Read Tedim Chin 2 KUMPI NIHNATE 15 Bible Online

2 KUMPI NIHNATE 15 - Tedim Chin bible

2 KUMPI NIHNATE 15

¹Israel kumpi Jeroboam Nihna’ kum sawmnih le sagihna kumin Judah kumpipa, Amaziah’ tapa Uzziah in uk ding kipan hi.

²Amah in uk ding a kipatin kum sawm le guk pha a, Jerusalem-ah kum sawmnga le nih sung uk hi. Ama nu’ min Jekoliah hi a, Jerusalem khuami ahi hi.

³A pa Amaziah’ sepna khempeuh tawh kizui-in TOPA’ mitah a man gamta hi.

⁴Ahi zongin mualtung a biaknate kilakhia lo hi. Mite in tuate tungah biakna pia-in paknamtui hal lai uh hi.

⁵Tua ciangin TOPA in phaknatna tawh kumpipa vat ahih manin a sih ni dongin amah a phak hi a, inn tuam sungah amah teng hi. Tua ciangin kumpipa’ tapa Jotham pen a innkuan tungah a uk hi a, tua gam mite a uk hi.

⁶Tu-in Uzziah’ gamtatna a omlaite, le a hih khempeuh, Judah Kumpite’ Khang Tangthu Laibu sungah kigelh hi.

⁷Tua ciangin Uzziah si a, amaute in David khuapi sungah a pate tawh amah vui uh a, tua ciangin ama tangin a tapa Jotham in a uk hi.

⁸Judah kumpi Uzziah’ kum sawm le giatna kumin Jeroboam Nihna’ tapa Zekhariah in Samaria panin Israel tungah kha guk sung uk hi.

⁹A pate’ hihsa bangin TOPA’ muhna-ah amah a sia gamta hi. Israel a khialhsakna, Nebat’ tapa Jeroboam’ khialhnate panin amah kihemkhia lo hi.

¹⁰Jabesh’ tapa Shallum in amah sawmsim a, Ibleam-ah amah satpukin that a, tua ciangin ama tangin a uk hi.

¹¹Tu-in Zekhariah’ sepna a omlaite, Israel Kumpite’ Khang Tangthu Laibu sungah kigelh hi.

¹²(Hih pen TOPA’ thuciamna, Jehu tungah a piak, “Na suante khang lina dongin Israel kumpi tokhom tungah tu ding hi,” a cih ahi hi. Tua ahih ciangin tua bangin a piang ahi hi.)

¹³Judah kumpi Uzziah’ kum sawm le kuana kumin Jabesh’ tapa Shallum in uk ding kipan a, amah in Samaria-ah kha khat sung uk hi.

¹⁴Tua ciangin Tirzah panin Gadi’ tapa Menahem hong paito-in Samaria hong tung a, tua ciangin amah in Samaria-ah Jabesh’ tapa Shallum satpukin that a, ama tangin a uk hi.

¹⁵Tu-in Shallum’ sepna a omlaite, le amah in a hihsa a sawmsimna, Israel Kumpite’ Khang Tangthu Laibu sungah kigelh hi.

¹⁶Tua hun laitakin Menahem in Tappuah le a sunga teng khempeuh le Tirzah pan a kipan a gam sungteng a luh hi. Bang hang hiam cih leh amaute in ama a dingin a kongpite uh hong lo uh hi. Tua ahih ciangin amah in luhin, a sunga om numei naupaii khempeuh a phelkham hi.

¹⁷Judah kumpi Uzziah’ kum sawmthum le kuana kumin Gadi’ tapa Menahem in Israel tungah uk ding kipan a, amah in Samaria panin kum sawm sung uk hi.

¹⁸TOPA’ muhna-ah amah a sia gamta hi. Israel khempeuh a khialhsakna, Nebat’ tapa Jeroboam’ khialhnate khempeuh panin a nuntak sung tawntung amah kihemkhia lo hi.

