Read Tedim Chin PIANCILNA 9 Bible Online

PIANCILNA 9 - Tedim Chin bible

PIANCILNA 9

¹Pasian in Noah le a tapate thupha pia a, amaute tungah, “Pung unla, tampi pha-in, leitung dim un.

²Note pen leitung ganhing khempeuh, huih lak vasa khempeuh, leilakah a bokvak khempeuh le tuipi ngasa khempeuh in hong kihta-in hong zahtak ding uh hi. Note’ khut sungah tuate hong kipia hi.

³A nungta a gamtang peuhmah, note a dingin an hi ding hi. Kung hing khempeuh ka hong piak bangin na khempeuh zong note ka hong pia hi.

⁴A nuntakna ahi a sisan pen a sa tawh na ne khawm kei bek ding uh hi.

⁵Mi khatpeuh in hong thah le ama tungah sihna dan ka pia ding hi. A hong that ganhing peuhmah ka that ding a, a mipihte a that mi peuhmah gim ka pia ding hi.

⁶Mi a that peuhmahte pen, midangte in amah that ding hi. Bang hang hiam cih leh Pasian in ama lim bangin mi bawl hi.

⁷“Note, pungin khang unla, leitungah tampi tak piangkhia-in, tampi pha-in khang un,” a ci hi.

⁸Tua ciangin Pasian in Noah le amah tawh a om a tapate kiangah,

⁹“En un, note le note’ khit a na suanlekhakte uh le,

¹⁰note tawh a om nuntakna a nei peuhmah, vasate, innsate, note tawh a om leitung gamsa peuhmah, teembaw sung panin a paikhia zahzah peuhmah tawh ka thuciamna ka kipsak hi.

¹¹Nuntakna a nei khempeuh, tuiciin tawh susia kik ngei nawn loin, leitung a susia dingin tuiciin ka tunsakkik ngei nawn loh nadingin note tawh ka thuciamna ka kipsak hi,” a ci hi.

¹²Tua ciangin Pasian in, “Hih pen, kei le note le note tawh a om nuntakna a nei khempeuh kikalah mailam khang tawntung ah thuciamna lim ahi hi.

¹³Meii sungah ka sakhituihup ka kaisak a, tua pen kei le leitung kikalah thuciamna lim hi ding hi.

¹⁴Vantungah meii kong kaisak ciangin meii sungah sakhituihup a kimuh leh,

¹⁵kei le note le nuntakna a nei khempeuh tawh ka thuciamna ka phawk ding hi. Tuite pen, nuntakna a nei khempeuh a susia ding tuiciin suakkik ngei nawn lo ding hi.

¹⁶Meii sungah sakhituihup a om ciangin keimah in ka en ding a, kei le leitung a a om nuntakna a nei khempeuh tawh tawntung thuciamna ka phawk ding hi,” a ci hi.

¹⁷Pasian in Noah kiangah, “Hih pen, kei le leitung a a om nuntakna a nei khempeuh tawh ka kipsaksa thuciamna lim ahi hi,” a ci hi.

¹⁸Teembaw sung panin a paikhia Noah’ tapate, Shem, Ham, le Jafeth ahi hi. Ham pen Kanaan’ pa ahi hi.

¹⁹Hih Noah’ tapa thumte panin leitung buppi mi tawh hong kidim hi.

²⁰Noah pen lo kho masa pa hi a, amah in leenggui lo khat a bawl hi.

²¹Amah in leenggahzu ne-in kham a, a puanbuk sungah bangmah silh loin a lum hi.

²²Kanaan’ pa Ham in a pa guaktangin a omna mu a, a pualama om a sanggam nihte kiangah a gen hi.

²³Tua ciangin Shem le Jafeth in puan khat la-in amau tegel’ liangko tuakah baang uh a, a nung leh lamun pai-in a pa uh’ guaktang omna a khuh uh hi. Amaute in maingat lo uh ahih manin a pa uh guaktang omna mu lo uh hi.

²⁴Noah a zukhamna panin a pilvan’ ciangin ama tungah a tapa Ham’ gamtatna thei a,

²⁵amah in, “Kanaan in samsiatna ngah ta hen la, a sanggamte’ sila hi tahen.

²⁶TOPA ka Pasian in Shem thupha pia hen la, Kanaan, ama sila hisak hen.

²⁷Pasian in Jafeth pungsak hen la, Shem’ puanbukte sungah amah tengsak hen. Kanaan ama sila hisak hen,” a ci hi.

²⁸Tuiciin a tun khit ciangin Noah kum zathum le kum sawmnga nungta hi.

²⁹Noah’ khan sungteng pen kum zakua le kum sawmnga hi a, tua ciangin amah a si hi.