Read Tedim Chin 1 KUMPI MASATE 12 Bible Online

1 KUMPI MASATE 12 - Tedim Chin bible

1 KUMPI MASATE 12

¹Shekhem-ah Rehoboam pai hi. Bang hang hiam cih leh amah kumpi a suaksak Israel mi khempeuh Shekhem-ah hong pai uh hi.

²Nebat’ tapa Jeroboam in tua thu a zak ciangin (bang hang hiam cih leh kumpi Solomon kiang panin a taina Egypt-ah amah omlai hi), Egypt panin hong ciahkik hi.

³Tua ciangin amaute in mi sawlin amah sam uh hi. Tua ciangin Jeroboam le a kikhawm khempeuhte hong pai-in Rehoboam kiangah,

⁴“Na pa in kote hong gimbawlin vangikpi hong suan hi. Tua ahih ciangin tu-in na pa’ nasep haksate le kote tungah a giklua thuhaksate zangsak in. Tua hileh kote in nangma na kong sem ding uh hi,” a ci uh hi.

⁵Amah in amaute kiangah, “Ni thum sung va kihem unla, tua ciangin kei kiangah hong paikik un,” a ci hi. Tua ahih ciangin mite paikhia uh hi.

⁶Tua ciangin Kumpi Rehoboam in a pa Solomon a nuntak lai-in ama mai-ah a ding ngei khangham mite thu dongin, “Hih mite ka dawn nading ngaihsutna hong bangci piak ding na hi uh hiam?” a ci hi.

⁷Tua ciangin amaute in ama kiangah, “Nangmah in tuni-in hih mite’ deihna bang zui inla, amaute na dawn ciangin kamhoih pau lecin, amaute pen a tawntungin nangma nasemte hi ding uh hi,” a ci uh hi.

⁸Ahih hangin khanghamte in ama tungah ngaihsutna a piakte nusia-in, amah tawh a khangkhawm ama mai-ah a ding khangnote thu dong hi.

⁹Amah in amaute kiangah, “‘Na pa in kote tungah hong suat vangik zangsak in,’ kei tungah hong ci hih mite i dawn nading ngaihsutna hong bangci piak ding na hi uh hiam?” a ci hi.

¹⁰Tua ciangin amah tawh a khangkhawm khangnote in ama kiangah, “Nang kiangah, ‘Na pa in vangikpi hong puasak ahih manin kote a dingin hong zangsak in,’ hong ci hih mite kiangah hih bangin na gen ding hi. Amaute kiangah, ‘Ka khutmeno pen ka pa’ kawng sangin golzaw hi.

¹¹Tu-in ka pa in note tungah vangik hong suat banah kong behlap lai ding hi. Ka pa in ciang tawh note hong thuhilh hi. Ahih hangin keimah in ciang lingnei tawh note kong thuhilh ding hi,’ na ci ding hi,” a ci uh hi.

¹²Tua ahih ciangin kumpipa in, “Ni thum ni-in ka kiangah hong paikik un,” a cih mah bangin Jeroboam le mi khempeuh a ni thum ni-in Rehoboam kiangah hong pai uh hi.

¹³Tua ciangin kumpipa in mite ngawhdawn a, khangham mite in ama tungah ngaihsutna a piakte nusia-in,

¹⁴khangnote’ ngaihsut piakna tawh kizui-in amaute kiangah thu gen a, “Ka pa in note’ tungah vangik hong suat banah keimah in ka hong behlap lai ding hi. Ka pa in ciang bek tawh note hong thuhilh hi. Ahih hangin keimah in ciang lingnei tawh note kong thuhilh ding hi,” a ci hi.

¹⁵Tua bangin kumpipa in mite’ deihna zui lo hi. Bang hang hiam cih leh TOPA in Shiloh khuami Ahijah’ tungtawnin Nebat’ tapa Jeroboam’ tungah a gensa thu a tunsak nadingin TOPA in a piansak thu kiheina ahi hi.

¹⁶Kumpipa in amau’ thu a ngaih lohna Israel-te khempeuh in a muh uh ciangin mite in kumpipa dawng uh a, “David sungah kote in bang ngah nei ka hi uh hiam? Jessi tapa sungah gamhluah ka nei kei uh hi. Israel-te aw, na inn ciat uhah ciah un. Rehoboam in ama a’ ding vaihawmtawm ta hen,” a ci uh hi. Tua ahih ciangin Israel-te a inn ciat uhah kihem uh hi.