¹⁹Assiria kumpi Tiglathpileser tua gam a sim dingin kuanto hi. Tua ciangin ama kumpi aana a kipna ding a huh ding a deihna-in Menahem in Tiglathpileser tungah ngun talen tulkhat a pia hi.

²⁰Menahem in Assiria kumpipa tungah a piak dingin mihau khempeuh, a mi kim khut tung panin ngun shekel sawmnga, Israel-te tung panin sum a dok hi. Tua ahih ciangin Assiria kumpipa kiheikik a, tua gam sungah om lo hi.

²¹Tu-in Menahem’ sepna a omlaite, le a hih khempeuh, Israel Kumpite’ Khang Tangthu Laibu sungah kigelh hi.

²²Tua ciangin Menahem si a, ama tangin a tapa Pekahiah in a uk hi.

²³Judah kumpi Azariah’ kum sawmngana kumin Menahem’ tapa Pekahiah in Samaria panin Israel tungah uk ding kipan a, amah in kum nih sung uk hi.

²⁴TOPA’ muhna-ah amah a sia gamta hi. Israel a khialhsakna, Nebat’ tapa Jeroboam’ khialhnate panin amah kiheikhia lo hi.

²⁵Tua ciangin ama nuai-ah a ukpa, Remaliah’ tapa Pekah in Gilead mi sawmnga tawh amah sawmsim a, kumpipa’ inn sungtawng, Samaria-ah amah that hi. Amah a thah khit ciangin ama tangin a uk hi.

²⁶Tu-in Pekahiah’ nasepna a omlaite, le a hih khempeuh, Israel Kumpite’ Khang Tangthu Laibu sungah kigelh hi.

²⁷Judah kumpi Uzziah’ kum sawmnga le nihna kumin Remaliah’ tapa Pekah in Samaria panin Israel tungah uk ding kipan a, kum sawmnih sung uk hi.

²⁸TOPA’ muhna-ah amah a sia gamta hi. Israel a khialhsakna, Nebat’ tapa Jeroboam’ khialhnate panin amah kihemkhia lo hi.

²⁹Israel kumpi Pekah’ hun laitakin Assiria kumpi Tiglathpileser hong pai-in Ijon, Abelbethmaakah, Janoah, Kedesh, Hazor, Gilead, le Galilee, le Naftali gam khempeuh la a, amah in galmatin mite Assiria-ah a ciahpih hi.

³⁰Tua ciangin Uzziah’ tapa Jotham’ kum sawmnihna kumin Elah’ tapa Hoshea in Remaliah’ tapa Pekah sawmsimin amah satpukin that a, tua ciangin ama tangin a uk hi.

³¹Tu-in Pekah’ gamtatna a omlaite, le a hih khempeuh, Israel Kumpite’ Khang Tangthu Laibu sungah kigelh hi.

³²Israel kumpi Remaliah’ tapa Pekah’ kum nihna kumin Judah kumpi Uzziah’ tapa Jotham in uk ding kipan hi.

³³Amah in uk ding a kipatin kum sawmnih le nga pha a, amah in Jerusalem-ah kum sawm le guk sung uk hi. Ama nu’ min Jerusha hi a, Zadok’ tanu ahi hi.

³⁴A pa Uzziah’ gamtatnasa khempeuh bangin TOPA’ mitah amah a manin gamta hi.

³⁵Ahi zongin mualtung a biaknate kikoihkhia lo hi. Mite in tuate’ tungah biaknate pia-in paknamtui hal lai uh hi. Amah in TOPA’ biakinn kulhkongpi tungnung bawl hi.

³⁶Tu-in Jotham’ nasepna a omlaite, le a hih khempeuh, Judah Kumpite’ Khang Tangthu Laibu sungah kigelh hi.

³⁷Tua hunin TOPA in Judah a sim dingin Syria kumpipa Rezin le Remaliah’ tapa Pekah sawl ding kipan hi.

³⁸Jotham si a, a pu David khuapi sungah a pate tawh kivui hi. Ama tangin a tapa Ahaz in uk hi.