Read Tedim Chin 2 KUMPI NIHNATE 5 Bible Online

2 KUMPI NIHNATE 5 - Tedim Chin bible

2 KUMPI NIHNATE 5

¹Syria kumpipa’ galkap a uk Naaman pen kumpipa’ maipha a ngah ulianpi khat ahi hi. Bang hang hiam cih leh TOPA in ama hangin Syria mite gualzawhna pia hi. Amah a thahat a vanglian khat hi a, ahih hangin amah a phak ahi hi.

²Syria mite in a galsimna khat uhah Israel gam panin numeino khat ciahpih uh a, tua nu in Naaman’ zi na’ a sem hi.

³Amah in a tonu kiangah, “Samaria-ah a om kamsangpa tawh ka topa kimu thei leh! Amah in a phakna damsak ding hi,” a ci hi.

⁴Naaman in hih thu a zak ciangin sungtumin a topa kiangah, “Tua bang tua bangin Israel gam numeino in thu gen hi,” ci-in a gen hi.

⁵Tua ciangin Syria kumpipa in, “Tu-in pai in. Israel kumpipa kiangah lai khat ka khak ding hi,” a ci hi. Tua ahih ciangin amah pai-in ngun talen sawm, kham shekel tulguk, le pawipuan sawm a keng hi.

⁶Amah in Israel kumpipa tungah laikhak keng a, tua sungah, “Hih laikhak na ngah ciangin, ama phakna na damsak theih nadingin ka nasempa Naaman nangma kiangah kong sawlna thu thei in,” a ci hi.

⁷Israel kumpipa in a laikhak a sim ciangin amah in a puante balkekin, “Mi khat a phaknatna damsak dingin hih mipa in kei tungah hih thu hong puak nadingin a that ding le a nungtasak dingin kei, Pasian ka hi hiam? Ngaihsun dih un. Kei tawh kitotna ding a zonna thei un,” a ci hi.

⁸Ahih hangin Israel kumpipa in a puante a balkekna thu Pasian’ mipa Elisha in a zak ciangin amah in kumpipa kiangah mi sawlin, “Bang hangin na puante balkek na hi hiam? Israel sungah kamsang khat a omna thu amah in a theih nadingin tu-in kei kiangah amah hong paisak in,” cisak hi.

⁹Tua ahih ciangin a sakolte le a leengte tawh Naaman hong pai-in Elisha’ kongah a khawl hi.

¹⁰Tua ciangin Elisha in ama kiangah kamtai khat sawlin, “Pai in la, Jordan gun sungah sagihvei va kisil in. Tua ciangin nangma cilesa a ngei hong bangkikin, nang na siang ding hi,” cisak hi.

¹¹Ahih hangin Naaman hehin paikhia a, “En un, amah kei kiangah hong paikhia-in, ka gei-ah hong dingin, a Pasian a TOPA’ min loin, a natna mun tungah a khut vanin, kei miphak pa hong damsak taktak ding hi, ci-in ka ngaihsun hi.

¹²Israel tuite khempeuh sangin Damaskas gam a om Abana le Farpar gun tuite hoihzaw hi lo ahi hiam? Tuate’ sungah kisilin siang thei lo ding ka hi hiam?” a ci hi. Tua ahih ciangin amah kihei-in paikhia hi.

¹³Ahih hangin a nasemte a nai-ah hong pai-in ama kiangah, “Ka topa aw, kamsangpa in na lian khat a sem dingin hong sawl hileh sem ding hi lo na hi hiam? Tua ahih ciangin amah in nang kiangah, ‘Kisil inla siang in,’ hong cih ciangin na hih ding bangzah ta-in kilawmzaw hi lo ahi hiam?” a ci uh hi.

¹⁴Tua ahih ciangin Pasian mipa’ kamgen bangin amah paisukin Jordan gun sungah sagihvei kidiah hi. Tua ciangin a cilesa naupangno cilesa bangin a ngei bangkikin amah a siang hi.

