Read Tedim Chin 1 KUMPI MASATE 10 Bible Online

1 KUMPI MASATE 10 - Tedim Chin bible

1 KUMPI MASATE 10

¹Tu-in Sheba kumpinu in TOPA’ min tawh kisai-in Solomon’ minthanna a zak ciangin thudotna haksate tawh amah a ze-et dingin hong pai hi.

²Amah nungzui honpi, a namtui nate a pua kalaohte, kham tampi, le suangmanpha tampi tawh Jerusalem-ah hong pai a, Solomon’ kiangah a tun ciangin amah in a lungsim a om khempeuh Solomon tungah a gen hi.

³Tua ciangin Solomon in ama dotna khempeuh dawng hi. Kumpipa in ama tungah a gentel theih loh, haksa lua a sak bangmah om lo hi.

⁴Sheba kumpinu in Solomon’ pilna, ama lamsa a inn,

⁵a sabuai-ah a an, a uliante’ omzia, le a nasemte’ etna, a puante uh, a an piate, le TOPA’ biakinn-ah a piak meihal biaknate khempeuh a muh khit ciangin lamdang a sa mahmah hi.

⁶Tua ciangin amah in kumpipa kiangah, “Ka gam sung panin nangma thu le na pilna ka zak a kigen thute man mahmah hi.

⁷Kei hong pai-in keima mit in a muh mateng a kigente ka um kei hi. Ahi zongin alang zong kei tungah hong kigen lo na hi a, na pilna le na daupaina in ka zak thute vuknelh hi.

⁸Na zite a hampha mahmah hi a, na mai-ah ding tawntungin na pilna a za hih na nasemte zong hampha mahmah uh hi.

⁹Nang tungah lungdamin Israel kumpi tokhom tungah nang a hong koih TOPA na Pasian in thupha ngah ta hen! TOPA in Israel it tawntung ahih manin nangmah in thutang le thuman na sepkhiat theih nadingin amah in kumpi-in nang hong bawl hi,” a ci hi.

¹⁰Tua ciangin amah in kumpipa tungah kham talen za le sawmnih, le a namtui nate tampi tak, le suangmanphate a pia hi. Sheba kumpinu in Kumpi Solomon tungah a piak hih banga a tam a namtui nate hong pai ngei nawn lo hi.

¹¹Tua tham loin Ofir panin kham hong pua Hiram’ teembaw honte in Ofir panin cingsing le suangmanpha tampi tak hong pua uh hi.

¹²Tua ciangin kumpipa in cingsingte TOPA’ biakinn le kumpipa’ innkhuamte, lasate a dingin laiza lasakna le harp lasakna-in bawl hi. Tuni dongin tua bang cingsing hoihte hong tungkik ngei lo, kimu ngei nawn lo hi.

¹³Tua ciangin Kumpi Solomon in citna tawh ama tungah a piak banah ama deih a nget khempeuh zong Sheba kumpinu tungah a pia hi. Tua ahih ciangin amah le a nasemte a gam uhah a ciahkik uh hi.

¹⁴Tu-in sumbawlte le sumbukte, Arabia kumpi khempeuh le gam sung a ukte tung panin a ngahte banah kum khatin Solomon tungah a tung kham a gihna pen talen zaguk le sawmguk le guk ahi hi.

¹⁶Kumpi Solomon in a kiseek kham tawh kibawl lum lianpi zanih bawl a, lum khatah kham shekel zaguk bei hi.

¹⁷Tua ciangin amah in a kiseek kham tawh kibawl lum zathum bawl a, lum khat ciangin kham mina thum bei hi. Tua ciangin kumpipa in Lebanon Tulak Inn a kici sungah tuate koih hi.

¹⁸Kumpipa in saiha kumpi tokhom a lian khat zong bawl a, kham hoihpente tawh tua tokhom zut hi.

¹⁹Kumpi tokhom in kahlei cial guk nei-in, kumpi tokhom nungah bawngno lutang khat om a, a tutna pang tuakah ban ngakna omin ban ngaknate pangah humpinelkai nih ding a,

²⁰kahlei cial gukte’ mong ciatah khat ciat a om humpinelkai sawm le nih ding hi. Kumpi gam sung khat peuhpeuhah tua tawh a kibang kibawl ngei lo hi.

²¹Kumpi Solomon’ tuidawnna haite khempeuh kham hi a, Lebanon Tulak Inn sunga om haite khempeuh kham citak hi a, khat zong ngun hi lo hi. Solomon’ hun lai-in ngun bangmahin kingaihsun lo hi.

²²Bang hang hiam cih leh kumpipa in Hiram’ teembaw honte tawh Tarshish teembaw honkhat tuipi-ah a pai nei hi. Tarshish teembaw honte kum thumin khatvei hong pai-in kham, ngun, saiha, zawngmaw, le utongte hong puak zel hi.

²³Tua bangin Kumpi Solomon in hauhna le pilna tawh leitung kumpi khempeuh khumkhelh hi.

²⁴Tua ciangin Pasian in ama lungsim sunga a koih ama pilna a ngai dingin leitung mi buppi in Solomon’ omna zong uh hi.

²⁵Amaute khempeuh in letsong, ngun le kham tawh kibawl nate, puante, myrrh paknamtui, a namtui nate, sakolte, le la-sakolte, a kumkumin tampi tak hong puak uh hi.

²⁶Tua ciangin Solomon in leengte le sakol tung tuangte khawm hi. Amah in leeng tul le zali le tuanna sakol tul sawm le tulnih nei a, amah in tuate, leeng khuapite le Jerusalem-ah zattawm dingin a koih hi.

²⁷Kumpipa in Jerusalem-ah suang bangin ngun olsak a, amah in Shefelah theithek sing bangin taamtak sing tamsak hi.

²⁸Solomon’ sakol lakte Egypt le Kue pan hi a, kumpipa’ sumbawlte in Kue-ah a man pia-in tuate ngah uh hi.

²⁹Egypt panin leeng khat ciangin ngun shekel zaguk, sakol khat ciangin za le sawmnga-in kingah hi. Tua ahih ciangin kumpipa’ sumbawlte in Hit kumpite le Syria kumpite khempeuh tungah zuakkhia uh hi.