Read Tedim Chin 1 KUMPI MASATE 14 Bible Online

1 KUMPI MASATE 14 - Tedim Chin bible

1 KUMPI MASATE 14

¹Tua hun laitakin Jeroboam’ tapa Abijah a ci na hi.

²Jeroboam in a zi kiangah, “Ding inla, na mel kiseelin Jeroboam’ zi na hihlam kitheisak kei inla, Shiloh-ah va pai in. Hih mite tungah kumpi ka hih nading thu a gen kamsangpa Ahijah tua lai-ah om hi.

³Anlum sawm, moh pawlkhat, khuaizu thawl khat keng inla ama kiangah va pai in. Naupang tungah a piang ding thu amah in nang kiangah hong gen ding hi,” a ci hi.

⁴Jeroboam’ zi tua bangmahin gamta hi. Amah kithawi-in Shiloh-ah pai a, Ahijah’ inn va tung hi. A khanghamna hangin a mitte maang ahih manin Ahijah in khua mu thei lo hi.

⁵Tua ciangin TOPA in Ahijah kiangah, “En in, a tapa tawh kisai nangma kiangah thu a dong dingin Jeroboam’ zi hong pai hi. Bang hang hiam cih leh a tapa a ci na hi. Tua bang tua bangin tua nu tungah na gen ding hi,” a ci hi. Amah hong pai ciangin numei dang khatin kineih hi.

⁶Ahih hangin Ahijah in amah kongkhak hong tun a kheging a zak ciangin, “Hong tum in Jeroboam’ zi aw, bang hangin midang khat kineih na hi hiam? Nang a dingin thugik khat kei tungah hong kipia hi.

⁷Pai inla Jeroboam kiangah hih bangin gen in, ‘Israel Pasian, TOPA in hih bangin ci hi: “Mite lak panin nang hong liansakin ka mi Israel-te tungah makai-in kong bawl a,

⁸David’ suante’ tung panin kumpi gam balkhia-in nangma tungah kong pia hi. Ahi zongin nang pen ka thupiaknate zui-in, a lungsim khempeuh tawh kei hong zui-in ka muhna-ah a man nate bek a sem ka nasempa David na bang kei a,

⁹nangmah in na mai-a om mite khempeuh sangin siatna bawlzaw-in, pai-in pasian dangte le a kisung milimte nang a dingin bawlin ka hehna dingin nong phin a, na nung lamah kei nong paai hi.

¹⁰Tua ahih ciangin en in, mi khat in a bei matengin ek a haltum mah bangin Jeroboam innkuan tungah siatna tungsakin, sal le sal ahi lo mi a kibangin pasal khempeuh Jeroboam innkuan panin ka susia ding a, Israel sungah Jeroboam innkuan ka beisiangsak ding hi.

¹¹Tua ahih ciangin Jeroboam’ mi, khuapi sunga a si mi peuhpeuh uite in ne ding a, gamlakah a si mi peuhpeuh huihlak vasate in ne ding hi. Bang hang hiam cih leh TOPA in gen khin hi,” ci hi,’ ci-in a gen hi.

¹²“Tua ahih ciangin ding inla na inn-ah ciah in. Na khua na tun ciangin na tapa si ding hi.

¹³Tua ciangin Israel mi khempeuh ama hangin kapin vui ding uh hi. Bang hang hiam cih leh Israel Pasian, TOPA’ tungah a lungkimhuai na khat Jeroboam’ innkuan sung panin ama tungah kimu ahih manin Jeroboam sung panin amah bek mah hanah kivui ding hi.

¹⁴Tua tham loin tuni-in Jeroboam innkuan a beisak ding, Israel-te’ tungah kumpi khat TOPA in ama a dingin khangsak ding hi. Tua hun a kipan

¹⁵tui sunga pumpeeng a kilin’ mah bangin TOPA in Israel mite vatin amau pute pate tungah a piak hih gam hoih panin Israel zunglot ding a, Eufratis gun galkhatah amaute thehthang ding hi. Bang hang hiam cih leh amaute in Asherah milimte bawlin TOPA a heh nadingin phin uh hi.

¹⁶Tua ciangin ama khialhna le Israel-te a khialhsakna ahi Jeroboam’ khialhna hangin amah in Israel nusia ding hi,” a ci hi.

¹⁷Tua ciangin Jeroboam’ zi dingin kihemkhia a, Tirzah-ah a ciah hi. Amah inn tungin sangkil a kan laitakin naupang a si hi.

¹⁸Tua ciangin a nasem kamsang Ahijah tungtawnin TOPA’ thugenna tawh kizui-in Israel mi khempeuh in amah vui-in ama hangin a kap uh hi.

¹⁹Tu-in Jeroboam’ gamtatna a omlaite, a galsimna le a gam uknate, Israel Kumpite’ Khang Tangthu Laibu sungah kigelh hi.

²⁰Jeroboam’ uk hun sung kum sawmnih le nih ahi hi. Tua ciangin amah si a, ama tangin a tapa Nadab in a uk hi.

²¹Tu-in Solomon’ tapa Rehoboam in Judah-ah uk hi. Gam uk dingin a kipatin Rehoboam kum sawmli le khat pha a, a min koih nadingin TOPA in Israel minam khempeuh sung panin a teelkhiat khuapi Jerusalem-ah amah in kum sawm le sagih sung uk hi. Ama nu a min Naamah hi a, Ammon mi ahi hi.

²²Tua ciangin Judah mite, TOPA’ muhna-ah a sia gamta uh a, a pu a pate khempeuh uh hih sangin a tamzaw-in amau’ khialhnate uh tawh ama hazat nading piangsak uh hi.

²³Bang hang hiam cih leh amaute in amau a dingin mualtung a biaknate, biakna songte le mual sang tung khempeuh le singniim nuai khempeuhah Asherah milimte bawl uh a,

²⁴biakna phualte-ah numei-pasal paktat pawlte zong om uh hi. TOPA in Israel mite’ mai-ah a hawlkhiat minam dangte’ gamtatna a kihhuai khempeuh bangin amaute gamta uh hi.

²⁵Kumpi Rehoboam’ kum ngana kumin Jerusalem a sim dingin Egypt kumpi Shishak hong kuanto hi.

²⁶Amah in TOPA’ biakinn-a van manphate le kumpipa’ inn-a van manphate lakhia hi. Amah in na khempeuh lakhia hi. Amah in Solomon’ bawlsa kham lumte khempeuh zong la hi.

²⁷Tua ciangin Kumpi Rehoboam in tuate’ tangin sumngo lumte bawl a, kumpipa’ inn kongkhak a cing inncing uliante’ khut sungah tuate a ap hi.

²⁸TOPA’ biakinn-ah kumpipa a pai simin inncingte in tuate pua-in, tua ciangin inncinna inndei sungah tuate koihkik zel uh hi.

²⁹Tu-in Rehoboam’ gamtatna a omlaite, le a sep khempeuh, Judah Kumpite’ Khang Tangthu Laibu sungah kigelh hi.

³⁰Tua ciangin Rehoboam le Jeroboam’ kikalah galkidona om tawntung hi.

³¹Tua ciangin Rehoboam si a, David khuapi sungah a pate tawh kivui hi. Ama nu a min Naamah hi a, Ammon mi ahi hi. Tua ciangin ama tangin a tapa Abijam in a uk hi.