Read Tedim Chin 1 KUMPI MASATE 6 Bible Online

1 KUMPI MASATE 6 - Tedim Chin bible

1 KUMPI MASATE 6

¹Egypt gam panin Israel mite a paikhiat zawh kum zali le kum sawmgiatna, Israel-te tungah Solomon’ uk a kum lina, a kha nihna ahi Ziv kha-in amah in TOPA’ biakinn lam ding kipan hi.

²Kumpi Solomon in TOPA a dingin a lam biakinn, a sung pi sawmkua sau-in, pi sawmthum zai a, pi sawm le nga sang hi.

³Biakinn mai-ah a innliim pen biakinn zaina zahin pi sawmthum sau a, inn mai lamah pi sawm le nga sang hi.

⁴Tua ciangin amah in biakinn a dingin a pualam a kihui tawlette a bawl hi.

⁵Amah in biakinn pang tuak le a nunglam biakinn kawm kimkotin a kawm tungah zong inn lam a, a kimkot a pangah inndei bawl hi.

⁶A dawl nuainung pen pi sagih le alang zai-in, a laita pi kua zai a, a thumna pi sawm le alang zai hi. Kawm sungah innkam a lut loh nadingin amah in inn pualam pang kimkota dingin a nanna singbekte a bawl hi.

⁷Biakinn a kilam ciangin a kitawhna mun panin a kibawlsa suangte tawh kilam hi. Tua ahih manin a kilam laitakin hei ahi a, sek ahi a, sik nazat khat peuhpeuh ahi zongin a gingte biakinn huang sungah kiza lo hi.

⁸A dawl nuainung lut nading pen biakinn leitaw lampangah om hi. A dawl laita-ah kahlei zui-in kipai-in a dawl laita panin a thumna-ah kipai hi.

⁹Tua ahih ciangin amah in biakinn lamin a zo hi. Amah in innkamte khungin taamtak peekte tawh inndap a bawl hi.

¹⁰Amah in a inn buppi tungah a lambehte zomin, dawl khat ciangin pi sagih le alang sang ciat a, taamtak singte-in a biakinn tawh kizom hi.

¹¹Tu-in TOPA’ thu Solomon’ tungah hong tung a,

¹²“Nangmah in na lam hih biakinn tawh kisai-in, ka thukhamte zui-in ka ngeina kipte mang a, ka thupiaknate khempeuh kemin tuate na zuih leh, na pa David tungah ka gen thu nang’ tungah kong kipsak ding hi.

¹³Tua ciangin na lam biakinn sung Israel mite lakah ka teng ding a, keima mi Israel-te ka nusia kei ding hi,” a ci hi.

¹⁴Tua ahih ciangin Solomon in biakinn lamin a zo hi.

¹⁵Amah in taamtak peekte tawh biakinn sung kawm dap hi. Sual panin inndap innsunte dongin amah in sing tawh a sunglam tuam hi. Tua ciangin amah in taaksan peekte tawh a sual tuam hi.

¹⁶Amah in sual panin innsun dong inn nunglam pi sawmthum taamtak peekte tawh lam a, amah in siangtho pen mun, biakinn sungnung dingin a inn sungah a bawl hi.

¹⁷Biakinn sungnung mai-a innsung, pi sawmguk sau hi.

¹⁸Inn sunga om taamtak singte tungah umgah le pakpalh lim kigelh hi. A vekpi-in taamtak a kidap hi a, suang kimu lo hi.

¹⁹Amah in TOPA’ Thuciamna Singkuang koih nadingin a sungtawng penah biakinn sungnung a bawl hi.

²⁰Biakinn sungnung, pi sawmthum sau-in, pi sawmthum mah zai a, pi sawmthum mah sang a, amah in kham citak tawh a zut hi. Amah in taamtak sing biakna tau khat zong a bawl hi.

²¹Tua ciangin Solomon in kham citak tawh innsung zut a, biakinn sungnung mai kantanin kham khainiang khung a, kham tawh a zut hi.

²²Amah in a inn buppi a zawh dongin kham tawh a zut hi. Biakinn sungnung a biakna tau buppi zong amah in kham tawh a zut hi.

²³Amah in biakinn sungnungah oliv sing tawh kherub nih bawl a, pi sawm le nga tuak a sang hi.

²⁴Kherub kha langkhat, pi sagih le alang sau-in, kherub kha lang dang khat, pi sagih le alang mah sau a, a kha langkhat mong panin a mong langkhat dong pi sawm le nga ahi hi.

²⁵Kherub adang khat zong pi sawm le nga mah sau a, Kherub tegel a sauna le a pianlim kibang hi.

²⁶Kherub khat a sauna pi sawm le nga hi a, a kherub dang khat zong tua zah mah ahi hi.

²⁷Amah in biakinn sung tawngnung penah kherub-te a koih hi. Kherub-te’ khate kizal a, khat’ kha in kawm banin, adang kherub’ kha in a kawm langkhat ban hi. Amau’ kha langkhat tegel inn laizangah kituah hi.

²⁸Amah in kham tawh tua kherub-te a zut hi.

²⁹Amah in a sungnung le a puanung inndeite, a kimkotin inn kawm khempeuh tungah kherub-te le nisuh kungte le pakpalhte a bawl hi.

³⁰A sungnung le a puanung inndei sung innsualte amah in kham tawh a zut hi.

³¹Biakinn sungnung lut nadingin amah in oliv sing kongkhak peekte a bawl hi; a bangtung zawl le kongkhak khuamte in kiu nga piangsak hi.

³²Amah in kherub-te, nisuh kungte, le pakpalh lim kibawlte tawh oliv sing kongkhak peek nihte a tuam hi; amah in tuate kham tawh zut a, kherub-te le nisuh kungte tungah kham a theh hi.

³³Tua bangmahin amah in kiu li nei-in biakinn sung lutna oliv sing kongkhak khuamte,

³⁴le taaksan sing kongkhak peek nihte a bawl hi. Kongkhak a peek nihte kikhepin, adang kongkhak a peek nihte zong kikhep hi.

³⁵Tuate tungah amah in kherub-te le nisuh kungte le pakpalhte bawl a, tua a bawlte tungah a tukimin kham tawh a zut hi.

³⁶Amah in a kiseek suang gual thum le taamtak sing gual khat tawh a tual sungnung a bawl hi.

³⁷A kum lina, Ziv kha-in TOPA’ biakinn a bulpi kipan hi.

³⁸A kum sawm le khatna, a kha giatna ahi Bul kha-in a na khempeuh le a kigen khempeuh bangin a kizo hi. Amah in tua a lamna-in kum sagih sung hun a bei hi.