¹⁷Ahih hangin Rehoboam in Judah khuapite sungah a teng Israel mite a uk hi.

¹⁸Tua ciangin Kumpi Rehoboam in aana tawh nasemte a uk Adoram, Israel-te tawh a kimu dingin sawl a, ahi zongin amaute in amah suang tawh na denglum uh hi. Tua ciangin Jerusalem-ah a tai dingin Kumpi Rehoboam a sakol leeng-ah a tuang dingin nawhtai hi.

¹⁹Tua ahih ciangin tuni dongin leilulam Israel-te in David’ suante’ ukna lehdo uh hi.

²⁰Jeroboam hong ciahkik khitna thu Israel-te khempeuh in a zak uh ciangin amaute in mi sawlin kikhopna-ah amah samsak uh a, Israel-te khempeuh tungah kumpi-in amah a bawl uh hi. David’ suante a zui kuamah dang om lo a, Judah minam bek in a zui uh hi.

²¹Jerusalem-ah Rehoboam a tun ciangin, a kumpi gam a ngahkikna dingin Israel mite a sim dingin Judah minam khempeuh, le Benjamin minam, a kiteel galhang mi tul zakhat le tul sawmgiat a khawm hi.

²²Ahih hangin Pasian’ mi Shemaiah’ tungah Pasian’ thu hong tung hi:

²³“Judah kumpipa, Solomon’ tapa Rehoboam tung, le Judah le Benjamin minam khempeuh tung, le a omlai midang khempeuh tungah gen in.

²⁴‘TOPA in hih bangin ci hi: Note na kuanto kei ding uh a, na beh uh ahi Israel-te na do kei ding uh hi. Mi khempeuh a inn ciat uhah ciah hen. Hih thu pen keima vaihawm ahi hi,’ ci hi,” a ci hi. Tua ahih ciangin amaute in TOPA’ thu ngai uh a, TOPA’ thugen bangin inn-ah a ciahkik uh hi.

²⁵Tua ciangin Jeroboam in Efraim mualtung gam sungah Shekhem khua phutin tua lai-ah tawlkhat sung a teng hi. Tua ciangin amah paikhia-in Penuel a puah hi.

²⁶Tua ciangin Jeroboam in a lungsim sungah, “Tu-in kumpi gam pen David’ suante’ tungah kiheikik khathei ding hi.

²⁷Jerusalem-a TOPA’ biakinn-ah biakna pia dingin hih mite paito leh, hih mite’ lungsim Judah kumpi Rehoboam, a topa uh lamah kiheikik kha ding a, amaute in kei hong thatin Judah kumpi Rehoboam kiangah ciahkik ding uh hi,” ci hi.

²⁸Tua ahih ciangin kumpipa in thu kikupna khat bawl a, tua ciangin kham bawngno nih bawl hi. Tua ciangin amah in mite kiangah, “Jerusalem-ah sauvei khop na pai khinta uh hi. Israel mite aw, Egypt leitang panin note hong paikhiatpih na pasian-te uh en un,” a ci hi.

²⁹Amah in Bethel-ah khat koihin, Dan-ah adang khat a koih hi.

³⁰Hih na pen khialhna khat a suak hi. Bang hang hiam cih leh mite Bethel-a bia ding le Dan-a bia dingin a gamla pekah va pai uh hi.

³¹Amah in mual dawnte-ah zong biak nading inn lamin mite khempeuh lak panin Levi mi ahi lo mite siampi-in a seh hi.

³²Tua ciangin Jeroboam in Judah a om pawi tawh a kibangin a kha giatna a ni sawm le nga ni-in pawi khat bawl a, biakna tau tungah biaknate a pia hi. Tua mah bangin amah in Bethel-ah bawlin ama bawlsa bawngno milimte tungah biakna a pia hi. Tua ciangin amah in ama bawlsa mualtung a biakna siampite Bethel-ah a koih hi.

³³A kha giatna a ni sawm le nga ni, ama deih kha sungin Bethel-a ama bawlsa biakna tau-ah amah paito hi. Amah in Israel mite a dingin pawi khat kipsak a, paknamtui hal dingin biakna tau-ah a paito hi.