Read Tedim Chin 1 KUMPI MASATE 11 Bible Online

1 KUMPI MASATE 11 - Tedim Chin bible

1 KUMPI MASATE 11

¹Tu-in Kumpi Solomon in gamdang numei tampi ngai hi. Faro’ tanu, le Moab mi, Ammon mi, Edom mi, Sidon mi, le Hit numeite,

²TOPA in Israel mite tungah, “Amaute tawh na kiteng kei ding uh hi. Bang hang hiam cih leh amaute in amau’ pasian’ lamah na lungsim uh hong heikhia taktak ding uh hi,” a cih minamte’ lak pan lawm ngai a, Solomon in hih mite ngai-in pom hi.

³Amah in kumpite’ tanu vive zi zasagih, le zineu zathum nei hi. A zite in ama lungsim heikhia uh hi.

⁴Bang hang hiam cih leh Solomon a teek ciangin a zite in pasian dangte’ lamah ama lungsim heikhia uh a, ama pa David’ lungsim bangin ama lungsim TOPA’ tungah thuman bup taktak zo lo hi.

⁵Bang hang hiam cih leh Sidon mite’ nusian Ashtoreth, le Ammon mite a’ ahi a kihhuai Milkom, Solomon in bia hi.

⁶Tua ahih ciangin TOPA’ muhna-ah Solomon a sia gamta a, a pa David bangin TOPA zuibup lo hi.

⁷Tua ciangin Solomon in Jerusalem nisuahna lam mualtungah Moab mite a’ ahi a kihhuai Khemosh le Ammon mite a’ ahi a kihhuai Molek a dingin mualtung a biakna khat a lam hi.

⁸Tua mah bangin amah in paknamtui halin a pasian-te uh tungah biakna a pia a gamdang zite khempeuh a dingin hihsak hi.

⁹Ama tungah nihvei kilak khinin, amah in pasian dangte’ nung a zuih loh nading ama tungah thu a pia khin TOPA, Israel Pasian panin a lungsim kiheikhia ahih manin Solomon tungah TOPA heh hi. Ahih hangin amah in TOPA’ thupiaksa zui tuan lo hi.

¹¹Tua ahih ciangin TOPA in Solomon kiangah, “Hih pen nangma ngaihsutna hi-in, nang kong piaksa ka thuciamna le ka thukhamte zui lo na hih ciangin, keimah in nangma tung panin na kumpi gam balkekin na nasempa tungah ka pia taktak ding hi.

¹²Ahi zongin na pa David’ hangin nangma hun sungin ka hih kei ding a, na tapa’ khutsung panin ka balkhia ding hi.

¹³Ahi zongin kumpi gam khempeuh ka balkhia kei ding hi. Ka nasempa David hang le ka teelsa Jerusalem hangin na tapa’ tungah minam khat ka pia lai ding hi,” a ci hi.

¹⁴Tua ciangin TOPA in Solomon a langpang ding Edom mi Hadad khangsak hi. Amah pen Edom kumpi innkuansung mi khat ahi hi.

¹⁵Bang hang hiam cih leh Edom-ah David a omlai, a site a vui dingin galkap a ukpa Joab a paitoh lai-in Edom sunga pasal khempeuh amah in that hi.

¹⁶(Bang hang hiam cih leh Joab in Edom sunga pasal khempeuh a suksiat khit matengin amah le Israel-te khempeuh tua lai-ah kha guk sung om uh hi).

¹⁷Ahih hangin Hadad naupangno ahih lai-in, a pa’ nasem Edom mite pawlkhat tawh Egypt-ah a tai hi.

¹⁸Amaute Midian panin dingkhia-in Paran tung uh a, Paran panin mi zawnin tonpih a, ama tungah inn khat pia-in, annek ding pia-in, leitang a pia Egypt kumpipa Faro kiang Egypt gam tung uh hi.

¹⁹Hadad in Faro’ mai-ah maipha lianpi mu a, amah in ama zi Tahpenes’ sanggamnu tawh kitengsak hi.

²⁰Tua ciangin Tahpenes sanggamnu in amah tawh tapa Genubath nei a, Tahpenes in Faro’ inn-ah a naupang khoi hi. Faro’ inn sungah Faro’ tapate tawh Genubath om hi.

²¹Ahih hangin Hadad in David le galkap a ukpa Joab a sihna thu Egypt panin a zak ciangin Faro’ kiangah, “Keima gamah ka ciah theih nadingin hong paikhiasak in,” a ci hi.

²²Ahih hangin Faro in ama kiangah, “Nangma gamah ciah ding na hanciam nadingin kei tawh na omna-ah bang kitangsapna nei na hi hiam?” a ci hi. Ahi zongin amah in Faro’ kiangah, “Hong paisak hoh in,” a ci hi.

