Read Tedim Chin 1 KHANG TANGTHU MASATE 10 Bible Online

1 KHANG TANGTHU MASATE 10 - Tedim Chin bible

1 KHANG TANGTHU MASATE 10

¹Filistia mite in Israel mite sim uh hi. Filistia mite mai-ah Israel mite tai uh a, Gilboa Mual tungah tuk zeizai uh hi.

²Filistia mite in Saul le a tapate pha uh hi. Filistia mite in Saul’ tapate Jonathan le Abinadab le Malkhishua that uh hi.

³Gal kidona in Saul neh mahmah a, thal tawite in amah pha-in liamsak uh hi.

⁴Tua ciangin Saul in a galvan puapa kiangah, “Na namsau dok inla tua tawh kei hong sun let in. Tua hikeileh hih dawibia mite hong pai-in kei hong khelbawl kha ding hi,” a ci hi. Ahih hangin a galvan puapa in hih ngam lo hi; bang hang hiam cih leh amah lau mahmah hi. Tua ahih ciangin Saul in ama namsau la-in tua tungah puk hi.

⁵A galvan puapa in Saul a sihna a muh ciangin amah zong a namsau tungah kipuksuk sakin a si hi.

⁶Tua bangin Saul a si hi. Amah le a tapa thumte le a innkuan khempeuh a sikhawm uh hi.

⁷Kuam sungah a om Israel mite khempeuh in galkapte tai khinin, Saul le a tapate a sihna a theih uh ciangin amaute in a khuapite uh nusia-in a tai uh hi. Tua ciangin Filistia mite hong pai-in tua khuate sungah a teng uh hi.

⁸A zing ciang, a kithatte’ nate a hawkkhia dingin Filistia mite hong pai uh ciangin Saul le a tapate Gilboa Mual tungah a sihna mu uh hi.

⁹Tua ciangin amaute in ama nate hawkkhia-in a lutang le a galhiam la uh a, a milimte uh le mite kiangah hih thuthak a ko dingin Filistia gam sung khempeuhah kamtaite a sawl uh hi.

¹⁰Amaute in amau’ pasian’ biakinn sungah ama galhiam koihin Dagon biakinn sungah ama lutang a suang uh hi.

¹¹Ahih hangin Jabeshgilead mi khempeuh in Saul’ tungah Filistia mite’ hihsa thu khempeuh a zak uh ciangin

¹²a thahat mi khempeuh kithawi-in Saul le a tapate’ luanghawmte lakhia-in Jabesh-ah a paipih uh hi. Tua ciangin amaute in Jabesh-a tawsaw nuai-ah amaute’ guhte vui uh a, ni sagih sung an a tang uh hi.

¹³Tua ahih ciangin Saul a thuman lohna hangin a si hi. Amah in TOPA’ thupiakna a zuih lohna, le vankah khat thu dongin a lamlah ding a zonna,

¹⁴le TOPA’ tung panin lamlahna a zon lohna-ah TOPA’ tungah a thuman lo ahi hi. Tua ahih ciangin TOPA in amah that a, Jessi’ tapa David tungah kumpi gam a hei hi.