Read Tedim Chin 1 KHANG TANGTHU MASATE 14 Bible Online

1 KHANG TANGTHU MASATE 14 - Tedim Chin bible

1 KHANG TANGTHU MASATE 14

¹Tua ciangin Taia kumpipa Hiram in David kiangah kamtaite, taamtak singte, ama a dingin inn khat a lamsak dingin leilesuang innlam a siamte, le khutsiamte zong a puak hi.

²Tua ciangin David in Israel-te tungah kumpi-in TOPA in amah a kipsak khitna le ama mi Israel-te’ hangin ama kumpi gam nakpitakin a lianin a kibawlna a phawktel hi.

³David in Jerusalem-ah zi nei thuahin tapate le tanute a nei hi.

⁴Jerusalem-ah a neih a tate’ min: Shammua, Shobab, Nathan, Solomon,

⁵Ibhar, Elishua, Elpelet,

⁶Nogah, Nefeg, Jafia,

⁷Elishama, Beeliada, le Elifelet ahi uh hi.

⁸Israel mi khempeuh tungah kumpi-in David sathau a kinilhna thu Filistia mite in a zak uh ciangin David a zong dingin Filistia mi khempeuh kuanto uh hi. David in zong tua thu za ahih manin amaute a do dingin a kuankhia hi.

⁹Tu-in Filistia mite hong pai-in Refaim kuamsung a luh uh hi.

¹⁰Tua ciangin David in Pasian kiangah thu dong a, “Filistia mite a do dingin ka kuanto ding hiam? Keima khut sungah amaute nong pia ding hiam?” a ci hi. Tua ciangin TOPA in ama kiangah, “Kuanto in; nangma khut sungah amaute kong pia ding hi,” a ci hi.

¹¹Tua ciangin Baalperazim-ah David paito a, amah in tua lai-ah amaute a zo hi. Tua ciangin David in, “Tuikhang in a phulkhap bangin Pasian in keima khut tawh ka galte phukham hi,” a ci hi. Tua ahih ciangin tua mun a min Baalperazim kici hi.

¹²Filistia mite in tua lai-ah a pasian-te uh nusia uh a, David’ thupiakna tawh tuate kihal hi.

¹³Tua ciangin Filistia mite hong kuanin kuam sung hong luhkik lai uh hi.

¹⁴David in Pasian kiangah thu a dotkik ciangin Pasian in ama kiangah, “Amaute’ nungah na kuanto kei ding hi. Kual pai inla lungli kungte’ galkhat lam panin amaute hih in.

¹⁵Lungli kungte dawnah kalsuan huging na zak ciangin galsim dingin pai in; bang hang hiam cih leh Filistia galkapte a vat dingin nangma mai-ah Pasian kuan khin hi,” a ci hi.

¹⁶Pasian in amah a thupiak bangin David gamta a, amaute in Gibeon panin Gezer ciang dong Filistia galkapte vatgawp uh hi.

¹⁷Tua ciangin David’ minthanna in gam khempeuh zel a, TOPA in minam dang khempeuh tungah amah kihtakna a tungsak hi.