¹⁵Tua ciangin Pasian’ mipa kiangah amah le a pawlte khempeuh kileh kikin ama mai-ah ding uh hi. Tua ciangin amah in, “En in, leitung mundang khempeuhah Pasian om loin, Israel sung bekah om hi, ci-in ka thei hi. Tua ahih ciangin tu-in na nasempa tung panin letsong khat hong sang in,” a ci hi.

¹⁶Ahih hangin amah in, “A na ka sep TOPA a nungta ahih mah bangin, bangmah kong sang kei ding hi,” a ci hi. Tua ciangin amah in a lakna ding kunh teitei a, ahih hangin amah in nial veve hi.

¹⁷Tua ciangin Naaman in, “Tua ahihleh kong thum hi, na nasempa tungah la-sakol nih puakkhop leitang hong pia in. Bang hang hiam cih leh tu a kipanin na nasempa in meihal biakna ahi a, biakpiakna ahi zongin pasian dangte khat peuhpeuh tungah pia loin TOPA’ tung bekah pia ding hi.

¹⁸Ahi zongin hih thu-ah TOPA in na nasempa a mawhna hong maisak hen: Rimmon biakinn sungah a bia dingin ka topa a pai ciangin zui ding ka hih manin Rimmon biakinn sungah kei ka kunna thu-ah TOPA in a nasempa hong maisak hen,” a ci hi.

¹⁹Amah in ama kiangah, “Nuamtakin pai in,” a ci hi. Ahih hangin ama kiang panin Naaman tawmkhat a pai khit ciangin,

²⁰Pasian’ mipa Elisha’ nasem Gehazi in, “Ama hong puak nate sang loin ka topa in Syria mi hih Naaman ciahsak mawk hi. TOPA a nungta ahih mah bangin, amah nungdelhin ama tung panin na khat peuhpeuh ka ngah ding hi,” a ci hi.

²¹Tua ahih ciangin Gehazi in Naaman nungdelh hi. Tua ciangin ama nungah mi khat hong taina Naaman in a muh ciangin amah a dawn dingin a leeng panin kum a, “Thu a hoihkim hiam?” a ci hi.

²²Tua ciangin amah in, “A vekpi-in hoih hi. Ka topa in, ‘Kamsangte nih Efraim mualtung gam panin kei kiangah tu mahmahin hong tung hi. Kong thum hi, amaute tungah ngun talen khat le pawipuan nih pia in,’ a ci dingin hong sawl hi,” a ci hi.

²³Tua ciangin Naaman in, “Talen nih hong sang nuam hoh in,” a ci hi. Tua ciangin amah in a san ding kunh a, ngun talen nih ip nihin henin pawipuan nih tawh, a nasem nihte tungah a guan hi. Tua ciangin amaute in Gehazi’ mai-ah tuate pua uh hi.

²⁴Tua ciangin mualtungah amah a tun ciangin amah in amaute tung panin tuate la-in inn sungah koih hi. Tua ciangin a mite sawlkhia a, amaute kihem uh hi.

²⁵Amah sungtumin a topa’ mai-ah ding a, tua ciangin Elisha in ama kiangah, “Gehazi aw, koi-ah pai na hi hiam?” a ci hi. Amah in, “Na nasempa koimah pai lo hi,” a ci hi.

²⁶Ahih hangin Elisha in ama kiangah, “Nangmah a dawn dingin a leeng tung panin mipa a kihei laitakin nang tawh ka kha omkhawm hi lo ahi hiam? Sum le puante, oliv huante le leenggui lote, tuute le bawngtalte, nasem numeite le nasem pasalte san ding hun ahi hiam?

²⁷Tua ahih ciangin nangma tung le na suanlekhakte tungah Naaman’ phakna hong belh tawntung ta hen,” a ci hi. Tua ahih ciangin ama omna panin vuk bangin kangin a phakin a paikhia hi.