Read Tedim Chin 2 KUMPI NIHNATE 4 Bible Online

2 KUMPI NIHNATE 4 - Tedim Chin bible

2 KUMPI NIHNATE 4

¹Tu-in kamsang honte sung pan mi khat’ zi Elisha’ tungah kiko-in, “Na nasem ka pasal si hi. Na nasempa in TOPA a zahtakna na thei hi. Ahih hangin ka tapate nih sila dingin a la dingin a leibatna pa hong pai hi,” a ci hi.

²Tua ciangin Elisha in tua numei kiangah, “Nang a dingin bang hong hihsak thei ding ka hi hiam? Inn sungah bang nei na hi hiam?” a ci hi. Tua ciangin amah in, “Na nasemnu in sathau biing khat cih simloh inn sungah bangmah dang nei lo hi,” a ci hi.

³Tua ciangin amah in, “A pua-ah paikhia inla, beel hawm a tawm lua lo, na vengte khempeuh’ beel va kawm in.

⁴Tua ciangin sungtumin, nang le na tapate kong kikhaknelh unla, hih beelte khempeuh sungah sung in. Beel khat a dim simin tuamkoih pahpah in,” a ci hi.

⁵Tua ahih ciangin ama kiang panin tua numei paikhia-in amah le a tapate kong kikhaknelh uh hi. Amah in a sun’ laitakin a tapate in ama kiangah a beelte paipih uh hi.

⁶Beelte a dim ciangin amah in a tapa khat kiangah, “Beel dang khat hong paipih in,” a ci hi. Tua ciangin a tapa in, “Beel adang om nawn lo hi,” a ci hi. Tua ciangin sathau a luan a khawl hi.

⁷Tua nu hong pai-in Pasian’ mipa kiangah a thu teng gen a, tua ciangin amah in, “Pai in; a sathau zuakin na leibate loh in. Nang le na tapate, a omlaite tawh na nungta ding uh hi,” a ci hi.

⁸Ni khat Shunem-ah Elisha paisuak a, tua lai-ah a hau numei khat tengin tua nu in an ne dingin amah a sam hi. Tua ahih ciangin amah in tua lam a nawk peuhpeuh ciangin an ne dingin tua lai-ah baang zel hi.

⁹Tua ciangin tua numei in a pasal kiangah, “Tu-in en in, hih lai mun hong nawk tawntungpa pen Pasian’ mi siangtho hi, ci-in ka thei hi.

¹⁰Eite kiangah amah hong pai peuhpeuh ciangin a tuntheih nadingin innkhumzangah kawm a nei inndeineu khat bawlin tua sungah ama a dingin lupna khat, sabuai khat, tutphah khat, le meivak khat koihsak ni,” a ci hi.

¹¹Nikhat amah tua lai-ah hong pai-in inndei sungah lutin

¹²tua lai-ah tawlnga hi. Tua ciangin amah in a nasempa Gehazi kiangah, “Hih Shunem mi sam in,” a ci hi. Amah in tua numei a sap ciangin ama mai-ah tua nu hong ding hi.

¹³Tua ciangin Elisha in ama kiangah, “Tu-in tua nu kiangah hih bangin gen in: Thei in, kote a dingin hih haksatna khempeuh na thuak hi. Nang a dingin bang hong kihihsak ding deih na hi hiam? Kumpipa kiang ahih kei leh galkap a ukpa kiangah nang tangin thu khat peuhpeuh hong kigensak ding na deih a om hiam?” a ci hi. Amah in dawngin, “Kei pen ka mipihte lakah teng ka hih manin bangmah ka kisam kei hi,” a ci hi.

¹⁴Tua ciangin amah in, “Tua bang ahihleh tuanu a dingin bang kihihsak thei ding ahi hiam?” a ci hi. Gehazi in dawngin, “Thu khat bek om hi. Tua nu in tapa nei lo a, a pasal teekta hi,” a ci hi.

¹⁵Amah in, “Tua nu sam in,” a ci hi. Amah in tua nu a sap ciangin kongkalai-ah a hong ding hi.

¹⁶Tua ciangin amah in, “A hun hong tun ciangin tapa khat na tawi ding hi,” a ci hi. Tua ciangin tua nu in, “Hilo hi, ka topa, Pasian’ mipa aw; na nasemnu tungah zuau kei in,” a ci hi.

¹⁷Ahih hangin tua nu in nau paii a, Elisha in ama tungah a gensa bangin a hun a tun kik ciangin amah in tapa khat a nei hi.

¹⁸Naupang a gol ciangin ni khat a pa kiang anlate lakah a pai hi.

¹⁹Tua ciangin amah in a pa kiangah, “Aw, ka lutang, ka lutang!” a ci hi. A pa in a nasempa kiangah, “A nu kiangah va pua in,” a ci hi.

²⁰Amah in domin a nu kiangah a paipih ciangin a ang sungah sun dong naupang tawi a, tua ciangin a si hi.

²¹Tua ciangin tua nu paito-in Pasian’ mipa lupna tungah amah koih a, amah kong khaknelhin a paikhia hi.

²²Tua ciangin amah in a pasal samin, “Manlang takin Pasian’ mipa kiangah pai-in kong ciahkik theih nadingin nasemte khat le late khat hong puak in,” a ci hi.

²³Tua ciangin amah in, “Bang hangin tuni-in ama kiangah pai ding na hi hiam? Khadet ni ahi a, Sabbath ni ahi zongin hi lo hi,” a ci hi. Amah in, “Hong hoih na ding hi,” a ci hi.

