Read Tedim Chin 2 SAMUEL NIHNA 2 Bible Online

2 SAMUEL NIHNA 2 - Tedim Chin bible

2 SAMUEL NIHNA 2

¹Hih hun khit ciangin David in TOPA thu dong a, “Judah khuapi khat peuhpeuhah ka paito ding hiam?” a ci hi. TOPA in ama kiangah, “Paito in,” a ci hi. David in, “Koi penah paito ding ka hi hiam?” a ci hi. Amah in, “Hebron-ah,” a ci hi.

²Tua ahih ciangin tua lai-ah David paito a, ama zi nihte, Jezreel khua mi Ahinoam le Karmel khua mi Nabal’ zi meigongnu Abigail zong a pai uh hi.

³David in amah tawh a om a mite, mi khempeuh a innkuanpih ciat tawh paipihto a, Hebron khua-ah amaute a teng uh hi.

⁴Tua ciangin Judah mite hong pai-in amaute in tua lai munah Judah kumpi dingin David sathau a nilh uh hi. Amaute in David kiangah, “Saul a vuite pen Jabeshgilead mite hi,” ci-in a gen uh ciangin

⁵Jabeshgilead mite kiangah David in kamtaite sawlin amaute kiangah, “Note in na topa uh Saul tungah thumanna lakin amah vui na hih manun TOPA in note thupha hong pia ta hen!

⁶Tu-in TOPA in itna kip le thumanna note tungah hong lak ta hen! Note hih bangin gamta na hih manun note tungah thuhoih kong bawl ding hi.

⁷Tua ahih ciangin tu-in note kithakhauhsakin hang un; bang hang hiam cih leh na topa uh Saul si a, Judah mite in amau’ tungah kumpi-in kei sathau hong nilh khin uh hi,” a ci hi.

⁸Tu-in Ner’ tapa Abner, Saul’ galkap mangpa in Saul’ tapa Ishbosheth la-in Mahanaim ah paipih hi.

⁹Amah in Gilead, Ashur, Jezreel, Efraim, Benjamin, le Israel khempeuh tungah kumpi-in amah bawl hi.

¹⁰Israel-te tungah uk dingin a kipatin Saul’ tapa Ishbosheth kum sawmli pha a, amah in kum nih sung uk hi. Ahih hangin Judah minamte in David’ nung zui uh hi.

¹¹Judah minamte tungah kumpi-in Hebron-ah David kum sagih le kha guk sung a om hi.

¹²Ner’ tapa Abner le Saul’ tapa Ishbosheth’ nasemte Mahanaim panin Gibeon-ah paikhia uh hi.

¹³Zeruiah’ tapa Joab le David’ nasemte paikhia-in Gibeon bual-ah amaute dawntuah uh hi. Amaute bual langkhatah, adang khatte a bual langkhatah tu uh hi.

¹⁴Tua ciangin Abner in Joab kiangah, “Tangvalte ding sakin eite’ mai-ah kimawlsak ni,” a ci hi. Joab in, “Amaute dingsak in,” a ci hi.

¹⁵Tua ciangin amaute dingin galkah uh a, Benjamin le Saul’ tapa Ishbosheth a dingin sawm le nih, le David’ nasemte zong sawm le nih mah ahi hi.

¹⁶Tua ciangin alang ciat uh lutang lenin, a namsau tawh a lang pa dawt ciat uh hi. Tua ahih ciangin amaute tukkhawm uh hi. Tua ahih manin Gibeon-ah a om tua mun pen Helkathhazzurim kici hi.

¹⁷Tua ni-in galkidona nasia mahmah a, Abner le Israel mite David’ nasemte in zo uh hi.

¹⁸Zeruiah’ tapa thumte, Joab, Abishai, le Asahel, tua lai-ah om uh hi. Asahel pen Syria sakhi lee bangin a khe manlang hi.

¹⁹Asahel in Abner delh a, amah a delh laitakin Abner a zuihna-ah pial hetloin delh paisuak hi.

²⁰Tua ciangin Abner in a nung enin, “Asahel aw, nang na hi hiam?” a ci hi. Amah in dawngin, “Keimah ka hi hi,” a ci hi.

²¹Abner in ama kiangah, “Na taklamah ahi a, na veilamah ahi zongin kihei inla, tangvalte khatpeuh manin a na sut in,” a ci hi. Ahih hangin amah a zuihna panin Asahel pial lo hi.

²²Tua ciangin Abner in Asahel kiangah, “Keimah zuihna panin pial in; bang hangin nang lei-ah hong vatgawp ding ka hi hiam? Nang hong vatgawp leng na sanggampa Joab’ mai-ah ka maitang bangci lak ding ka hi hiam?” a ci kik hi.

²³Ahih hangin amah lampial nuam lo hi. Tua ahih ciangin Abner in a teipi tong lamin a gil khawh a, a nungah a teipi lengsuak hi. Tua ciangin amah tukin tua phualah a si hi. Asahel tukin a sihna munah a pai mi khempeuh tang loin a ding uh hi.

²⁴Ahih hangin Joab le Abishai in Abner delh ding kipan uh hi. Ni a tum laitakin Gibeon gamlak paina lampi-a om Giah mai-ah a kikhung Ammah mual a tung uh hi.

²⁵Tua ciangin Abner a pawlpih Benjamin-te kikaikhawm uh a, amaute pawlkhat suakin mual dawn khatah a pang uh hi.

²⁶Tua ciangin Abner in Joab samin, “Mi hih bangin kithat lai ding ahi hiam? A tawpna-ah a haksat zawk nading thei lo na hi hiam? A sanggamte uh a delhna panin na mite a kihei nadingin na thupiak ding bangtan sawtlai ding ahi hiam?” a ci hi.

²⁷Tua ciangin Joab in, “Pasian a nungta ahih mah bangin, hong pau lo hi lecin, a sanggamte uh a delhna panin zingsang mateng mite khawl lo taktak ding uh hi,” a ci hi.

²⁸Tua ahih ciangin Joab in peengkul tum hi. Mi khempeuh khawl a, Israel-te delh nawn loin amaute in do nawn lo uh hi.

²⁹Tua ciangin Abner le a mite Arabah kantanin tua zan tawntung pai uh hi. Amaute in Jordan kantan uh a, sun ma sungteng pai-in Mahanaim tung uh hi.

³⁰Abner a delhna panin Joab ciahkik hi. Amah in mi khempeuh a kaihkhop khit ciangin Asahel sim lohin David’ nasemte mi sawmkua le kua kisam hi.

³¹Ahih hangin David’ nasemte in Abner a’ ahi Benjamin-te mihing zathum le sawmguk that uh hi.

³²Tua ciangin amaute in Asahel la-in Bethlehem-ah a om ama pa’ hanah a vui uh hi. Tua ciangin Joab le a mite zan tawntung pai uh a, Hebron-ah khua a vak hi.