²³Tua ciangin Pasian in ama topa ahi Zobah kumpi Hadadezer kiang panin a tai Eliada tapa Rezon zong Solomon a langpang dingin a khangsak hi.

²⁴Amah in ama kiimah mi khawmin mite’ na a sut pawl a makai a suak hi. Amaute Damaskas-ah pai-in tua lai munah teng uh a, Damaskas-ah amah kumpi-in bawl uh hi.

²⁵Hadad mah bangin Solomon’ hun sung khempeuh Israel-te a langpangin amah omin siatna a bawl hi. Amah in Israel mite mudah a, Syria gamah a uk hi.

²⁶Solomon’ nasem, Zeredah khuasunga om Efraim mi, Nebat’ tapa, a nu’ min Zeruah hi-in meigong ahi, Jeroboam in zong kumpipa lehdo hi.

²⁷Amah in kumpipa a lehdona thu hih bang ahi hi: Solomon in Millo lamin a pa David’ khuapi a vangte a hu hi.

²⁸Jeroboam pen nasep siam mahmah khat hi a, Solomon in hih a khangno mipa a kizen mi hi, ci-in a theih ciangin Josef minam aana tawh na a semte tungah a ukin a bawl hi.

²⁹Tua hun sungin Jerusalem panin Jeroboam a paikhiat ciangin Shiloh khuami kamsang Ahijah in lampi-ah amah na dawn hi. Ahijah in puan thak khat na silhtawm a, amau nih tegel bek gamlakah om uh hi.

³⁰Tua ciangin Ahijah in ama tungah a silh a puan thak lenin seh sawm le nih suahin a balkek hi.

³¹Tua ciangin amah in Jeroboam kiangah, “Nang a dingin bek sawm la in; bang hang hiam cih leh Israel Pasian, TOPA in hih bangin ci hi, ‘En in, Solomon’ khut panin kumpi gam a balkhia ding ka hi a, nangma tungah minam sawm kong pia ding hi.

³²(Ahih hangin ka nasem David le Israel minam khempeuh sung panin ka teelsa khuapi Jerusalem hangin amah in minam khat nei ding hi).

³³Bang hang hiam cih leh amah in kei hong nusia a, Sidon mite’ nusian Ashtoreth, Moab pasian Khemosh, le Ammon mite’ pasian Milkom bia-in, a pa David bangin keima muhna-ah a manin gamtatna le ka thukhamte le ka ngeina kipte zui loin ka thu hong nial hi.

³⁴Ahi zongin ama khutsung panin kumpi gambup ka lakhia kei ding hi. Ka thupiaknate le ka thukhamte a zui, ka teel ka nasem David’ hangin a nuntak sung tawntung ukpa-in amah ka bawl ding hi.

³⁵Ahih hangin ama tapa’ khutsung panin kumpi gam la-in nangma tungah minam sawm kong pia ding hi.

³⁶Ahi zongin ka min koih nadingin ka teelsa khuapi Jerusalem-ah ka nasempa David in keima mai-ah suanlekhak a neih tawntung theih nadingin a tapa tungah minam khat ka pia ding hi.

³⁷Tua ciangin keimah in nang hong la-in na deih khempeuh tungah na uk ding a, nang pen Israel tungah kumpi na hi ding hi.

³⁸Ka nasempa David bangin ka thukhamte zuihna tawh nang kong thupiak khempeuh ngai-in, ka thu hong zui-in, ka muhna-ah a manin na gamtat leh, nang tawh hong omkhawmin, David a dingin ka hih bangin nangma tungah Israel mite ka hong pia ding a, na suanlekhakte in zong uk paisuak ding hi.

³⁹Hih thu hangin David’ suanlekhakte ka gimsak ding a, ahih hangin a tawntung ding hi lo hi,’ ci hi,” a ci hi.

⁴⁰Tua ahih ciangin Solomon in Jeroboam thah dingin zong hi. Ahih hangin Jeroboam dingin Egypt kumpipa Shishak kiangah tai a, Solomon’ sih mateng Egypt-ah a om hi.

⁴¹Tu-in Solomon’ sep a omlaite, le a hih khempeuh, le a pilna, Solomon’ Nasepna Laibu sungah kigelh hi.

⁴²Jerusalem panin Israel-te khempeuh tungah Solomon in a uk hun kum sawmli sung ahi hi.

⁴³Tua ciangin Solomon si a, a pa David khuapi sungah kivui hi. Tua ciangin ama tangin a tapa Rehoboam in uk hi.