahna hun a bei ciangin Josef in Faro’ innkuante kiangah, “Tu-in note’ mai-ah maipha ka ngah leh Faro’ kiangah thu nong va gensak ding uh kong thum hi.

⁵Ka pa in kei hong kiciamsak a, ‘Kei a si ding ka hi ta hi. Kanaan leitangah kei a dingin ka khuatsa han sungah kei nong vui ding hi,’ hong ci hi. Tua ahih ciangin tu-in kei hong paitosak inla, ka pa hong vuisak in, ci-in kong thum hi. Tua ciangin kei kong ciahkik ding hi, ci hi, va cihsak un,” a ci hi.

⁶Faro in dawngin, “Paito inla, nang hong kiciamsak bangin na pa va vui in,” a ci hi.

⁷Tua ahih ciangin a pa a vui dingin Josef paito hi. Amah tawh Faro’ nasemte khempeuh, a innsung upate, Egypt gam upate khempeuh zong,

⁸Josef’ innkuante khempeuh, a sanggamte, a pa’ innkuante bangmahin paito uh hi. A tate uh, a tuuhonte uh le a ganhing honte bek uh Goshen gamah kinusia hi.

⁹Tua lai munah amah tawh leengte le sakol tuangte zong paikhawm to uh hi. Tua lai-a paite tam mahmah hi.

¹⁰Amaute Jordan gun galkhat, Atad’ buhcilna phual a tun uh ciangin, nakpitakin dahna tawh a thuum uh hi. Amah in a pa’ hangin ni sagih sung dahna hun a bawl hi.

¹¹Tua gam a teng Kanaan mite in, Atad’ buhcilna-ah tua banga kahna a muh ciangin amaute in, “Hih pen Egypt mite a dingin a nasia mahmah thuumna ahi hi,” a ci uh hi. Tua ahih ciangin tua mun pen Abelmizraim, kici hi. Tua mun pen Jordan gun galkhat ahi hi.

¹²Tua ahih ciangin amah in amaute a thupiak bangin ama tapate in ama a dingin bawlsak uh hi.

¹³Bang hang hiam cih leh ama tapate in Kanaan gamah amah pua-in, kivui nading mun a neih dingin Abraham in Hit mi Efron’ tung panin a lo tawh a leikhop, Mamre nisuahna lamah a om, Makpelah mun lo sunga leihawm sungah a vui uh hi.

¹⁴Josef in a pa a vui khit ciangin, a sanggamte le a pa a vui dingin amah a zui khempeuhte tawh Egypt-ah a ciahkik hi.

¹⁵Josef’ sanggamte in a pa uh a sih khit ciangin, “Josef in eite hong mudahin ama tunga siatna i bawl khempeuh hong thukkik kha ding hi,” ci uh hi.

¹⁶Tua ahih ciangin amaute in Josef kiangah thu puak uh a, “I pa in a sih ma-in thu hong pia a,

¹⁷‘Josef kiangah hih bangin ci un: Na sanggamte’ thupalsatna le a khialhna na maisak in, kong thum hi. Bang hang hiam cih leh nang’ tungah amaute in siatna hong bawl uh hi,’ ci hi. Tua ahih ciangin tu-in nang’ tungah kong thum uh hi. I pa’ Pasian’ nasemte’ thupalsatna hong maisak in,” a ci uh hi. Amaute in ama kiangah tua bangin thu a gen ciangun Josef a kap hi.

¹⁸A sanggamte zong pai-in ama mai-ah puk uh a, “En in, kote, nangma nasemte ka hi uh hi,” a ci uh hi.

¹⁹Ahih hangin Josef in amaute kiangah, “Lau kei un. Kei, Pasian’ za-ah om ka hi hiam?

²⁰Note in ahihleh, kei’ tungah a sia dingin na ngaihsun uh hi. Ahih hangin Pasian in tuhuna mah bangin mi tampite a nuntak theihna a pian nadingin a hoih dingin a ngaihsut ahi hi.

²¹Tua ahih ciangin lau kei un. Note le na tate uh a dingin an kong pia ding hi,” a ci hi. Amah in tua bangin kip gen pha kikin amaute a hehnem hi.

²²Tua ahih ciangin Josef, amah le a pa’ innkuante tawh Egypt-ah teng uh a, Josef kum za le kum sawm nungta hi.

²³Josef in khang thumna ahi Efraim’ tate mu hi. Manasseh’ tapa Makhir’ tate zong Josef’ innsung mahah suak uh hi.

²⁴Josef in a sanggamte kiangah, “Kei a si ding ka hi ta hi. Ahih hangin Pasian in note hong kem ding a, hih leitang panin amah in Abraham, Isaac, le Jakob tunga a ciamsa leitangah note hong paikhiatpih to ding hi,” a ci hi.

²⁵Tua ciangin Josef in Israel tapate’ kiciamna bawlin, “Pasian in note hong kem ding a, note in hih lai panin ka guhte na pua to ding uh hi,” a ci hi.

²⁶Tua ahih ciangin kum za le kum sawm a pha-in Josef a si hi. Amaute in a muat loh nadingin zatui tawh amah bawl uh a, Egypt-ah hankuang sung khatah amah kikoih hi.