Read Tedim Chin 1 KUMPI MASATE 21 Bible Online

1 KUMPI MASATE 21 - Tedim Chin bible

1 KUMPI MASATE 21

¹Tua laitakin Jezreel khuami Naboth in Samaria kumpi Ahab’ kumpi inn gei-ah leenggui lo khat nei hi.

²Hih thu teng khit ciangin Ahab in Naboth kiangah, “Ka inn tawh kinai ahih manin anteh huan dingin ka neih theih nadingin na leenggui lo hong pia in; keimah in tua tang dingin leenggui lo hoihzaw khat kong pia ding hi; ahih kei leh zong nang a dingin a hoihzawk ding leh a man ding sum kong pia ding hi,” a ci hi.

³Ahih hangin Naboth in Ahab kiangah, “Ka pu ka pate’ gamh nang tungah kong piak ding TOPA in hong kham hi,” a ci hi.

⁴Tua ciangin Jezreel khuami Naboth in ama tungah a thugenna hangin hehna le maikhinna tawh Ahab a inn-ah ciah hi; bang hang hiam cih leh amah in, “Ka pu ka pate’ gamh nang tungah kong pia kei ding hi,” ci hi. Amah a lupna tungah lumin a mai hei a, an ne lo hi.

⁵Ahih hangin a zi Jezebel ama kiangah hong pai-in, “An a ne lo zah dingin bang hangin na lungsim tua zahin heh ahi hiam?” a ci hi.

⁶Amah in, “Keimah in Jezreel khuami Naboth kiangah thu genin, ‘Sum tawh lei dingin na leenggui lo hong pia in; ahih kei leh zong, na lungkim leh tua tang dingin leenggui lo dang khat kong pia ding hi,’ ka ci hi. Amah in hong dawngin, ‘Nang tungah ka leenggui lo kong pia kei ding hi,’ hong ci hi,” a ci hi.

⁷Tua ciangin a zi Jezebel in, “Tu laitakin Israel mite a ukpa hi lo na hi hiam? Tho-in an ne inla, na lungsim nuamsak in. Keimah in Jezreel khuami Naboth’ leenggui lo nangma tungah kong pia ding hi,” a ci hi.

⁸Tua ahih ciangin amah in Ahab’ minin laikhakte gelhin ama min gelhna tawh tua laite tungah gelh a, ama khuapi sungah Naboth tawh a teng upate le uliante tungah tua laite a khak hi.

⁹Amah in a laite sungah, “An tan’ ding thu zasak unla, mite’ lak a sangna munah Naboth koih un.

¹⁰Ama mai-ah mi ginalo nih koihin ama langkhatah mawhna zong sakin, ‘Nang in Pasian le kumpipa na samsia hi,’ cisak un. Tua ciangin amah lakhia unla denglum un,” a ci hi.

¹¹Tua ciangin ama khuapi mi, ama khuapi sungah a teng upate le uliante in amaute tungah Jezebel’ thupuak bangin hih uh hi. Amaute tungah a khak laite sungah a kigelh mah bangin,

¹²amaute in an tan’ ding thu zasak uh a, mite’ lak a sangna munah Naboth koih uh hi.

¹³Tua ciangin mi ginalo nihte hong pai-in ama mai-ah tu uh hi. Tua ciangin mi ginalo nihte in mite’ omin Naboth’ mawhna zong uh a, “Naboth in Pasian le kumpipa samsia hi,” a ci uh hi. Tua ahih ciangin amaute in khuapi pualamah amah paipih uh a, suang tawh amah denglum uh hi.

¹⁴Tua ciangin amaute in Jezebel kiangah thu puakin, “Suang tawh Naboth kideng khinzo a, amah sita hi,” a ci uh hi.

¹⁵Jezebel in Naboth suang tawh kidengin a sihna thu a zak phetin Ahab kiangah, “Tho in; sum tawh lei dingin nangma tungah hong piak nop loh, Jezreel khuami Naboth’ leenggui lo tang in; bang hang hiam cih le Naboth nungta nawn lo hi; sita hi,” a ci hi.

¹⁶Naboth a sihna thu Ahab in a zakphetin, a luah dingin Jezreel khuami Naboth’ leenggui lo-ah a paisuk dingin a tho hi.

¹⁷Tua ciangin Tishbe khuami Elijah tungah TOPA’ thu hong tung a,

¹⁸“Tho inla, Samaria-ah a om Israel kumpi Ahab a dawntuah dingin paisuk in. Naboth’ leenggui lo a la dingin tua lai-ah amah om hi.

¹⁹Nangmah in ama kiangah, ‘TOPA in hih bangin ci hi: “That khinin zong luahkhin na hi hiam?” ci hi,’ na ci ding hi. Tua ciangin ama kiangah, ‘TOPA in hih bangin ci hi: “Uite in Naboth’ sisan a liahna munah uite in nangma sisan liak ding uh hi,” ci hi,’ ci-in gen in,” a ci hi.

²⁰Ahab in Elijah a muh ciangin, “Ka gal pa aw, kei hong mu na hi hiam?” a ci hi. Amah in dawngin, “TOPA’ muhna-ah a sia a gamta dingin nangmah kipiatawm na hih manin nang kong mu hi.

²¹TOPA in hih bangin ci hi: Nangma tungah siatna kong tungsak ding hi. Nang kong phiatkhia siang ding a, Israel sungah nangma mi sal le sal ahi lo mi pasal khempeuh ka beisak ding hi.

²²Kei nong hehsakna hang le Israel na khialhsakna hangin Nebat’ tapa Jeroboam’ innkuan le Ahijah’ tapa Baasha’ innkuan bangin nangma innkuan ka bawl ding hi.

²³Jezebel’ thu zong TOPA in genin, ‘Uite in Jezreel khua sungah Jezebel ne ding uh hi,’ ci hi.

²⁴Khuapi sungah Ahab’ innkuan a si peuhpeuh uite in ne ding uh hi; gamlakah a si nangma innkuan peuhpeuh huihlak vasate in ne ding uh hi, ci hi,” a ci hi.

²⁵Ama zi Jezebel in a hanthot Ahab bangin TOPA’ muhna-ah a sia a gamta dingin amahmah a kipiatawm mi kuamah dang om lo hi.

²⁶TOPA in Israel mite’ mai-ah a hawlkhiat Amor mite mah bangin milimte zui-in a kihhuai mahmahin a gamta hi.

²⁷Ahab in hih thute a zak ciangin a puante balkek a, a pum tungah puanhampi silhin, an tangin puanhampi tungah lum a, maikhingin a vak kawikawi hi.

²⁸Tu-in Tishbe khuami Elijah tungah TOPA’ thu hong tung a,

²⁹“Keima mai-ah bangzahin Ahab a kiniamkhiatna na mu hiam? Keima mai-ah amah kiniamkhiat ahih manin ama hun sungin siatna ka tungsak kei ding hi. Ahih hangin a tapa’ hun sungin ama innkuan tungah siatna ka tungsak ding hi,” a ci hi.