Read Tedim Chin 1 KUMPI MASATE 1 Bible Online

1 KUMPI MASATE 1 - Tedim Chin bible

1 KUMPI MASATE 1

¹Tu-in Kumpi David teekin kum tam ta hi. Amaute in amah puan a silhsak uh hangin a khua lum thei lo hi.

²Tua ahih ciangin a nasemte in ama kiangah, “Ka to kumpipa a dingin nungakno khat kizong hen la, amah in kumpipa enin amah a kemnu hita hen. Ka to kumpipa a khua a lum theih nadingin na ang sungah tua nu lum hen,” a ci uh hi.

³Tua ahih ciangin amaute in Israel gam sung khempeuhah nungak melhoih khat zong uh a, Shunem mi Abishag mu-in, kumpipa kiangah amah paipih uh hi.

⁴Tua nungak melhoih mahmah a, kumpipa a kemnu suakin ama na a sem hi. A lupkhawm uh hangin kumpipa in amah hih zo lo hi.

⁵Tu-in David in Haggith tawh a neih a tapa Adonijah amahmah kiliansak tawmin, “Keimah, kumpi ka hi ding hi,” a ci hi. Amah in ama a dingin leengte le sakol tung tuangte, le ama mai-ah a tai ding mihing sawmnga vaihawm hi.

⁶A pa David in, “Bang hangin tua bang tua bangin gamta na hi hiam?” ci-a dotna tawh khatvei beek amah tai ngei lo hi. Amah pen a melhoih mahmah mi khat zong ahi hi. Amah pen Absalom zom a suak ahi hi.

⁷Amah in Zeruiah’ tapa Joab le siampi Abiathar tawh vaihawm hi. Amaute in Adonijah zui-in amah panpih uh hi.

⁸Ahih hangin siampi Zadok, le Jehoiada’ tapa Benaiah, le David’ mi a thahatte in Adonijah panpih lo uh hi.

⁹Adonijah in Enrogel gei-a om Gulpi’ Suangpi kiangah tuute, bawngtalte, le ganno thaute biakna-in pia-in, amah in kumpipa’ tapate ahi a sanggamte khempeuh le Judah gam kumpi uliante khempeuh sam a,

¹⁰ahih hangin kamsangpa Nathan ahi a, Benaiah ahi a, mi thahatte ahi a, a sanggampa Solomon ahi zongin sam lo hi.

¹¹Tua ciangin Nathan in Solomon’ nu Bathsheba kiangah, “Haggith’ tapa Adonijah kumpi suak khinin, David in tua thu a theih lohna thu za nai lo na hi hiam?

¹²Tua ahih ciangin tu-in hong pai in. Nangma nuntakna le na tapa Solomon’ nuntakna na suahtaksak theih nadingin nang tungah ngaihsutna kong pia ding hi.

¹³Thakhatin Kumpi David kiangah pai-in ama tungah, ‘Ka to kumpipa in na nasemnu’ tungah hong kiciamin, “Na tapa Solomon pen keima nungah maangin, keima kumpi tokhom tungah tu ding hi,” ci hi lo na hi hiam? Tua ahih ciangin bang hangin Adonijah kumpi suak ahi hiam?’ ci in.

¹⁴Tua ciangin kumpipa kiangah thu na gen laitakin kei zong nangma nungah hong pai-in nangma thugen teng kong panpih ding hi,” a ci hi.

¹⁵Tua ahih ciangin Bathsheba a inndei sung kumpipa kiangah va pai hi (tu-in kumpipa teek mahmah a, Shunem mi Abishag in kumpipa’ na sem hi.)

¹⁶Bathsheba kunin kumpipa tungah zahtakna bawl a, kumpipa in, “Bang deih na hi hiam?” a ci hi.

¹⁷Tua nu in ama kiangah, “Ka topa aw, na nasemnu tungah TOPA na Pasian’ min tawh kiciamin, ‘Na tapa Solomon pen keima nungah maangin, keima kumpi tokhom tungah tu ding hi,’ na ci hi.

¹⁸Tu-in en in, ka to kumpipa in na theih loh hangin, Adonijah kumpi ahi hi.