²⁴Tua ciangin amah inla van vawhin a nasempa kiangah, “Gan nawh in; kong gen kei nakleh kei a dingin a pai khiamsak kei in,” a ci hi.

²⁵Tua ahih ciangin amah ding khia a, Karmel Mual a, Pasian’ mipa kiangah a pai hi. Pasian’ mipa in amah hong pai a muh ciangin a nasempa Gehazi kiangah, “En in, galah Shunem nu hong pai hi.

²⁶Amah a dawn dingin thakhatin va tai inla ama kiangah, ‘Na dam hiam? Na pasal a dam hiam? Naupang a dam hiam?’ va ci in,” a ci hi. Tua ciangin tua nu in, “Hoih hi,” a ci hi.

²⁷Tua ciangin Pasian’ mipa kiang mualtungah tua nu a tun ciangin tua nu in ama khe len hi. Tua ciangin amah a sawnkhia dingin Gehazi hong pai hi. Ahih hangin Pasian’ mipa in, “Amah tuaci omsak in; bang hang hiam cih leh amah nakpitakin lungkham hi. TOPA in kei tungah a thu hong im a, kei kiangah hong gen lo hi,” a ci hi.

²⁸Tua ciangin tua nu in, “Ka topa’ tung pan tapa hong ngen ka hi hiam? Kei hong khem kei in, hong ci hi lo ka hi hiam?” a ci hi.

²⁹Amah in Gehazi kiangah, “Na kawng gak inla na khutah ka ciangkhut tawi-in pai in. Mi khatpeuh in nang hong hopih leh zong dawng kei in. Tua ciangin naupang’ mai tungah ka ciangkhut va nga in,” a ci hi.

³⁰Tua ciangin naupang’ nu in, “TOPA nungta a, nangmahmah na nuntak mah bangin, nang kong nusia kei ding hi,” a ci hi. Tua ahih ciangin amah dingin tua nu a zui hi.

³¹Gehazi na mapai suakin naupang’ maitang tungah a ciangkhut nga a, ahih hangin awging ahi a, nuntakna lim ahi zongin om lo hi. Tua ahih ciangin amah a dawn dingin hong kileh kikin ama kiangah, “Naupang khanglo nai lo hi,” a ci hi.

³²Inn sungah Elisha hong tun ciangin amah in a lupna tungah a si-in a lum naupang a mu hi.

³³Tua ahih ciangin amah bek lutin kong a kikhaknelh hi. Tua ciangin TOPA’ tungah thu ngen hi.

³⁴Tua ciangin amah paito-in naupang’ tungah bok a, ama kam le naupang’ kam tuahin, a naupang’ mit tungah ama mitte omsak a, a naupang’ khutte tungah ama khutte omsak hi. Tua ciangin ama tungah kikhuang a, naupang a ci hong lum hi.

³⁵Tua ciangin amah dingto kikin inn sungah khatvei vak kawikawi a, tua ciangin paito-in ama tungah kikhuang leuleu hi. Naupang sagihvei hong hetchiai-in a mit a hak hi.

³⁶Tua ciangin amah in Gehazi samin, “Shunem numei sam in,” a ci hi. Tua ahih ciangin amah in tua nu a sam hi. Tua nu ama kiangah hong pai ciangin amah in, “Na tapa la in,” a ci hi.

³⁷Tua nu hong pai-in ama khe-ah pukin leilakah a kun hi. Tua ciangin a tapa la-in a paikhia hi.

³⁸Tua gam sungah kialpi a tun laitakin Gilgal-ah Elisha hong paikik hi. Kamsangte ama mai-ah tu-in thu a ngaih laitakin amah in a nasemte kiangah, “Beelpi suang unla kamsangte a’ ding meh huan un,” a ci hi.

³⁹Amaute khat meh zong dingin gamlakah pai a, vatak-um gui khat mu-in tua tung panin a ang dimin umgah lo a, tuate bang hiam cih thei lopi-in hong pai-in mehbeel sungah atnen hi.

⁴⁰Tua ciangin amaute in mite’ nek dingin hong thukkhia uh hi. Ahih hangin amaute in meh a nek laitakun amaute kiko-in, “Pasian’ mipa aw, an sungah gu om!” a ci uh hi. Amaute in ne thei lo uh hi.

⁴¹Amah in, “Tua ahihleh a an tawm hong la un,” a ci hi. Tua ciangin amah in beel sungah tua an lawn a, “Amaute in a nek theih nadingin mite a dingin thukkhia un,” a ci hi. Tua ciangin bangmah ci nawn lo hi.

⁴²Mi khat Baalshalishah panin hong pai-in Pasian’ mipa kiangah anpal anlum, mangbuhham lum sawmnih, le anvui a thak a van sungah hong pua hi. Tua ciangin Elisha in a nasempa kiangah, “Amaute in a nek theih nadingun kamsangte tungah pia in,” a ci hi.

⁴³Ahih hangin a nasempa in, “Mihing za khatte’ mai-ah keimah in hih bangci lui theih ding ka hi hiam?” a ci hi. Ahi zongin amah in, “Amaute in a nek theih nadingun mite tungah tuate pia in. Bang hang hiam cih leh TOPA in, ‘Amaute in ne-in khamval ding uh hi,’ ci hi,” a ci kik hi.

⁴⁴Tua ciangin amah in amaute mai-ah tua an a lui hi. Tua ciangin amaute in ne uh a, TOPA’ gensa bangin pawlkhat a vallai hi.