Read Tedim Chin 1 KUMPI MASATE 7 Bible Online

1 KUMPI MASATE 7 - Tedim Chin bible

1 KUMPI MASATE 7

¹Solomon in ama inn ding zong kum sawm le thum sung lamin a inn buppi a zo hi.

²Amah in Lebanon Tulak Inn a kici khat a lam hi. A sauna pi zalesawmnga hi a, a zaina pi sawmsagih le nga hi-in, a sanna pi sawmli le nga hi a, taamtak khuampi gual thum tungah taamtak innkam kikhungin tua tungah a kilam ahi hi.

³Gual khatah sawm le nga a om khuampi sawmli le nga tunga kilam inndei tung san teng taamtak sing tawh kituam hi.

⁴A pang kawm tegel tungah tawlet gual thum tuak om a, a tawlet gual thumte khatlekhat kitang hi.

⁵A kongkhakte le a tawlet khempeuhte a pang kikim kiu li nei vive hi a, a gual thumin tawlet khatlekhat kitang dimdiam hi.

⁶Tua ciangin amah in Khuampi Innpi a kici khat lam hi. A sauna pi sawmsagih le nga hi a, a zaina pi sawmli le nga ahi hi. A mai lamah khuampite a nei innliim om a, tua khuampite tungah a tungkhuhna khat om hi.

⁷Tua ciangin amah in a thukhen nading mun Thukhenna Innpi ahi Kumpi Tokhom Innpi a kici khat lam a, a sual panin a innsun ciang dong taamtak sing kizang hi.

⁸Kumpi Tokhom Innpi nung lamah ama ten nading inn zong tua mah bangin a kilam ahi hi. Solomon in zi-a a lak Faro’ tanu a dingin hih innpi tawh a kibang inn dang khat zong a lam hi.

⁹Hihte khempeuh, a bulpi nangawn a kipan a khum dong, le TOPA’ biakinn tual a kipan tual lianpi dongin, limtakin tehin, a kitan, a nung le a mai suangatna tawh a ki-at a manpha suangte tawh a kibawl ahi hi.

¹⁰A bulpi pen a manpha suang, suang lian, pawlkhat pi sawm le nih, pawlkhat pi sawm le nga a pha suangte ahi hi.

¹¹Tuate’ tung ate pen limtakin tehin a kitan a manpha suang, le taamtak sing ahi hi.

¹²Tual lianpi in a kimkotah a kiseek suang gual thum simin taamtak sing gual khat nei hi. Tua mah bangin TOPA’ biakinn tual sungnung le innliim in zong a nei hi.

¹³Tua ciangin Kumpi Solomon in mi sawlin Taia khua-a om Huram samsak hi.

¹⁴Amah pen Naftali minam meigongnu’ tapa hi a, ama pa pen Taia khuami sumngo seek na a sempa ahi hi. Amah in sumngo tawh na khat peuhpeuh hih nadingin pilna, theihna, siamna a nei ahi hi. Kumpi Solomon kiangah amah hong pai-in ama na khempeuh a sem hi.

¹⁵Amah in sumngo khuampi nih sung hi. Khuampi khat a sauna pi sawmnih le sagih hi a, a khuam pum kimkot pi sawm le giat pha hi. A sung hawm a, a sahna zung li ahi hi. A khuam nihna zong tua mah tawh kibang hi.

¹⁶Khuampite tungah a bulh dingin amah in a kisung sumngo khuamluzepna nih zong a bawl hi. Khuamluzepna khat a sauna pi sagih le alang hi a, adang khat khuamluzepna a sauna tua zah mah ahi hi.

¹⁷Tua ciangin amah in khuampite lu dawna khuamluzepna a dingin khainiang a kihuiheek tawh a kibawl ngen banga kikalh simsiam nih a bawl hi. Ngen khat pen khuamluzepna khat a’ ding hi a, a ngen dang khat pen khuamluzepna adang khat a’ ding ahi hi.

¹⁸Tua mah bangin amah in mang kawlsing gahte a bawl hi. Khuampi lu dawna om khuamluzepna tuam nadingin ngen tawh kibangin a bawl tung kimkotah gual nih bawl a, a khuamluzepna dang khat zong tua mah bangin a bawl hi.

¹⁹Tua ciangin innlim a om khuampi dawnah a om khuamluzepnate pi guk pha a, tuate tungah unok pak a kibawlte om hi.

²⁰A khuamluzepnate pen a khuampi nihte tung le ngen tawh kibanga kibawl gei-a a om a bem a dawk tungah om hi. A kimkotah gual nihin mang kawlsing gah zanih om a, a khuamluzepna dang khatah zong tua bangmah ahi hi.

²¹Amah in biakinn innlimah khuampite a phut hi. Leitaw lamah a khuam khat phutin a min Jakhin phuak a, leilu lamah a khuam dang khat phutin a min Boaz a phuak hi.

²²A khuampite dawnah unok pak a kibawl om hi. Tua bangin khuampite a bawl a man khin hi.

²³Tua ciangin amah in a kisung tuikuangpi a bawl hi. Tua tuikuang a bem hi a, a gei khat pan a gei khat pi sawm le nga pha-in, pi sagih le alang thuk a, a kimkot pi sawmli le nga a pha hi.

²⁴A geivial nuai pi sawmli le nga sung, tuikuangpi kimkotin um gahte kibawl hi. Tua um gahte gual nihin om a, a tuikuangpi a kisunin kisung khawm pah hi.

