Read Tedim Chin 2 KUMPI NIHNATE 10 Bible Online

2 KUMPI NIHNATE 10 - Tedim Chin bible

2 KUMPI NIHNATE 10

¹Tu-in Ahab’ suanlekhak mihing sawmsagih Samaria-ah teng uh hi. Tua ahih ciangin Jehu in laikhakte gelh a, khuapi ukte, upate, le Ahab’ suanlekhak a kemte tung Samaria-ah tua laite khakin,

²“Tu-in hih lai na ngah phetun, na topa uh suante note tawh omin, leengte le sakolte, kulh a nei khuapite zong, le hiamte na neihna uh thei un.

³Na topa uh suante sung pan a hoihpen le a kilawm pen teelin a pa’ kumpi tokhom tungah tusak unla, na topa uh innkuan a dingin do un,” a ci hi.

⁴Ahih hangin amaute nakpitakin lau uh a, “En un, kumpi nihte in amah nang zo lo uh ahih ciangin eite in bangci nanzawh ding ihi hiam?” a ci uh hi.

⁵Tua ahih ciangin kumpi inn a ukte le khuapi a ukte in upate le a kemte tawh kigawmin Jehu kiangah mi sawl uh a, “Kote nangma nasemte ka hi uh a, nong sawl khempeuh ka hih ding uh hi. Khat zong kumpi-in ka bawl kei ding uh hi; hoih na sak bangbangin hong hih in,” a ci uh hi.

⁶Tua ciangin Jehu in amaute kiangah laikhak nihna gelhin, “Note kei lamah omin, keima thu a mang dingin a kiging na hih uhleh, na topa uh Ahab’ suanlekhakte’ lutangte hong la unla, zing ciang tubang hunin kei kiang Jezreel-ah hong puak un,” a ci hi. Tu-in kumpipa’ suanlekhak mihing sawmsagihte pen amaute a khoi khuapi makaite tawh omkhawm uh hi.

⁷Amaute kiangah a laikhak a tun ciangin amaute in kumpipa’ suanlekhak tua mihing sawmsagihte that uh a, a lutangte seeng sungah guangin Jehu kiang Jezreel-ah a puak uh hi.

⁸Kamtai pa hong pai-in ama kiangah, “Amaute in kumpipa’ suanlekhakte’ lutangte hong paipih uh hi,” ci-in a gen ciangin amah in, “Zingsang mateng kulhkongpi lutna-ah khawl nihin koih un,” a ci hi.

⁹Zingsangin amah a paikhiat ciangin tua mite khempeuh kiangah, “Note na paubaang kei uh hi. Kumpi Joram sawmsimin a that pa keimah ka hi hi. Ahih hangin hihte khempeuh a sattuk kua ahi hiam?

¹⁰Ahab’ innkuan tawh kizomin TOPA in a gen thu, TOPA’ kammal khat zong lei-ah kialo ding hi, ci-in thei un. Bang hang hiam cih leh a nasempa Elijah kiangah a gensa thu TOPA in sem khinzo hi,” a ci hi.

¹¹Tua ahih ciangin Jehu in kuamah a siit nawn loh dongin Jezreel khua sungah Ahab’ innkuan a omlaite, a behte, le a lawm meltheihte, le a siampite khempeuh a that hi.

¹²Tua ciangin amah dingkhia-in Samaria-ah a pai hi. Lamkal, Tuucingte’ Buk a tun laitakin,

¹³Jehu in Judah kumpi Ahaziah’ behte tuak a, amah in, “Kuate na hi uh hiam?” a ci hi. Tua ciangin amaute in dawngin, “Ahaziah’ behte ka hi uh a, Jezreel khua-a om kumpinu’ tapate le kumpi ta dangte kiangah a hawh dingin hong paisuk ka hi uh hi,” a ci uh hi.

¹⁴Amah in a mite kiangah, “Hingmat un,” a ci hi. Tua ciangin amaute in tua mite hingmat uh hi. Tua ciangin amaute thatin tua lai-a om dum sungah amaute mi sawmli le nih a sisa-in lawnsuk uh a, amah in amaute khat zong hingkhawi lo hi.

¹⁵Tua lai panin amah a kihepkhiat ciangin amah a dawn dingin a hong pai Rekhab’ tapa Jehonadab tawh kituak hi. Jehu in tua pa hopihin ama kiangah, “Keima lungsim nang tungah a thuman bangin nang’ lungsim kei’ tungah a thuman hiam?” a ci hi. Tua ciangin Jehonadab in dawngin, “Man hi,” a ci hi. Jehu in, “A man le na khut hong khak in,” a ci hi. Tua ahih ciangin amah in a khut a khak hi. Tua ciangin Jehu in leeng sungah amah kaito hi.

