Read Tedim Chin 2 SAMUEL NIHNA 16 Bible Online

2 SAMUEL NIHNA 16 - Tedim Chin bible

2 SAMUEL NIHNA 16

¹David in mual dawn a khen’ khit tawmvei ciangin Mefibosheth nasempa Ziba in anlum zanih, leenggah phehkeu bawk zakhat, khuakhal singgah zakhat le leenggahzu savun um khat a pua van a kivawh la nih tawh amah na dawn hi.

²Tua ciangin kumpipa in Ziba kiangah, “Bang hangin hihte hong paipih na hi hiam?” a ci hi. Ziba in dawngin, “Late pen kumpipa’ innkuante a tuan nading, anlum le khuakhal singgahte pen tangvalte’ nek ding, le leenggahzu pen gamlakah a gimte’ dawn ding ahi hi,” a ci hi.

³Tua ciangin kumpipa in, “Na topa Saul’ tupa koi-ah om ahi hiam?” a ci hi. Ziba in kumpipa kiangah, “Amah Jerusalem-ah om hi; bang hang hiam cih leh amah in, ‘Tuni-in Israel mite in ka pu Saul’ kumpi gam kei hong piakik ding hi,’ ci hi,” a ci hi.

⁴Tua ciangin kumpipa in Ziba kiangah, “En in, Mefibosheth’ neihsa khempeuh tu-in nangma a’ ahi hi,” a ci hi. Tua ciangin Ziba in, “Kei, nangma nasempa ka hi hi; ka to kumpipa’ muhna-ah maipha hong musak tawntung in,” a ci hi.

⁵Bahurim-ah Kumpi David a tun ciangin Saul’ innsung innkuan mi, Gera’ tapa Shimei min nei mi khat hong paikhia a, a paikawmin David samsia tawntung hi.

⁶Amah in Kumpi David le a nasemte khempeuh suang tawh deng hi. Mi khempeuh le mi thahatte khempeuh David’ taklam le veilamah om uh hi.

⁷Shimei in a samsiat kawmin, “Pai mang, pai mang, nang mi that pa, bangmah man lo mipa!

⁸Ama tangin na uk Saul’ innkuante na thahna hangin TOPA in nangma tungah hong thuk hi. TOPA in na tapa Absalom’ tungah kumpi gam pia khinta hi. Thei in, na siatna nangma lu tungah hong tu hi; bang hang hiam cih leh nang pen mi that pa na hi hi,” a ci hi.

⁹Tua ciangin a nu Zeruiah ahi Abishai in kumpipa kiangah, “Bang hangin hih uisi a banglel mi khat in ka to kumpipa samsia ding ahi hiam? Hong kuansak inla a lu hong tankhiasak in,” a ci hi.

¹⁰Ahih hangin kumpipa in, “No Zeruiah tapate aw, note tawh bang kisai ahi hiam? TOPA in ama kiangah, ‘David samsia in,’ a cihna hangin hong samsia ahihleh, ‘Bang hangin tuaci hih na hi hiam?’ kua in ci ding ahi hiam?” a ci hi.

¹¹Tua ciangin David in Abishai le a nasemte khempeuh kiangah, “En un, keima tapa mahmah in kei thah dingin hong zong hi; hih Benjamin mi in bangzahin tu-in hong zongzaw kan ding ahi hiam! Ama thu-in omsak un, amah hong samsiasak un; bang hang hiam cih leh TOPA in amah a sawl hi kha ding hi.

¹²TOPA in ka thuakna hong enin, tuni-a kei hong samsiatna hangin TOPA in a hoih tawh kei hong thuk kha ding hi,” a ci hi.

¹³Tua ahih ciangin ama galkhat mualpangah Shimei pai a, a paikawmin samsia-in suang tawh amah dengin leivui a theh laitakin David le a mite lampi-ah pai uh hi.

¹⁴Tua ciangin kumpipa le amah tawh a om mi khempeuhte gim mahmahin Jordan tung uh a, tua lai-ah amah kitawldamsak hi.

¹⁵Tu-in Absalom le Israel mite khempeuh Jerusalem hong tung uh a, Ahithofel amah tawh om hi.

¹⁶Tua ciangin David lam a lak pa, Arkhi mi Hushai, Absalom kiangah hong tun ciangin Hushai in Absalom’ kiangah, “Kumpipa khan sawt ta hen! Kumpipa khan sawt ta hen!” a ci hi.

¹⁷Absalom in Hushai kiangah, “Hih bang pen na lawmpa tungah thumanna ahi hiam? Bang hangin na lawmpa tawh pai lo na hi hiam?” a ci hi.

¹⁸Hushai in Absalom kiangah, “Hilo hi; TOPA le hih mite le Israel mite khempeuh a dingin a kiteel mipa a’ ka hi ding a, amah tawh ka om ding hi.

¹⁹Tua banah, kua’ na sem ding ka hi hiam? Ama’ tapa hi lo ding ahi hiam? Na pa’ na ka sep bangin nangma na ka sem ding hi,” a ci hi.

²⁰Tua ciangin Absalom in Ahithofel kiangah, “Na ngaihsutna hong gen in; bang hih ding ihi hiam?” a ci hi.

²¹Ahithofel in Absalom’ kiangah, “Inn kem dingin a nusiat na pa’ zineute luppih in; tua ciangin nangmah in na pa na muhdah bawlna thu Israel-te khempeuh in za-in nangmah tawh a om mite khempeuh’ tha khauhsak ding hi,” a ci hi.

²²Tua ciangin amaute in innkhumzangah Absalom a dingin puanbuk khat lam uh a, Israel-te khempeuh’ muhna-ah Absalom in a pa’ zineute luppih hi.

²³Tua hun lai-in Ahithofel’ thugente pen Pasian’ kammal mahmah bangin kingaihsun hi. Tua bangin David le Absalom in Ahithofel’ thugente a thupi ngaihsut uh ahi hi.