²⁵Bawngtal sawm le nihte tungah tua tuikuangpi kinga a, thum leilu lam nga a, thum nitumna lam nga-in, thum leitaw lam nga a, thum nisuahna lam a nga hi. Tuate tungah a tuikuangpi kikoih a, a nunglam uh a sunglamah om hi.

²⁶A tuikuang sahna khutpeekmai cia ahi hi. A geivial pen unok pak tawh a kibang hai geivial bangin kibawl hi. Tua sungah tui tambong tulli bang ta thei hi.

²⁷Amah in sumngo kibawl tuikuang a kingakna sawm zong a bawl hi. Tua a bawlte pi guk sau, pi guk zai, pi li le alang sang hi.

²⁸Tua a kingaknate hih bangin kibawl hi: Tuate in a khawkte nei-in, tua a khawkte a kungah kibulh a,

²⁹tua ciangin a kungah a kibulh a khawkte tungah humpinelkaite, bawngtalte, le kherub-te om hi. Tua kungte tung, humpinelkaite le bawngtalte’ tung le nuai-ah a sawi-in a kikalh limliam om hi.

³⁰Tua tham loin tua ngaknate in sumngo tawh a kibawl leengpeite le leengpei zawlte nei ciat a, a kiu lite-ah tuikuangpi nannate om hi. Tua nannate a kisung hi a, a pang ciatah pakkual om hi.

³¹A gong pen a kingakna pan pi khat le alang sangto hi. A gong pen kingakna a kibawl bangin bem a, pi nih le letmat thum thuk hi. A gongah lim kigelhte om hi. A khawkte in sikli nei a, bem lo hi.

³²A leengpei lite pen a khawkte’ nuai-ah om hi. Leengpei zawlte a kingakna tawh sakhat mah hi a, leengpei a sanna pi nih le letmat thum ahi hi.

³³A peite pen sakol leengpei bangin kibawl hi; a pei zawl, a peikual, a peikalhna, le a kalhna bulte khempeuh a kisung ahi hi.

³⁴A kingaknate’ kiu ciatah a nanna li om ciat a, tua a nannate a ngakna tawh sakhat ahi hi.

³⁵Tua ciangin a ngakna dawnah letmat kua a sang vial bem khat om hi. A ngakna dawnah a kipsaknate le a khawkte pen a ngakna tawh sakhat ahi hi.

³⁶Tua ciangin a kipsaknate le a khawkte tungah a mun awng zah ciat tawh kizui-in amah in kherub-te, humpinelkaite, le nisuh kungte gelhin a kimkotah pakkual a bawl hi.

³⁷Tu-a bangin amah in a kingakna sawm bawl hi. A vekpi-in a kibangin kisungin, a liatna le a pianlim a kibang ahi hi.

³⁸Tua ciangin amah in sumngo tuikuang sawm bawl hi. Tuikuang khatah tui tambong sawmgiat bang ta-in, tuikuang vangsung pi guk ciat pha a, a kingakna sawmte a dingin tuikuang khat ciat om hi.

³⁹Tua ciangin amah in tua a kingaknate, biakinn leitaw lamah nga, leilu lamah nga a koih hi. Tua ciangin biakinn khang nisuahna lam kiu-ah tuikuangpi a koih hi.

⁴⁰Huram in beelte, kawbiate, le kuangte zong a bawl hi. Tua ahih ciangin Huram in Kumpi Solomon a dingin TOPA’ biakinn a ding nasep khempeuh a zo hi.

⁴¹Khuampi nihte, khuampite dawnah a om khuamluzepna kuak nihte, le khuampite dawnah a om khuamluzepna kuak nihte tuam nading ngen tawh a kibanga kibawl nihte;

⁴²khuampite tungah a om khuamluzepna nihte a tuam dingin ngen tawh a kibanga kibawl khat a dingin mang kawlsing gah gual nih ahi, ngen tawh a kibanga kibawl nih a dingin mang kawlsing gah za lite;

⁴³a kingakna sawmte, le a kingaknate tungah a om tuikuang sawmte;

⁴⁴tuikuangpi khat, le tuikuangpi nuai-ah a om bawngtal sawm le nihte ahi hi.

⁴⁵Tu-in beelte, kawbiate, le kuangte, Huram in Kumpi Solomon a dingin a bawl, TOPA’ biakinn sungah a om nazatte khempeuh a tee sumngo tawh a kibawl ahi hi.

⁴⁶Jordan zanglei, Sukkoth le Zarethan kikal beel lei-ah kumpipa in tua nate sungsak hi.

⁴⁷Tamlua ahih manin Solomon in hih nate khempeuh tawiteh zo lo hi; sumngo gik zah kithei lo hi.

⁴⁸Tua ahih ciangin TOPA’ biakinn sunga om nazat khempeuh Solomon in bawl hi. Kham biakna tau, Ompihna Anlum a dingin kham sabuai,

⁴⁹biakinn sungnung mai, leitaw lampangah nga omin, leilu lampangah nga a om kham citak meivakkhuamte; kham tawh a kibawl paakte, meivakte, le taitehte;

⁵⁰paknamtui a dingin haite, taitehte, kuangte, pakante, le kham citak vutluahna; le siangtho pen mun biakinn sung tawngnung kongkhakte le biakinn sung kongkhakte a dingin kham bilte ahi hi.

⁵¹Tua ahih ciangin Kumpi Solomon in TOPA’ biakinn a hih nasep khempeuh kizo hi. Tua ciangin Solomon in a pa David’ apsa nate, ngun, kham, le nazatte paipihin TOPA’ biakinn sung vankoihna-ah tuate a koih hi.