Read Tedim Chin 1 KUMPI MASATE 9 Bible Online

1 KUMPI MASATE 9 - Tedim Chin bible

1 KUMPI MASATE 9

¹Solomon in TOPA’ biakinn le kumpi inn le a lamnop khempeuh a lam a man khit ciangin,

²Gibeon-a ama tungah a kilahsa bangin Solomon tungah TOPA a nihveina kilang hi.

³TOPA in ama kiangah, “Keima mai-ah na hihsa na thungetna le na thumnate ka za khin hi. Na lamsa hih biakinn ka ap khin hi. A tawntungin tua biakinn sungah kei hong kibia ding a, a tawntungin tua biakinn ka hu ding hi.

⁴Nang ahihleh, na pa David a gamtat bangin lungsim thupina le thumanna tawh ka mai-ah gamta-in, nang kong thupiak khempeuh bangin sem a, ka thukhamte le ka ngeina kipte na zuih leh,

⁵na pa David tungah, ‘Israel kumpi tokhom tungah mi khat zong na tasam kei ding hi,’ ci-in ka ciamsa bangin Israel-te tungah na kumpi tokhom ka kipsak paisuak ding hi.

⁶Ahih hangin nang na hi a, na tate ahi zongin, keimah zuihna panin pialin, note mai-ah ka koih ka thupiaknate le ka thukhamte na zuih kei uh a, pasian dangte’ na a sem ding le a bia dingin na pai uhleh,

⁷amaute ka piaksa leitang panin Israel mite ka lakhia ding hi. Tua ciangin ka min dingin ka apsa biakinn pen ka muhna panin ka lawnkhia ding a, Israel-te pen mi khempeuh lakah paunak le thugentehna suak ding hi.

⁸Tua ciangin hih biakinn pen ninbulomtang suak ding a, a nawkkha mi khempeuh in lamdangsa-in, eh! ci ding uh hi. Amaute in, ‘Bang hangin TOPA in hih leitang le hih biakinn hih bangin hih ahi hiam?’ ci ding uh hi.

⁹Tua ciangin amaute in, ‘Egypt panin a pu a pate uh a paikhiatpih TOPA a Pasian uh amaute in nusia-in pasian dangte len uh a, tuate bia-in a na a sepna hang uh ahi hi. Tua ahih ciangin TOPA in hih siatna khempeuh amaute tungah tungsak hi,’ ci ding uh hi,” a ci hi.

¹⁰Solomon in inn nihte, TOPA’ biakinn le kumpi inn a lam kum sawmnih a beina,

¹¹Taia kumpi Hiram in Solomon’ deih zahzah taamtak sing le taaksan sing le kham a piak khit ciangin, Kumpi Solomon in Galilee gam sunga om khuapi sawmnih, Hiram tungah a pia hi.

¹²Ahih hangin Solomon in amah a piaksa khuapite a en dingin Taia panin Hiram hong pai ciangin, tua khuapite tawh amah lungkim zo lo hi.

¹³Tua ahih ciangin amah in, “Ka sanggam aw, kei nong piak hih khuapite a bangci khuapi ahi hiam?” a ci hi. Tua ahih ciangin tuni dongin tuate Kabul gam kici hi.

¹⁴Hiram in kumpipa kiangah a piak kham talen zakhat le talen sawmnih a pha hi.

¹⁵TOPA’ biakinn, ama inn, Jerusalem kulh, le Hazor, Megiddo, le Gezer khuate a lam dingin Kumpi Solomon in aana tawh na a semte a la hi.

¹⁶(Egypt kumpi Faro paito a, Gezer la-in mei tawh hal a, a khuapi sunga teng Kanaan mite thatin Solomon’ zi, a tanu’ tungah mokenin a khuapi a piak ahi hi.

¹⁷Tua ahih manin Solomon in Gezer khua lamkik hi). Tua banah Bethhoron nuainung

¹⁸le Baalath le Judah gam sung gamlakah Tamar,

¹⁹le Solomon in a neih vankoihna khuapi khempeuh, le a leengte-a’ ding khuapite, le a sakol tung tuangte a’ ding khuapite, le Jerusalem sung, Lebanon sung, le ama ukna gam sung khempeuhah zong Solomon in a lamnop khempeuh a lamkik hi.

²⁰Israel mi a hi lo Amor mite, Hit mite, Perez mite, Hiv mite, le Jebus mite sung panin a omlai mi khempeuh,

²¹Israel mite in a suksiat khit siang zawh loh, tua gamah amau’ nunga a omlai a suanlekhakte uh, Solomon in aana tawh na a sem salin bawl ahih ciangin tuni dongin tua bangmahin amaute om uh hi.

²²Ahih hangin Solomon in Israel mite salin bawl lo hi. Amaute pen galkapte, ama nuai-ah a uliante, a galkapmangte, a leeng ukte, le a sakol tung tuangte ahi uh hi.

²³Solomon’ innlam nasep a uk ulianpite mi zanga le sawmnga ahi hi.

²⁴Faro tanu a dingin Solomon in a lamsak ama inn-ah a om dingin David khuapi panin amah a paikhiat khit ciangin Solomon in Millo a lam hi.

²⁵Solomon in TOPA a dingin a lam biakna tau tungah meihal biakna le thunuama biakna kum khatin thumvei pia-in TOPA’ mai-ah paknamtui a hal hi. Tua ahih ciangin amah in a biakinn a zo hi.

²⁶Kumpi Solomon in Edom gam sung San Tuipi gei dunga om Eloth nai-a Eziongeber-ah teembaw honkhat a bawl hi.

²⁷Tua ciangin Hiram in tua teembaw honte tawh tuipi tung nasep a thei tuipi mi a nasemte, Solomon’ nasemte tawh sawlkhia hi.

²⁸Tua ciangin amaute Ofir-ah pai-in tua lai panin kham talen zali le sawmnih hong pua uh a, amaute in Kumpi Solomon kiangah tuate tunpih uh hi.