Read Tedim Chin 2 KUMPI NIHNATE 12 Bible Online

2 KUMPI NIHNATE 12 - Tedim Chin bible

2 KUMPI NIHNATE 12

¹Jehu’ kum sagihna kumin Joash in uk ding kipan a, amah in Jerusalem-ah kum sawmli sung uk hi. Ama nu’ min Zibiah hi a, Beersheba khuami ahi hi.

²Siampi Jehoiada in amah thuhilh ahih manin Joash in ama uk hun sung tawntung TOPA’ muhna-ah a man gamta hi.

³Ahi zongin mualtung a biaknate kilakhia lo hi. Mite in tuate tungah biakna pia-in paknamtui hal lai uh hi.

⁴Joash in siampite kiangah, “Pasian’ biakinn sungah a kipaipih a siangtho nate’ man sum khempeuh, a milipin piak dingin a kiseh sum, le amau’ utthu tawh Pasian’ biakinn-ah a kipaipih sumte,

⁵nomau’ nasepna mite ciat panin no siampite in khawm un. Tua ciangin biakinn puahphatna ding a kisapna a kimuhna khempeuh puahsak un,” a ci hi.

⁶Ahih hangin Kumpi Joash’ uk kum sawmnih le thumna kum dongin siampite in biakinn puah kipan nai lo uh hi.

⁷Tua ahih ciangin Kumpi Joash in siampi Jehoiada le siampi dangte samin amaute kiangah, “Bang hangin biakinn puah lo na hi uh hiam? Tua ahih ciangin tu-in na nasepna uh mite kiang panin na sumlakte uh kem nawn kei unla, a sumte biakinn puah nadingin ap un,” a ci hi.

⁸Tua ahih ciangin mite tung pan sum kaihkhop tavuan la nawn loin, biakinn puah ding zong tavuan a lak nawn loh nading uh siampite a thukim uh hi.

⁹Tua ciangin siampi Jehoiada in singkuang khat la-in a siin vutvang a, TOPA’ biakinn sung tum ciangin taklam pang khuam gei-ah a koih hi. Tua ciangin kongkhak a cing siampite in TOPA’ biakinn sungah a kipaipih sum khempeuh tua sungah a koih uh hi.

¹⁰Singkuang sungah sum tam om hi, ci-in a theih peuhpeuh uh ciangin kumpipa’ lai-at pa le siampi lianpen pa hong paito-in TOPA’ biakinn sungah a om sumte amaute in simin ip-in tun uh hi.

¹¹Tua ciangin amaute in TOPA’ biakinn a en nasemte’ khut sungah a tawi teh khiat uh sumte pia uh hi. Tua ciangin amaute in TOPA’ biakinn a sem khutsiamte le innlamte tung,

¹²le leilesuang innlam siamte le suangseekte tungah TOPA’ biakinn puah nadingin sing leina ding le suang tawhna ding, le biakinn puahna khat peuhpeuh a zat dingin piakhia uh hi.

¹³Ahih hangin TOPA’ biakinn a dingin ngun kuangte, taitehte, haite, peengkulte, ahih kei leh kham ahi a, ngun nazat khat peuhpeuh ahi zongin, TOPA’ biakinn-ah a kipaipih sumte panin kibawl lo hi.

¹⁴Bang hang hiam cih leh TOPA’ biakinn a puah nasemte tungah tua sumte kipia hi.

¹⁵Amaute in thuman takin na sem uh ahih manin nasemte tungah piak dingin a khutsung uhah sum a apnate uh tung panin amaute in sazian ngen lo uh hi.

¹⁶Mawhna hanga piak sum le khialhna hanga piak sumte TOPA’ biakinn sungah kipaipih lo hi; tuate pen siampite-a’ ahi hi.

¹⁷Tua hun laitakin Syria kumpipa Hazael kuanto-in Gath simin a la hi. Ahih hangin Hazael in Jerusalem simin a paito dingin a mai a ngat ciangin,

¹⁸Judah kumpi Joash in Judah kumpite ahi ama hun ma-a sem Jehoshafat le Jehoram le Ahaziahte’ apsa thuciam piakna letsongte khempeuh, le ama thuciam piakna letsongte, le TOPA’ biakinn le kumpipa’ sumkoihnate-ah a om kham khempeuh la-in Syria kumpipa Hazael kiangah a puak hi. Tua ciangin Jerusalem panin Hazael a paikhia hi.

¹⁹Tu-in Joash’ gamtatna a omlaite, le a hih khempeuh, Judah Kumpite’ Khang Tangthu Laibu sungah kigelh hi.

²⁰Ama nasemte kipanin sawmsimna khat vaihawm uh a, Silla paisukna lampi, Millo inn sungah Joash a that uh hi.

²¹Amah a satpukte pen ama nasemte, Shimeath’ tapa Jozakar le Shomer’ tapa Jehozabad ahi hi; tua hi a, amah si ta hi. Tua ciangin amaute in David khuapi sungah a pate tawh amah vui uh a, ama tangin a tapa Amaziah in a uk hi.