Read Tedim Chin 2 SAMUEL NIHNA 8 Bible Online

2 SAMUEL NIHNA 8 - Tedim Chin bible

2 SAMUEL NIHNA 8

¹Hih thu teng khit ciangin David in Filistia-te zo-in amaute nuaisiah a, David in Filistia-te’ khutsung panin Methegammah khua a la hi.

²Tua ciangin amah in Moab mite zo a, amaute khauzang khat tawh tehin, leilakah amaute lumsak hi. Amah in thah dingin gual nih le khah dingin gual khat dim a teh hi. Tua ciangin Moab mite David’ khutnuai mite suakin siah a puak uh hi.

³Zobah kumpipa Rehob’ tapa Hadadezer in Eufratis gun kiim gamte ngahkik nuamin hong kuan ahih manin David in amah do-in a zo hi.

⁴David in ama tung panin sakol galkap tulkhat le zasagih le khe galkap tul sawmnih la hi. David in leengkai sakol khempeuh a zagui atsat a, ahih hangin leeng zakhat a dingin a kicing a siit hi.

⁵Damaskas gam a Syria mite, Zobah kumpipa Hadadezer a huh dingin hong kuan ciangin David in Syria mite tul sawmnih le tulnih a that hi.

⁶Tua ciangin David in Damaskas gam Aram-ah khuacingte a koih hi. Syria mite David’ nasem suak uh a, siah a puak uh hi. TOPA in David a paina peuhpeuhah gualzawhna a pia hi.

⁷Tua ciangin David in Hadadezer’ nasemte in a puak kham kibawl lumte la-in Jerusalem-ah a paipih hi.

⁸Hadadezer’ khuapite Betah le Berothai panin Kumpi David in sumngo tampi tak a la hi.

⁹Hamath kumpipa Toi in David in Hadadezer’ galkap buppi a zawhna thu a zak ciangin,

¹⁰amah in Hadadezer do-in a zawhna hangin amah va hopihin a lungdampih dingin Toi in Kumpi David kiangah a tapa Joram a sawl hi. Bang hang hiam cih leh Hadadezer pen Toi tawh galin kido ngei zel hi. Joram in ngun, kham, le sumngo tawh a kibawl nate puak hi.

¹¹Kumpi David in hihte zong, a nuaisiah minamte khempeuh Edom, Moab, Ammon mite, Filistia-te, Amalek, le Zobah kumpipa Rehob’ tapa Hadadezer’ vannusiatte sung panin a ap ngun le kham tawh TOPA’ tungah a ap khawm hi.

¹³David minthang semsem hi. A ciah ciangin amah in Ci Kuam-ah Edom mite tul sawm le tulgiat a that hi.

¹⁴Tua ciangin amah in Edom-ah khuacingte a koih hi. Edom gam sung khempeuhah amah in khuacingte koih a, Edom mi khempeuh David’ nasemte a suak uh hi. TOPA in David a paina peuhpeuhah gualzo sak hi.

¹⁵Tua ahih ciangin David in Israel-te khempeuh uk a, a mite khempeuh tungah thutang le thuman a zang hi.

¹⁶Zeruiah’ tapa Joab in galkapte uk hi. Ahilud’ tapa Jehoshafat thu ciamteh pa ahi hi.

¹⁷Ahitub’ tapa Zadok le Abiathar’ tapa Ahimelek siampi ahi uh hi. Seraiah lai-at pa ahi hi.

¹⁸Jehoiada’ tapa Benaiah in Khereth mite le Peleth mite uk uh hi. David’ tapate pen siampite ahi uh hi.