Read Tedim Chin 1 KUMPI MASATE 3 Bible Online

1 KUMPI MASATE 3 - Tedim Chin bible

1 KUMPI MASATE 3

¹Solomon in Egypt kumpipa Faro tawh numei-a kizopna bawl hi. Amah in Faro’ tanu la a, ama inn le TOPA’ biakinn le Jerusalem kimkota kulhpi a lam a zawh mateng David khuapi sungah tua nu paipihin omsak hi.

²Ahi zongin TOPA a dingin biakinn kilam nai lo ahih manin mite in mualtung a biaknate-ah biakna pia uh hi.

³Solomon in TOPA itin, a pa David’ thukhamte zui hi. Ahi zongin amah in mualtung a biaknate-ah biakna pia-in paknamtui hal hi.

⁴Tua ciangin biakna a pia dingin Gibeon-ah kumpipa pai hi; bang hang hiam cih leh mualtung a biakna mun a lian pen ahi hi. Solomon in tua biakna tau tungah meihal biakna tam veipi tak a piaknasa mun ahi hi.

⁵Gibeon-ah zanin mang sungah Solomon’ tungah TOPA kilang hi. Pasian in, “Nang kong piak ding hong ngen in,” a ci hi.

⁶Solomon in, “Na nasem ka pa David’ tungah a lian itna kip na lak hi. Bang hang hiam cih leh cihtakna, thumanna tawh nangma mai-ah gamta-in, nangma tungah lungsim thutang hi. Nangmah in ama a dingin hih a lian itna kip koihsakin, tuni-in ama tokhom tungah a tu ding tapa khat na pia hi.

⁷Tu-in, TOPA ka Pasian aw, kei pen naupangno khat hinapi-in ka pa David’ munah kumpi-in na nasempa nong koih hi. Bangci gamtatin bangci nasep ding cih ka theih khat zong om lo hi.

⁸A lian, a phazah a kisim zo lo, a tamna a kiseh thei lo, nangmah in na teelsa na mite lakah na nasempa om hi.

⁹Tua ahih ciangin keimah in a sia le a pha ka theihtheih nadingin na mite uk nading thu theihtelna lungsim na nasempa hong pia in. Bang hang hiam cih leh hih a lian a tam na mite kua in ukzo ding ahi hiam?” a ci hi.

¹⁰Solomon’ thungetna in TOPA lungkimsak hi.

¹¹Pasian in ama kiangah, “Nangmah in hih thu hong ngenin, nangma a dingin khansauna ahi a, hauhna ahi a, na galte thahzawh nading ahi zongin hong ngen loin, a man thu na theih nadingin nang a dingin thu theihtelna hong ngen na hih manin,

¹²en in, nangma hong ngetna bangin kong pia ding hi. En in, nangma hun ma-in nang tawh a kibang a om loh nading le nangma khitah zong nang tawh a kibang hong khan loh nadingin pilna le theihna lungsim kong pia ding hi.

¹³Nangma hunsung tawntung kumpi dang nang tawh a kiteh theih lohna dingin nangma hong nget loh hauhna le pahtawina zong nang kong pia ding hi.

¹⁴Na pa David in a tot bangin nangmah in ka lampite tawnin, ka thukhamte le ka thupiaknate na zuih nakleh na khan ka sausak ding hi,” a ci hi.

¹⁵Tua ciangin Solomon khanglo a, hih pen a mang na hi hi. Tua ciangin Jerusalem-ah amah pai a, TOPA’ Thuciamna Singkuang mai-ah amah dingin meihal biaknate le thunuama biaknate pia-in, a nasemte khempeuh a dingin pawi khat a kham hi.

¹⁶Tua ciangin kumpipa kiangah numei paktat nih hong pai-in a mai-ah ding uh hi.

¹⁷A numei khat in, “Aw, ka topa aw, hih numei le kei, inn khat sungah ka omkhawm uh hi; amah zong inn-ah a om sungin keimah in ta khat ka nei hi.

¹⁸Ka ta neih khit ni thum ni ciangin hih numei in zong ta hong nei hi. Ko gel bek a om ka hi uh a, kote tawh inn sungah kuamah dang om lo hi.

¹⁹Amah in delhphahkha ahih manin zanin hih numei’ tapa a si hi.

²⁰Tua ciangin zankim laitakin amah tho-in, na nasemnu ka ihmut laitakin ka kiang panin ka tapa la-in ama ang-ah koih a, ama tapa si kei’ ang-ah hong koih hi.

²¹Zingsangin ka ta nawi a pia dingin ka thawh ciangin, a sisa na hi hi. Ahih hangin limtakin ka et ciangin, amah pen keima sung pana suak ta na hi lo hi,” a ci hi.

²²Ahih hangin a numei dang khat in, “Hilo hi; a hing naupang keima a’ hi a, a si naupang nangma a’ ahi hi,” a ci hi. Tua ciangin a masa nu in, “Hilo hi; a si naupang nangma a’ hi a, a hing naupang keima-a’ ahi hi,” a ci hi. Tua bangin kumpipa’ mai-ah amau tegel in thu gen tuak uh hi.

²³Tua ciangin kumpipa in, “Khat in, ‘A nungta pen keima tapa hi a, nangma tapa si hi,’ ci hi. Tua ciangin adang khat in, ‘Hilo hi; nangma tapa si a, keima tapa a hing pen ahi hi,’ ci hi,” a ci hi.

²⁴Tua ciangin kumpipa in, “Namsau khat hong la un,” a ci hi. Tua ahih ciangin kumpipa’ mai-ah namsau khat hong kipaipih hi.

²⁵Tua ciangin kumpipa in, “A nungta naupang khen nih suah unla, khat tungah alang pia-in, adang khat tungah alang pia un,” a ci hi.

²⁶Tua ciangin a tapa a nungta numei in a lungsimah a tapa khasiat ahih manin kumpipa kiangah, “Aw ka topa aw, a nungta naupang amah piazaw in; bangbang hitaleh amah that kei in,” a ci hi. Ahih hangin a khat in, “Hih pen kei ka hi a, amah in ahi zongin tang thei lo ding hi; hong hawmsak un,” a ci hi.

²⁷Tua ciangin kumpipa in dawngin, “A masa numei tungah naupang hing pia un; bangbang hitaleh that kei un; amah pen a nu ahi hi,” a ci hi.

²⁸Tua ciangin Israel mi khempeuh in kumpipa’ piak thukhenna za uh hi. Thutang a sem dingin ama tungah Pasian in pilna pia hi, ci-in phawk uh ahih manin amaute in kumpipa lamdangsa-in a om uh hi.