Read Tedim Chin 2 KUMPI NIHNATE 21 Bible Online

2 KUMPI NIHNATE 21 - Tedim Chin bible

2 KUMPI NIHNATE 21

¹Manasseh in uk ding a kipatin kum sawm le nih pha a, amah in Jerusalem-ah kum sawmnga le nga sung a uk hi. Ama nu’ min Hefzibah ahi hi.

²TOPA in Israel mite’ mai-ah a hawlkhiat minamte’ gamtatna a kihhuaite mah bangin TOPA’ muhna-ah amah a sia gamta hi.

³Bang hang hiam cih leh amah in a pa Hezekiah’ suksiatsa mualtung a biaknate lamkik hi. Tua ciangin amah in Baal a dingin biakna taute phut a, Israel kumpi Ahab’ bawl bangin Asherah milim khat bawl a, vantung a om nate khempeuh bia-in tuate’ na a sem hi.

⁴Tua ciangin TOPA in, “Jerusalem-ah ka min ka koih ding hi,” a cihna TOPA’ biakinn sungah amah in biakna taute lam hi.

⁵Tua ciangin amah in TOPA’ biakinn tual nihte tungah vantung a om nate khempeuh a dingin biakna taute a lam hi.

⁶Tua ciangin amah in biakna-in a tapa hal a, aisanna le mailam thugen kholhnate semin, vankah theite le aisante tawh na semkhawm hi. TOPA’ muhna-ah amah a sia tampi gamta a, amah hehsak hi.

⁷Tua ciangin TOPA in David le a tapa Solomon tungah, “Israel minam khempeuh sung panin ka teelkhiat hih biakinn sung le Jerusalem-ah ka min ka koih tawntung ding hi. Amaute ka thupiaksa khempeuh tawh kizui, le ka nasempa Moses in amaute a piak thukham khempeuh tawh kizui-in gamtat ding a kingaihsut nak-uhleh, a pu a pate uh tungah ka piak gam sungah Israel mite mi vakvai ka hisak nawn kei ding hi,” a cihna biakinn sungah amah in ama bawlsa a kiseek Asherah milim a koih hi.

⁹Ahih hangin amaute in thu ngai lo uh a, TOPA in Israel-te’ mai-ah a suksiat minamte’ gamtatna sangin a siahuaizaw a gamtat nadingun Manasseh in amaute a zol hi.

¹⁰Tua ciangin TOPA in kamsangte ahi a nasemte’ tungtawnin gen a,

¹¹“Judah kumpipa Manasseh in hih a kihhuai nate sem a, ama ma-a Amor mite’ gamtatna sangin a siazaw-in na semin a milimte tawh Judah mite zong khialsak khin hi.

¹²Tua ahih ciangin Israel Pasian TOPA in hih bangin ci hi: En un, a za mite khempeuh’ bilte a vut ding siatna Jerusalem le Judah tungah ka tungsak ding hi.

¹³Keimah in Samaria le Ahab le ama suante gim ka piak bangin Jerusalem tungah gimna ka tungsak ding hi. Tua ciangin mi khat in pakan a nul bangin keimah in Jerusalem nulin ka lumlet ding hi.

¹⁴Tua ciangin keimah in ka mi a omlaite paaikhia-in amau’ galte tungah ka pia ding a, amaute pen a galte’ mat ding mi le vankiate suak ding uh hi;

¹⁵bang hang hiam cih leh a pu a pate uh Egypt panin hong paikhiat a kipan tuni dongin keima muhna-ah a sia gamta-in kei hong hehsak uh hi,” a ci hi.

¹⁶Tua tham loin TOPA’ muhna-ah amaute a sia a gamtat nadingun amah in Judah mite a khialhsak banah, Jerusalem mong khat pan mong khat sisan tawh a kidimsak dongin Manasseh in mawhna baang lo mi tampi a that hi.

¹⁷Manasseh’ sepna a omlaite, a hih khempeuh, le ama hihsa a khialhna, Judah Kumpite’ Khang Tangthu Laibu sungah kigelh hi.

¹⁸Tua ciangin Manasseh si a, Uzza’ huansung, ama inn huan sungah kivui hi. Tua ciangin ama tangin a tapa Amon in a uk hi.

¹⁹Amon in uk ding a kipatin kum sawmnih le nih pha a, amah in Jerusalem-ah kum nih sung uk hi. Ama nu’ min Meshullemeth hi a, Jotbah khuami Haruz’ tanu ahi hi.

²⁰A pa Manasseh’ gamtat bangin TOPA’ muhna-ah amah a sia gamta hi.

²¹Amah in a pa’ khekhap khempeuh tawn a, a pa in a na a sepsak milimte’ na mah semin tuate a bia hi.

²²Amah in a pu a pate’ Pasian, TOPA nusia a, TOPA’ lampi tawn lo hi.

²³Tua ciangin Amon’ nasemte in amah sawmsim uh a, ama inn sungah kumpipa a that uh hi.

²⁴Ahih hangin tua gammite in Kumpi Amon a sawmsimte khempeuh that leuleu uh a, tua ciangin tua gammite in ama tangin a tapa Josiah kumpi-in a koih uh hi.

²⁵Tu-in Amon’ hihsa a gamtatna a omlaite pen Judah Kumpite’ Khang Tangthu Laibu sungah kigelh hi.

²⁶Tua ciangin Uzza’ huansung ama hanah amah kivui a, ama tangin a tapa Josiah in a uk hi.