Read Tedim Chin 2 SAMUEL NIHNA 6 Bible Online

2 SAMUEL NIHNA 6 - Tedim Chin bible

2 SAMUEL NIHNA 6

¹David in Israel-te a kiteelkhia mi tul sawmthum khawmkik hi.

²Tua ciangin David in kherub-te tungah a tu, Vanglian TOPA’ min tawh a kisam Pasian’ Thuciamna Singkuang tua mun panin a paipihto dingin amah tawh a om mi khempeuh tawh Baalejudah-ah a pai hi.

³Amaute in leeng thak khat tungah Pasian’ Thuciamna Singkuang pua uh a, mualtung a om Abinadab’ inn panin paikhiatpih uh hi. Abinadab’ tapate Uzzah le Ahio in leeng thak tungah Pasian’ Thuciamna Singkuang koihin hawl uh a, Thuciamna Singkuang mai-ah Ahio a pai hi.

⁵Tua ciangin David le Israel mite khempeuh in TOPA’ mai-ah a tha neih zahun la sa-in, laiza khausai lasaknate, harp khausai lasaknate, khuangneute, kuangtuahte, le daltuahte tumin lungdamin a lam uh hi.

⁶Nakon’ ancilna mun a tun uh ciangin bawngtalte muktu ahih manin Uzzah in Pasian’ Thuciamna Singkuang lamah a khut zanin len kha hi.

⁷Tua ciangin Uzzah tungah TOPA hong sinso hi. Amah in Thuciamna Singkuang lamah a khut zan ahih manin Pasian in tua lai-ah amah vatlum a, Pasian’ Thuciamna Singkuang gei-ah amah si hi.

⁸TOPA in Uzzah gim pia ahih manin David heh hi. Tuni dongin tua mun pen Perezuzzah kici hi.

⁹Tua ahih ciangin tua ni-in David in TOPA kihta hi. Amah in, “TOPA’ Thuciamna Singkuang bangci-in ka kiangah hong tung thei ding ahi hiam?” a ci hi.

¹⁰Tua ahih ciangin David khuapi sungah TOPA’ Thuciamna Singkuang a paipih ding David ut lo a, Gath khua mi Obededom’ inn-ah paipih hi.

¹¹TOPA’ Thuciamna Singkuang Gath khua mi Obededom’ inn sungah kha thum sung om a, TOPA in Obededom le a innkuan khempeuh thupha a pia hi.

¹²Tua ciangin Kumpi David kiangah, “Pasian’ Thuciamna Singkuang hangin TOPA in Obededom innkuan le ama neih khempeuh thupha pia hi,” ci-in kigen hi. Tua ahih ciangin David pai-in Obededom’ inn panin David khuapi-ah lungdamna tawh Pasian’ Thuciamna Singkuang paipihto hi.

¹³TOPA’ Thuciamna Singkuang a puate kal guk a suan khit ciangin amah in a puate tawlkhat khawlsakin bawngtal khat le bawngno thau khat biakna-in a pia hi.

¹⁴Tua ciangin a tha neih khempeuh tawh TOPA’ mai-ah David lam hi. David in saihadial siampipuan khat silh hi.

¹⁵Tua ahih ciangin David le Israel mi khempeuh in otna le saki tumna awging tawh TOPA’ Thuciamna Singkuang paipihto uh hi.

¹⁶TOPA’ Thuciamna Singkuang David khuapi sung hong tun laitakin tawlet panin Saul tanu a zi Mikhal hong khuadak a, TOPA’ mai-ah Kumpi David diangin a lam mu hi. Tua nu in a lungsim sungah amah simmawh hi.

¹⁷Tua ciangin amaute in TOPA’ Thuciamna Singkuang hong tumpih uh a, David in ama a dingin a lamsak puanbuk sung ama mun dingah a koih hi. Tua ciangin David in TOPA’ mai-ah meihal biaknate le thunuama biaknate a pia hi.

¹⁸David in meihal biaknate le thunuama biaknate a piak khit ciangin amah in Vanglian TOPA’ min tawh mite thupha pia a,

¹⁹Israel mihon buppi, mi khempeuh, numei le pasalte tungah anlum pheng khat, sa baak khat, le leenggahkeu pheng khat ciat a pia hi. Tua ciangin mi khempeuh a inn ciat uhah a ciah uh hi.

²⁰Tua ciangin a innkuante thupha a pia dingin David a ciah hi. Ahih hangin David a dawn dingin Saul’ tanu Mikhal hong paikhia a, “Tuni-in Israel kumpipa, mi mawkmawkte khat maizum loin a guak om bangin, a nasemte’ numeite’ muhna-ah tuni-in a tangguakin omin, amahmah bangci kipahtawi ahi hiam?” a ci hi.

²¹Tua ciangin David in Mikhal kiangah, “TOPA’ mi Israel-te tungah ulian dingin a hong koih dingin na pa le a innkuan khempeuhte sangin kei a hong teelzaw TOPA’ mai ahi hi. Keimah in TOPA’ mai-ah lungdamna ka bawl ding hi.

²²Hih sangin a simmawhhuai zaw-in ka kibawl lai ding a, nangma mit bekah a ginalo ka hi ding hi. Ahih hangin nangma gen numeite in keimah hong pahtawi ding uh hi,” a ci hi.

²³Tua ahih ciangin Saul’ tanu Mikhal in a sih ni dongin ta nei thei nawn lo hi.