Read Tedim Chin 2 KUMPI NIHNATE 7 Bible Online

2 KUMPI NIHNATE 7 - Tedim Chin bible

2 KUMPI NIHNATE 7

¹Ahih hangin Elisha in, “TOPA’ thu za in. TOPA in hih bangin ci hi: Zing ciang tubang hunin Samaria kulhkongpi-ah annel lawh khat shekel khatin kizuak ding a, mangbuhham lawh nih shekel khatin kizuak ding hi, ci hi,” a ci hi.

²Tua ciangin a ban tungah kumpipa a kingapna galkap ukpa in Pasian’ mipa kiangah, “TOPA mahmah in vantung tawlette hong hong taleh zong, hih bang thu hi thei ding ahi hiam?” a ci hi. Ahih hangin amah in, “Nangma mit mahmah tawh hih thu na mu ding a, ahih hangin nang in na nekha kei ding hi,” a ci hi.

³Tua laitakin kulhkongpi lutna-ah a phak mi li om hi. Amaute khatlekhat in, “I sih dongin bang hangin hih lai-ah tu ding ihi hiam?

⁴Eite, ‘Khuapi sungah lut ni,’ ci lehang, khuapi sungah kialpi om a, tua lai-ah i si ding hi. Hih lai-ah tu lehang lah eite i si veve ding hi. Tua ahih ciangin tu-in hong pai un. Syria-te’ giahphual ah va pai ni. Amaute in eite hong hingkhawi leh eite i nungta ding a, ahih hangin amaute in eite hong that leh zong a si veve ding mah ihi lel hi,” kici uh hi.

⁵Tua ahih ciangin amaute Syria-te’ phualah a pai dingin phalvak tungin tho uh hi. Ahih hangin Syria-te’ phual a nawl a tun uh ciangin tua lai-ah kuamah na om nawn lo hi.

⁶Bang hang hiam cih leh TOPA in leengte, le galkap hon lianpite’ huging Syria galkapte zasak ahih ciangin amaute khatlekhat in, “En un, Israel kumpipa in eite a hong hih dingin Hit kumpite le Egypt kumpite cial hi,” kici uh hi.

⁷Tua ahih ciangin amaute phalvak tungin tai-in a puanbukte, a sakolte, le a late uh nusia uh a, a phual uh a tuaci bangmahin nusia-in a suahtak nadingun tai uh hi.

⁸Giahphual nawlah hih miphakte hong tun uh ciangin puanbuk khat sungah amaute lutin an ne-in tui dawn uh a, amaute in ngun le kham le puante puakhia-in tuate a seel uh hi. Tua ciangin amaute hong paikikin puanbuk dang khatah lut uh a, tua panin vante puakhia-in seel leuleu uh hi.

⁹Tua ciangin amaute khatlekhat in, “A manin i gamta kei hi. Tuni pen thuthak a hoih i theih ni ahi hi. Eite pau loin zingsang khuavak dong ngak lehang gimna i thuak ding hi. Tua ahih ciangin tu-in hong pai un. Eite pai-in kumpipa innkuante kiangah va gen ni,” kici uh hi.

¹⁰Tua ahih ciangin amaute hong pai-in kulhkongpi cingte samin amaute kiangah, “Syria-te’ phualah ka va tung uh a, tua lai-ah kuamah kimu lo, bangmah kiza lo, bangmah om lo; ahih hangin sakolte kikhihin, late kikhihin, puanbukte a om bangbangin om hi,” ci-in a gen uh hi.

¹¹Tua ciangin kulhkongpi cingte in thu zasak uh a, kumpipa innkuante kiangah hih thute kigen hi.

¹²Tua ciangin kumpipa zanin tho-in a nasemte kiangah, “Syria-te in eite’ langkhatah a vaihawmna kong gen ding hi. Eite i kialna amaute in hong thei uh hi. Tua ahih ciangin amaute gamlakah a bu dingin a phual panin paikhia uh a, ‘Khuapi sung panin amaute a paikhiat uh ciangin amaute a hingin manin khuapi sungah i lut ding hi,’ ci-in ngaihsun uh hi,” a ci hi.

¹³Tua ciangin a nasemte khat in, “Mi pawlkhat sakol a omlaite sung panin nga paipih sak ni. Hih lai-ah a om eite pen a sisa Israel mihon buppi tawh a kibang lel ihihna i thei hi. Amaute sawlin en dih ni,” a ci hi.

¹⁴Tua ahih ciangin amaute in sakol tung tuang mi nih sam a, kumpipa in Syria galkapte’ nungah amaute sawl a, “Pai-in va thei un,” a ci hi.

¹⁵Tua ahih ciangin amaute Jordan ciang dong va pai uh hi. Syria-te in nawhsa-in a paihkhiat uh puante le nate tawh lamdung khempeuh pak zeizai hi. Tua ciangin kamtaite hong kikin kumpipa kiangah a gen uh hi.

¹⁶Tua ciangin mite paikhia uh a, Syria-te’ phual luh uh hi. Tua ahih ciangin TOPA’ gensa bangin annel lawh khat shekel khatin kizuakin, mangbuhham lawh nih shekel khatin kizuak hi.

¹⁷A khut tungah a kingapna pa, a ukpa pen kulhkongpi a ukin kumpipa in seh hi. Mite in kulhkongpi-ah amah nawkpai-in a tung sikin pai uh a, ama kiangah kumpipa a paisuk laitakin Pasian’ mipa gensa bangin amah na si hi.

¹⁸Bang hang hiam cih leh Pasian’ mipa in kumpipa kiangah, “Zing ciang tubang hunin Samaria kulhkongpi-ah mangbuhham lawh nih ciangin shekel khatin kizuak ding a, annel lawh khat ciangin shekel khatin kizuak ding hi,” a cih ciangin

¹⁹galkap ukpa in Pasian’ mipa dawngin, “TOPA mahmah in vantung tawlette hong hong hitaleh zong, hih bang thu hi thei ding ahi hiam?” ci hi. Tua ciangin amah in, “Nangma mit mahmah tawh hih thu na mu ding a, ahih hangin nang in na nekha kei ding hi,” ci hi.

²⁰Mite in kulhkongpi-ah ama tung sikin pai uh hi. Amah si ahih manin ama tungtawnin tua bangin a kipai ahi hi.