Read Tedim Chin 1 KUMPI MASATE 15 Bible Online

1 KUMPI MASATE 15 - Tedim Chin bible

1 KUMPI MASATE 15

¹Tu-in Nebat’ tapa Kumpi Jeroboam’ kum sawm le giatna kumin Abijam in Judah tungah uk ding kipan hi.

²Amah in Jerusalem-ah kum thum sung uk hi. Ama nu’ min Maakah hi a, Absalom’ tanu ahi hi.

³Ama mai-a a pa’ khialhna khempeuh amah in zui hi. A pusawn David a thuman bangin TOPA a Pasian’ tungah a lungsim thuman bup lo hi.

⁴Ahi zongin David’ hangin TOPA a Pasian in Jerusalem-ah amah tapa khat pia a, ama khitah a tapa koihin Jerusalem kipsak hi.

⁵Bang hang hiam cih leh Hit mi Uriah thu-ah cih simloh ama nuntak sung tawntung TOPA’ mitah David a manin gamta-in a thupiakte khat peuhpeuh panin amah pial lo hi.

⁶Tu-in Abijam’ nuntak sung tawntung amah le Jeroboam’ kikalah kidona om hi.

⁷Abijam’ gamtatna a omlaite, le a sep khempeuh, Judah Kumpite’ Khang Tangthu Laibu sungah kigelh hi. Tua ciangin Abijam le Jeroboam kikalah galkidona om hi.

⁸Tua ciangin Abijam si a, amaute in David khuapi sungah amah vui uh hi. Ama tangin a tapa Asa in uk hi.

⁹Israel kumpi Jeroboam’ kum sawmnihna kumin Asa in Judah tungah uk ding kipan a,

¹⁰amah in Jerusalem-ah kum sawmli le khat sung uk hi. Ama pi’ min Maakah hi a, Absalom’ tanu ahi hi.

¹¹Ama pupi David a gamtat bangin TOPA’ muhna-ah Asa a manin gamta hi.

¹²Amah in gam sung panin pasal paktat pawlte koihkhia-in a pate’ bawlsa milim khempeuh khinkhia hi.

¹³Amah in Asherah milim dingin a kibawl a kihhuai milim khat nei ahih manin kumpinu’ nu hihna panin a pi Maakah zong khinkhia hi. Tua hi a, Asa in tua nu’ milim phukin Kidron lui-ah a hal hi.

¹⁴Ahih hangin mualtung a biaknate kilakhia lo hi. Ahi zongin ama hun sung khempeuh Asa’ lungsim TOPA’ tungah thuman bup hi.

¹⁵Tua ciangin amah in a pa’ apsa letsongte le ama apsa letsongte, ngun, kham, le nazatte TOPA’ biakinn sungah a paipih hi.

¹⁶Amau’ hun sung tawntung Asa le Israel kumpi Baasha kikalah galkidona om hi.

¹⁷Judah a sim dingin Israel kumpi Baasha kuanto a, Judah kumpi Asa kiang pan kuamah paikhia thei lo, kuamah a tum theih loh nadingin Ramah khua a lam hi.

¹⁸Tua ciangin Asa in TOPA’ biakinn sung vankoihna le kumpipa inn vankoihna sungah a omlai ngun le kham khempeuh la-in ama nasemte’ khut sungah tuate a pia hi. Tua ciangin kumpi Asa in Damaskas-ah a teng, Syria kumpi, Hezion’ tapa Tabrimmon, a tapa Benhadad kiangah tuate puak a,

¹⁹“Ka pa le na pa mah bangin kei le nang kikalah kipawlna khat omsak ni. Ngun le kham letsong nangma tungah kong puak hi. Keima kiang panin amah a nungkik theih nadingin Israel kumpi Baasha tawh na kipawlna va sutat in,” a ci hi.

²⁰Tua ciangin Benhadad in Kumpi Asa’ thu mang a, Israel khuapite a sim dingin a galkap a ukte sawlin, Ijon, Dan, Abelbethmaakah, le Khinneroth khempeuh, Naftali gam khempeuh tawh a zo hi.

²¹Baasha in tua thu a zak ciangin Ramah a lam khawlin Tirzah-ah om hi.

²²Tua ciangin kumpi Asa in Judah gam khempeuhah thu genzakna khat bawl a, kuamah peng loin a milipin Baasha in khua lamna-a a zat Ramah suangte le a singte a puakhia dingin a sawl hi. Tua ciangin kumpi Asa in tuate tawh Benjamin mite’ khua Geba le Mizpah khua a lam hi.

²³Tu-in Asa’ gamtatna a omlaite khempeuh, ama thahatna khempeuh, ama sep khempeuh, le ama lam khuapite, Judah Kumpite’ Khang Tangthu Laibu sungah kigelh hi. Ahih hangin a teek ciangin a khete-ah natna khat a nei hi.

²⁴Tua ciangin Asa si a, a pupi David khuapi sungah a pate tawh kivui hi. Tua ciangin ama tangin a tapa Jehoshafat in a uk hi.

²⁵Judah kumpi Asa’ kum nihna kumin Jeroboam’ tapa Nadab in Israel tungah uk ding kipan a, amah in Israel tungah kum nih sung uk hi.

²⁶TOPA’ muhna-ah amah a sia gamta a, a pa’ khekhap mah tawnin, Israel a khialhsakna ama khialhna mah a zui hi.

²⁷Issakhar minam Ahijah’ tapa Baasha in Nadab sawmsim hi. Baasha in Filistia-te’ khua Gibbethon-ah amah sattuk hi. Nadab le Israel khempeuh in Gibbethon umcihin a om laitakun a thah ahi hi.

²⁸Tua ahih ciangin Judah kumpi Asa’ kum thumna kumin Baasha in Nadab that a, Nadab tangin amah in a uk hi.

²⁹Amah kumpi ahih phetin Jeroboam’ innkuan khempeuh that hi. TOPA in Shiloh khuami a nasempa Ahijah tungtawnin a gensa bangin a vekpi-in a suksiat khit dongin mi khat zong Jeroboam’ innkuan-ah nusia lo hi.

³⁰Tua pen ama khialhna le Israel a khialhsakna ahi Jeroboam’ khialhnate hang le Israel Pasian, TOPA a hehsakna hang ahi hi.

³¹Tu-in Nadab’ gamtatna a omlaite, le a sep khempeuh, Israel Kumpite’ Khang Tangthu Laibu sungah kigelh hi.

³²Amau’ hun sung khempeuh Asa le Israel kumpi Baasha kikalah galkidona a om hi.

³³Judah kumpi Asa’ kum thumna kumin Ahijah’ tapa Baasha in Israel khempeuh tungah Tirzah panin uk ding kipan a, kum sawmnih le li sung a uk hi.

³⁴TOPA’ muhna-ah amah a sia gamta a, Jeroboam’ khekhap mah tawnin, Israel a khialhsakna ama khialhna mah a zui hi.