Read Tedim Chin 1 KUMPI MASATE 5 Bible Online

1 KUMPI MASATE 5 - Tedim Chin bible

1 KUMPI MASATE 5

¹Amaute in ama pa’ munah kumpi-in amah sathau a nilhna thu a zak ciangin Taia kumpi Hiram in a nasemte Solomon kiangah sawl hi; bang hang hiam cih leh Hiram in David it tawntung hi.

²Tua ciangin Solomon in Hiram kiangah kam khak a,

³“TOPA in ama khenuai-ah amaute a koihsak matengin amah a umcih a galte tawh kidona hangin ka pa David in TOPA ama Pasian’ min dingin biakinn a lam theih lohna thu na thei hi.

⁴Ahih hangin tu-in TOPA ka Pasian in na khempeuhah tawlngakna kei tungah hong pia hi. Hong langpang ahi a, thusia ahi zongin om lo hi.

⁵Tua ahih ciangin TOPA in ka pa David kiangah, ‘Nangma tangin na kumpi tokhom tungah ka koih ding na tapa in ka min dingin biakinn lam ding hi,’ a cih mah bangin TOPA ka Pasian’ min dingin biakinn khat lam ka sawm hi.

⁶Tua ahih ciangin Lebanon taamtak singte kei a dingin a kiphukna ding thu pia in; ka nasemte in nangma nasemte seppih ding uh a, nangma seh bangin na nasemte’ thaman ding nang tungah kong pia ding hi; bang hang hiam cih leh Sidon mite bangin sing suih a siam kote lakah khat zong a om lohna na thei hi,” a ci hi.

⁷Hiram in Solomon’ kam a zak ciangin nakpitakin lungdam a, “Hih a lian a tam mite a uk dingin David’ tungah a pil tapa a pia TOPA in tuni-in thupha ngah ta hen,” a ci hi.

⁸Tua ciangin Hiram in Solomon kiangah mi sawlin, “Kei kiangah nong thu-khak ka za hi. Taamtak sing le taaksan sing tawh kisai na deih khempeuh a hih dingin ka kiging hi.

⁹Ka nasemte in Lebanon panin tuipi-ah tuate hong puaksuk ding uh hi. Nangma cihna munah a pai dingin tuipi a tawn dingin keimah in tuate phongin ka bawl ding a, tua lai munah keimah in a singte phelsakin nangmah in na ngah ding hi. Nangmah in ka mite a’ ding anpiakna tawh ka deihnate nong kicingsak ding hi,” cisak hi.

¹⁰Tua ahih ciangin Hiram in ama deih taamtak le taaksan singte Solomon pia a,

¹¹Solomon in Hiram tungah a mite’ an dingin mangbuh beem tul sawmnih le oliv thau bungpi tul sawmnih dim a pia hi. Solomon in Hiram’ tungah a kum kumin hihte a pia hi.

¹²Ama tungah a ciam bangin TOPA in Solomon tungah pilna pia hi. Solomon le Hiram kilem uh a, amau tegel in thuciamna khat a bawl uh hi.

¹³Kumpi Solomon in Israel sung panin aana tawh na a sem mite la hi. A lak mite mihing tul sawmthum pha hi.

¹⁴Amah in Lebanon-ah tua mite kha khatin tul sawm a kikhelin puak hi. Amaute Lebanon-ah kha khat omin inn-ah kha nih om ding uh hi. Adoniram in hih a kila mite uk hi.

¹⁵Solomon in vanpua mi tul sawmsagih le mualtung gamah suangseek mi tul sawmgiat zong nei a,

¹⁶na a sem mite a uk, Solomon’ nuai-ah ulian tulthum le zathum, nasep ukte a kihel lo ahi hi.

¹⁷Suangseeksa tawh biakinn bulpi a phuh theih nadingin kumpipa’ thupiakna tawh amaute in a lian, a manpha suangtumte tokhia uh hi.

¹⁸Tua ahih ciangin biakinn lam nadingin Solomon’ mi innlamte le Hiram’ mi innlamte le Gebal mite in sing phuk le singlesuang nasep a sem uh hi.