¹⁹Amah in biakna-in bawngtalte, ganno thaute, le tuute, tampi tak pia khin a, kumpipa’ tapate khempeuh, siampi Abiathar, le galkapte a ukpa Joab sam a, ahih hangin amah in na nasempa Solomon sam lo hi.

²⁰Ka to kumpipa aw, tu-in nangma nungah ka to kumpipa’ tokhom tungah kua tu ding, ci-a amaute kiangah na gen ding ngakin Israel-te khempeuh in nang hong en uh hi.

²¹Tua bang hikeileh ka to kumpipa na bei ciangin kei le ka tapa Solomon a khialin a hong kiseh hun hong tung ding hi,” a ci hi.

²²Kumpipa tawh tua nu kiho-in a om laitakin kamsangpa Nathan hong tum hi.

²³Kumpipa kiangah, “Hih lai-ah kamsangpa Nathan om hi,” ci-in a kigen hi. Kumpipa mai-ah amah hong pai ciangin a mai leilam ngatin kumpipa’ mai-ah a kun hi.

²⁴Tua ciangin Nathan in, “Ka to kumpipa aw, ‘Keima nungah Adonijah maangin ka kumpi tokhom tungah tu ding hi,’ ci na hi hiam?

²⁵Bang hang hiam cih leh tuni-in amah paisuk khinin, bawngtalte, ganno thaute, le tuute, tampi tak biakna-in pia a, kumpipa’ tapate khempeuh, galkapte a ukpa Joab, le siampi Abiathar sam hi. Amaute in ama a’ ding pawi bawl uh a, ‘Kumpi Adonijah a khansau hen!’ ci uh hi.

²⁶Ahih hangin na nasempa keimah, le siampi Zadok, le Jehoiada’ tapa Benaiah, le na nasempa Solomon, amah in hong sam lo hi.

²⁷Ka to kumpipa in hih thu thukimpihin, nangma khit ciangin ka to kumpipa’ tokhom tungah kua tu ding cih thu na nasem kote’ kiangah hong im na hi hiam?” a ci hi.

²⁸Tua ciangin Kumpi David in dawngin, “Bathsheba ka kiangah hong samkik in,” a ci hi. Tua ahih ciangin kumpipa omna-ah tua nu hong pai-in, kumpipa’ mai-ah a ding hi.

²⁹Kumpipa kiciamin, “Haksatna khempeuh panin kei a hong honkhia TOPA a nungta ahih mah bangin,

³⁰nangma tungah TOPA, Israel Pasian’ min tawh hong kiciamin, ‘Keima nungah ka tapa Solomon maang ding a, keima tangin ka kumpi tokhom tungah tu ding hi,’ ka cihsa mah bangin, tuni-in zong ka cikik hi,” a ci hi.

³¹Tua ciangin Bathsheba in leilam maingatin kunin kumpipa tungah zahtakna bawl a, “Ka to kumpi David nungta tawntung ta hen!” a ci hi.

³²Tua ciangin Kumpi David in siampi Zadok, kamsang Nathan, le Jehoiada’ tapa Benaiah samsak hi. Tua ahih ciangin kumpipa’ mai-ah amaute hong pai uh hi.

³³Kumpipa in amaute kiangah, “Na topa’ nasemte paipih unla, ka tapa Solomon keima la-sakol tungah tuangsakin Gihon-ah paipihsuk un.

³⁴Israel-te’ tungah kumpi-in tua lai munah siampi Zadok le kamsang Nathan sathau nilhsak un. Tua ciangin peengkul tum unla, ‘Kumpi Solomon khansau hen!’ ci un.

³⁵Tua ciangin ama nungah note nong pai ding uh a, amah hong pai-in ka kumpi tokhom tungah hong tu ding hi; bang hang hiam cih leh keima tangin amah kumpi hi ding hi. Israel le Judah a ukpa dingin amah ka seh khinzo hi,” a ci hi.

³⁶Tua ciangin Jehoiada’ tapa Benaiah in dawngin, “Hi ta hen! TOPA, ka to kumpipa’ Pasian in tua bangin kipsak tahen.