¹⁶Tua ciangin amah in, “Kei hong zui inla, TOPA a’ ding ka deihluatna hong thei in,” a ci hi. Tua ahih ciangin Jehu in a leeng sungah amah tuangsak hi.

¹⁷Samaria-ah a tun ciangin TOPA in Elijah’ tungah a gen bangin Jehu in amaute a siakkhiat dongin Samaria sunga Ahab mi a omlaite khempeuh a that khin hi.

¹⁸Tua ciangin Jehu in mi khempeuh khawmin amaute kiangah, “Ahab in Baal na tawmkhat sem a, ahi zongin Jehu in tampi semzaw ding hi.

¹⁹Tua ahih ciangin tu-in Baal kamsangte khempeuh, le a siampite khempeuh kei kiangah hong sam un. Baal tungah biakpiakna lianpi nei ding ka hih manin kuamah pelemsak kei un. A pelem peuhmah nungta lo ding hi,” a ci hi. Ahih hangin Baal a biate a suksiat theih nadingin Jehu in ngian tawh a hih ahi hi.

²⁰Tua ciangin Jehu in thu pia-in, “Baal a dingin a thupi kikhopna khat bawl un,” a ci hi. Tua ahih ciangin amaute in tua thu zasak uh hi.

²¹Tua ciangin Jehu in Israel sung khempeuhah thu zasak hi. Baal a bia khempeuh hong pai uh a, hong pai lo mi khat zong om lo hi. Tua ciangin Baal biakinn sungah amaute lut uh a, Baal biakinn mong khat pan mong khat dong a dim uh hi.

²²Amah in puan koihna a ukpa kiangah, “Baal a biate khempeuh a dingin puante hong la in,” a ci hi. Tua ahih ciangin amah in amaute-a’ dingin a puante hong paikhiatpih hi.

²³Tua ciangin Rekhab’ tapa Jehonadab tawh Baal biakinn sungah Jehu a tum hi. Tua ciangin amah in Baal a biate kiangah, “Hih lai-ah Baal a biate bek omin note’ lakah TOPA’ nasemte a om loh nading thei unla, zong un,” a ci hi.

²⁴Tua ciangin biakpiaknate le meihal biaknate a pia dingin amah a tum hi. Tu-in Jehu in a pualamah mi sawmgiat koih a, “Na khutsung uhah kong piakte khat peuhpeuh a khahsuah pa in ama nuntakna tawh loh ding hi,” a ci hi.

²⁵Tua ahih ciangin meihal biakna a bawl a man khit phetin Jehu in a cingte le uliante kiangah, “Sungtum unla, amaute that un; mi khat zong suaktasak kei un,” a ci hi. Amaute in namsau tawh a thah khit uh ciangin a cingte le uliante in amaute lawnkhia uh a, tua ciangin Baal biakinn sungnung dei-ah tumin,

²⁶Baal biakinn sunga om biakna song paikhiatpihin a hal uh hi.

²⁷Tua ciangin amaute in Baal biakna song susia-in, Baal biakinn susia uh a, tuni dongin ekbuk a suaksak uh hi.

²⁸Tua bangin Jehu in Israel sung panin Baal siakkhia hi.

²⁹Ahih hangin Bethel le Dan-ah a om kham bawngnote ahi, Israel-te a khialhsakna, Nebat’ tapa Jeroboam’ khialhnate panin Jehu kiheikhia lo hi.

³⁰Tua ciangin TOPA in Jehu kiangah, “Nangmah in keima muhna-ah a man thu limtakin na sepna hang, le ka lungsimah a om bangin Ahab’ innkuan tungah na bawlna hangin, na suante khang lina dongin Israel kumpi tokhom tungah tu ding hi,” a ci hi.

³¹Ahih hangin Jehu in a lungsim khempeuh tawh Israel Pasian, TOPA’ thukham limtakin zuih ding ngaihsun lo hi. Israel-te a khialhsakna ahi Jeroboam’ khialhnate panin amah kihei lo hi.

³²Tua hun lai-in TOPA in Israel gam pawlkhat khenkhiat ding kipan hi. Hazael in Israel gam sung khempeuhah amaute zo hi.

³³Jordan panin nisuahna lam, Gilead gam khempeuh, Gad mite, Reuben mite, le Manasseh mite, Arnon kuam gei-a om Aroer panin Gilead le Bashan gam khempeuh a zogawp hi.

³⁴Tu-in Jehu’ gamtatna a omlaite, a sep khempeuh, le ama thahatnate khempeuh, Israel Kumpite’ Khang Tangthu Laibu sungah kigelh hi.

³⁵Tua ciangin Jehu si a, amaute in Samaria-ah amah a vui uh hi. Tua ciangin ama tapa Jehoahaz in ama tangin a uk hi.

³⁶Jehu in Samaria panin Israel tungah kum sawmnih le giat sung a uk hi.