Read Tedim Chin 2 SAMUEL NIHNA 23 Bible Online

2 SAMUEL NIHNA 23 - Tedim Chin bible

2 SAMUEL NIHNA 23

¹Jessi’ tapa David, milianpi a suak mipa, Jakob’ Pasian’ sathau nilh pa, Israel laphuak siampa David’ kam nunungte hih bang ahi hi:

²“TOPA’ kha in kei tungtawnin thu hong gen a, ka kam sungah ama thugente om hi.

³Israel Pasian kampau khin a, Israel a hupa in kei kiangah hong ci khin hi: Mi khat in mite tungah thutang takin ukin Pasian zahtakna tawh limtakin a uk ciangin

⁴amah pen amaute tungah zingsang khuavak bangin taang ziazua a, meii kaai loh ni zingsang a ni taangkhia, leilak panin lopate a selsak guahtui tawh kibang hi.

⁵Hi hi, ka innkuan zong Pasian tawh tua bangmah hi lo ahi hiam? Bang hang hiam cih leh amah in tawntung thuciamna kei tawh hong bawl a, na khempeuh a hoih a kipin hih hi. Bang hang hiam cih leh keimah hong huhin, ka deihna khempeuh tangtungsak ding hi lo ahi hiam?

⁶Ahih hangin mi gilote ahihleh a kilawnkhia lingkungte tawh kibang hi. Bang hang hiam cih leh khut guak tawh amaute kilawng ngam lo a,

⁷amaute a lawng ding mipa pen sik le teipi bul tawh kithawi a, amaute mei tawh kihaltum siang hi,” a ci hi.

⁸David’ neih mi thahatte’ minte: Tahkhemon mi Joshebbasshebeth hi a, amah pen mi thumte a ukpa ahi hi. Amah in a teipi tawh mihing zagiat do-in hun khat sungin thatmang khin hi.

⁹Tua ciangin mi thahat thumte lakah amah a zom pa pen Ahoah mi Dodo’ tapa Eleazar ahi hi. Galsim dingin a kikaikhawm Filistia-te to a, Israel mite a nungkik hunin David tawh amah om hi.

¹⁰Amah dingin a khut a hikcip mateng Filistia-te sattuk a, a namsau a khut sungah omcip hi. TOPA in tua ni-in gualzawhna lianpi piangsak a, a kithat mite’ na a tawm ding bekin ama nungah mite hong paikik uh hi.

¹¹Ama zomah Harar mi Agee’ tapa Shammah ahi hi. Besan a dimna mun Lehi-ah Filistia-te kikaikhawm uh a, Filistia-te’ kiang panin mite tai uh hi.

¹²Ahih hangin amah in tua munah panmun la-in hu a, Filistia-te that a, TOPA in gualzawhna lianpi a piangsak hi.

¹³Ukpa sawmthumte lak panin mi thumte paisukin, Refaim kuamah Filistia mihonte in giahphual satin a om laitakin, Adullam leihawm a David kiangah anlak hun pawlin tung uh hi.

¹⁴Tua hunin munmuanhuai sungah David om a, Filistia khuacingte Bethlehem-ah om uh hi.

¹⁵David in lunggulhna tawh, “Kulhkongpi gei-a om Bethlehem tuikhuk panin mi khat in tuidawn ding kei hong pia leh!” a ci hi.

¹⁶Tua ciangin mi thahat thumte in Filistia-te’ giahphual phulin kulhkongpi gei-a om Bethlehem tuikhuk panin tui tawikhia uh a, a tui la-in David kiangah paipih uh hi. Ahih hangin David in a tui dawn lo hi. Amah in TOPA a dingin a tui sung a,

¹⁷“TOPA aw, hih tui ka dawn het kei ding hi. Amau’ nuntakna khamin a pai mite’ sisan a dawn tawh ka kibang hi,” a ci hi. Tua ahih ciangin amah in dawn lo hi. Mi thahat thumte’ hanzia tu-a bang ahi hi.

¹⁸Tu-in Zeruiah’ tapa, Joab’ sanggampa Abishai, mihing sawmthumte a ukpa ahi hi. Amah in a teipi tawh mihing za thumte do-in amaute that a, mihing sawmthumte’ banah minphatna ngahbeh hi.

¹⁹Mihing sawmthumte sung pan amah a minthang pen hi a, amaute a ukpa a suak hi. Ahih hangin amah in mihing thumte ban nai lo hi.

²⁰Jehoiada’ tapa, Kabzeel khuami Benaiah pen gal a hang, na lianpite a sempa hi a, amah in Moab galhang mi nih a vat hi. Amah zong paisukin vuk a kiat ni khatin leihawm sunga om humpinelkai khat a that hi.

²¹Amah in a melhoih Egypt mi khat a that hi. Egypt mipa in a khut sungah teipi tawi hi. Ahih hangin Benaiah ciangkhut khat tawh ama kiangah paisuk a, Egypt-pa’ khutsung panin a teipi sutkhia-in ama teipi mah tawh amah a that hi.

²²Jehoiada’ tapa Benaiah in hihte hihin, a thahat mi thumte’ minphatna zah phial a ngah hi.

²³Mihing sawmthumte’ lakah amah minthang a, ahih hangin amah in mihing thumte ban nai lo hi. David in amah a cingte a ukin a koih hi.

²⁴Joab’ sanggampa Asahel zong sawmthumte’ lakah khat ahi hi. Bethlehem mi Dodo’ tapa Elhanan,

²⁵Harod khuami Shammah, Harod khuami Elika,

²⁶Palti mi Helez, Tekoa khuami Ikkesh’ tapa Ira,

²⁷Anathoth khuami Abiezer, Hushah mi Mebunnai,

²⁸Ahoah mi Zalmon, Netofah khuami Maharai,

²⁹Netofah khuami Baanah’ tapa Heleb, Benjamin mite’ gam sunga om Gibeah khuami Ribai’ tapa Ittai,

³⁰Pirathon khuami Benaiah, Gaash gei-a kuam pan Hiddai,

³¹Betharabah khuami Abialbon, Bahurim khuami Azmaveth,

³²Shaalbon khuami Eliahba, Jashen’ tapate, Jonathan,

³³Harar mi Shammah, Harar mi Sharar’ tapa Ahiam,

³⁴Maakah khuami Ahasbai’ tapa Elifelet, Gilo khuami Ahithofel’ tapa Eliam,

³⁵Karmel khuami Hezro, Arbi mi Paarai,

³⁶Zobah khuami Nathan’ tapa Igal, Gad mi Bani,

³⁷Ammon mi Zelek, Zeruiah’ tapa galhiam a tawi Beeroth khuami Naharai,

³⁸Ithri mi Ira, Ithri mi Gareb,

³⁹Hit mi Uriah, a vekpi-in sawmthum le sagih ahi uh hi.