³⁷TOPA in ka to kumpipa a ompih mah bangin Solomon zong ompih hen la, ka to Kumpi David’ tokhom sangin ama tokhom lianzaw sak hen,” a ci hi.

³⁸Tua ahih ciangin Zadok, kamsang Nathan, Jehoiada’ tapa Benaiah, le Khereth mite le Peleth mite paisukin Kumpi David’ la-sakol tungah Solomon tuangsak uh a, Gihon-ah amah paipih uh hi.

³⁹Tua lai-ah siampi Zadok in puanbuk panin sathau biing la-in Solomon a nilh hi. Tua ciangin amaute in peengkul tum uh hi. Tua ciangin mi khempeuh in, “Kumpi Solomon khansau hen!” a ci uh hi.

⁴⁰Tua ciangin mi khempeuh ama nungah pai-in tamngaikop tum uh a, nakpitakin lungdam uh a, amau’ gamlumna in lei a thawnkham hi.

⁴¹Adonijah le amah tawh a om leenglate khempeuh in a pawi bawl a man khit uh ciangin hih thu za uh hi. Joab in peengkul aw a zak ciangin amah in, “Khuapi sungah hih gamlumna bang a cihnopna ahi hiam?” a ci hi.

⁴²Amah a kampau laitakin, siampi Abiathar’ tapa Jonathan hong pai hi. Tua ciangin Adonijah in, “Hong tum in; bang hang hiam cih leh nang migina na hi a, thuhoih nong puak hi,” a ci hi.

⁴³Jonathan in Adonijah dawngin, “Hilo hi; bang hang hiam cih leh i to kumpi David in kumpi-in Solomon bawl khin hi.

⁴⁴Kumpipa in amah tawh siampi Zadok, kamsang Nathan, le Jehoiada’ tapa Benaiah, le Khereth mite le Peleth mite sawl khin hi. Amaute in kumpipa’ la-sakol tungah amah tuangsak khin uh hi.

⁴⁵Siampi Zadok le kamsang Nathan in Gihon-ah kumpi-in amah sathau nilh khin uh hi. Tua lai panin amaute lungdamin ciahkhin uh ahih manin khuapi sung gamlum hi. Nangma zak pen hih gamlumna ahi hi.

⁴⁶Tu-in Solomon in kumpi tokhom luah khinta hi.

⁴⁷Tua tham loin kumpipa’ nasemte i to Kumpi David tungah lungdamna a ko dingin pai uh a, ‘Na Pasian in nangma min sangin Solomon’ min a thangzaw-in bawl hen la, nangma tokhom sangin ama tokhom a lianzaw-in bawl ta hen,’ ci uh hi. A lupna tung panin kumpipa mahmah zong kun hi.

⁴⁸Kumpipa in zong, ‘Keima mit-a ka muhin keima suanlekhakte khat ka kumpi tokhom tungah a tu dingin tuni-in a pia TOPA, Israel Pasian in thupha ngah ta hen,’ ci hi,” a ci hi.

⁴⁹Tua ciangin Adonijah’ leenglate khempeuh ling uh a, dingin amau’ mun ciatah a ciah uh hi.

⁵⁰Tua ciangin Adonijah in Solomon kihta hi. Amah pai-in biakna tau kite pom hi.

⁵¹Tua ciangin Solomon kiangah, “Adonijah in Kumpi Solomon hong kihta hi. Amah in biakna tau kite lenin, ‘Amah in a nasempa namsau tawh a thahloh nading kei tungah Kumpi Solomon hong kiciam masa hen,’ ci hi,” kici hi.

⁵²Tua ciangin Solomon in, “Amah in a kilawm mi ahihna a lahtel theih leh ama samzang khat zong leilakah kialo ding a, ahi zongin ama sungah gitlohna a kimuh leh amah si ding hi,” a ci hi.

⁵³Tua ahih ciangin Kumpi Solomon in mi sawl a, amaute in zong biakna tau panin amah paikhiatpih uh hi. Amah hong pai-in Kumpi Solomon’ tungah zahtakna bawl hi. Tua ciangin Solomon in ama kiangah, “Na inn-ah ciah in,” a ci hi.