Read Tedim Chin 1 KUMPI MASATE 16 Bible Online

1 KUMPI MASATE 16 - Tedim Chin bible

1 KUMPI MASATE 16

¹Tua ciangin Baasha langpangin Hanani tapa Jehu tungtawnin TOPA’ thu hong tung a,

²“Keimah in leivui lak panin nang hong sangto sakin ka mi Israel-te tungah makai-in nang hong bawl napi-in, nangmah in Jeroboam’ khekhap mah tawnin ka mi Israel-te na khialsak a, amaute’ khialhna tawh kei hong hehsak na hih manin

³en in, keimah in Baasha le a innkuan ka phiatsiang ding a, Nebat’ tapa Jeroboam’ innkuan bangin na innkuan ka bawl ding hi.

⁴Baasha’ mi, khuapi sunga a si peuhpeuh uite in ne ding a, ama mi gamlakah a si peuhpeuh huihlak vasate in ne ding uh hi,” a ci hi.

⁵Tu-in Baasha’ gamtatna a omlaite, a septe, le a thahatna, Israel Kumpite’ Khang Tangthu Laibu sungah kigelh hi.

⁶Tua ciangin Baasha si a, Tirzah-ah kivui hi. Ama tangin a tapa Elah in uk hi.

⁷Tua tham loin Jeroboam innkuan bangin ama nasepna tawh hehsakin TOPA’ muhna-ah a sia a gamtatna khempeuh hang le amah in Jeroboam le a innkuan a suksiatna hangin Hanani’ tapa kamsang Jehu’ tungtawnin Baasha le a innkuan langpangin TOPA’ thu hong tung hi.

⁸Judah kumpi Asa’ kum sawmnih le gukna kumin Baasha’ tapa Elah in Tirzah panin Israel tungah uk ding kipan a, kum nih sung uk hi.

⁹Ahih hangin ama leengte alang a ukpa ama nasem Zimri in amah sawmsim hi. Tirzah-a kumpi innsung a ukpa Arza’ inn-ah zukhamin Tirzah-ah a om laitak,

¹⁰Judah kumpi Asa’ kum sawmnih le sagihna kumin Zimri hong pai-in Elah sattukin that a, ama tangin a uk hi.

¹¹Amah in uk dinga a kipat, kumpi tokhom tungah a tut khit phetin amah in Baasha’ innkuan khempeuh that hi. Ama behte pasal khat beek ahi a, a lawmte ahi zongin khat zong siit lo hi.

¹²Baasha’ khialhnate le a khialhsa uh ahi a tapa Elah’ khialhnate, le amaute in Israel khialsakin, a milimte uh tawh Israel Pasian, TOPA a hehsakna uh hangin, Baasha langpangin kamsang Jehu tungtawnin TOPA’ thugenna bangin Baasha’ innkuan khempeuh tua bangin Zimri in susia hi.

¹⁴Tu-in Elah’ gamtatna a omlaite, le a sep khempeuh, Israel Kumpite’ Khang Tangthu Laibu sungah kigelh hi.

¹⁵Judah kumpi Asa’ kum sawmnih le sagihna kumin Zimri in Tirzah-ah ni sagih sung uk hi. Tua laitakin Filistia-te’ khua Gibbethon simin Israel galkapte in giahphual sat uh a,

¹⁶giahphual sat a om galkapte in, “Zimri in sawmsimin kumpipa that khin hi,” a kicihna a za uh hi. Tua ahih ciangin Israel-te khempeuh in tua ni-in giahphual ah galkap a ukpa Omri kumpi-in a bawl uh hi.

¹⁷Tua ahih ciangin Omri le amah tawh a om Israel khempeuh Gibbethon panin paito-in amaute in Tirzah umcih uh hi.

¹⁸Ama hihsa a khialhna, TOPA’ muhna-ah a siat gamtatna, Jeroboam’ khekhap a totna, le a hihsa a khialhna, Israel a khialhsakna hangin, a khuapi kila khinta hi, ci-in Zimri in a muh ciangin kumpipa’ inn muanhuai sungah amah pai a, kumpipa’ inn tawh amah mei-in kihalnelhin a si hi.

²⁰Tu-in Zimri’ gamtatna a omlaite, le ama hihsa a sawmsimna, Israel Kumpite’ Khang Tangthu Laibu sungah kigelh hi.

²¹Tua ciangin Israel mite pawl nihin kikhen uh hi. Mi pawlkhat in kumpi-in a bawl dingin Ginath’ tapa Tibni zui uh a, a pawlkhat in Omri zui uh hi.

²²Ahih hangin Omri a zui mite in Ginath’ tapa Tibni a zuite zo uh ahih ciangin Tibni si a, Omri kumpi a suak hi.

²³Judah kumpi Asa’ kum sawmthum le khatna kumin Omri in Israel-te tungah uk ding kipan a, kum sawm le nih sung a uk hi. Amah in kum guk sung Tirzah-ah uk hi.

²⁴Amah in Shemer’ tung panin ngun talen nihin Samaria mual lei hi. Amah in kulh tawh a mual um a, tua mual a nei pa Shemer’ min tamin a lamsa khuapi min Samaria a phuak hi.

²⁵TOPA’ muhna-ah Omri a sia gamta a, ama mai-a om mi khempeuh sangin a sia tamzaw gamta hi.

²⁶Bang hang hiam cih leh Nebat’ tapa Jeroboam’ gamtat khempeuh, le Israel a khialhsakna khialhnate, a milimte uh tawh Israel Pasian, TOPA a hehsakna uh a zui hi.

²⁷Tu-in Omri’ gamtatna a omlaite, le a thahatna a lahna, Israel Kumpite’ Khang Tangthu Laibu sungah kigelh hi.

²⁸Tua ciangin Omri si a, Samaria-ah kivui hi. Tua ciangin ama tangin a tapa Ahab in a uk hi.

²⁹Judah kumpi Asa’ kum sawmthum le giatna kumin Omri’ tapa Ahab in Israel tungah uk ding kipan a, amah in Samaria panin Israel-te tungah kum sawmnih le nih sung a uk hi.

³⁰Omri’ tapa Ahab, ama mai-a mite khempeuh sangin TOPA’ muhna-ah a sia tamzaw gamta hi.

³¹Nebat’ tapa Jeroboam’ khialhnate zuih ding ama a dingin a thuzang tawh a kibat mah bangin, amah in Sidon mite’ kumpi Ethbaal’ tanu Jezebel zi-in la a, pai-in Baal na semin a bia hi.

³²Amah in Samaria-a a lam Baal inn sungah Baal a dingin biakna tau khat dingsak hi.

³³Tua ciangin Ahab in Asherah milim khat bawl hi. Ahab in ama mai-a om Israel kumpite khempeuh sangin Israel Pasian, TOPA hehsak nading tam hihzaw hi.

³⁴Ama hun sungin Bethel mi Hiel in Jerikho a puah hi. TOPA in Nun tapa Joshua’ tungtawnin a gen bangin amah in a tacil Abiram’ luang khamin a bulpi phut a, a tapa neupen Segub’ luang khamin a kongpite a phut hi.