Read Tedim Chin 1 KHANG TANGTHU MASATE 17 Bible Online

1 KHANG TANGTHU MASATE 17 - Tedim Chin bible

1 KHANG TANGTHU MASATE 17

¹Tu-in David a inn-ah a ten ciangin amah in kamsang Nathan kiangah, “En in, taamtak inn hoih sungah kei ka teng a, ahih hangin puanbuk nuai-ah TOPA’ Thuciamna Singkuang om lai hi,” a ci hi.

²Tua ciangin Nathan in David kiangah, “Pasian in nang hong ompih ahih manin na lungsimah a om khempeuh hih in,” a ci hi.

³Ahih hangin tua zan mahin Nathan kiangah TOPA’ thu hong tung a,

⁴“Pai inla ka nasempa David kiangah hih bangin gen in. ‘TOPA in hih bangin ci hi: Nangmah in keima ten nadingin biakinn na lam kei ding hi.

⁵Bang hang hiam cih leh Israel-te ka paipihtoh a kipan tuni dongin biakinn sungah ka teng kei a, puanbuk khat pan puanbuk khat, omna khat pan omna khatah ka pai kawikawi hi.

⁶Israel mi khempeuh tawh ka painasa mun khempeuhah, keima mite tuu bangin a cing dingin ka sawl thukhente khat peuhpeuh tungah, “Bang hangin taamtak biakinn khat kei a dingin hong lamsak lo na hi hiam?” ci-in kam khat beek ka gen hiam?’ ci hi.

⁷Tua ahih ciangin tu-in ka nasempa David kiangah hih bangin na ci ding hi. ‘Vanglian TOPA in hih bangin ci hi: Ka mi Israel-te tungah ulian ahi dingin lonona, tuu na zuihna panin nang kong la hi.

⁸Na paina peuhpeuhah nang tawh kong omkhin a, na mai panin na galte khempeuh ka susia hi. Leitung miliante khat min bangin nang a dingin min khat kong bawlsak ding hi.

⁹Amau’ inn ciatah a ten theih nading le a kinawngkaisak nawn loh nadingin ka mi Israel-te a dingin mun khat sehin amaute ka phut ding hi. Ka mi Israel-te tungah thukhente ka seh a kipanin a nidanga bangin mi ngongtatte in amaute beisak nawn lo ding uh hi. Tua ciangin keimah in na galte khempeuh ka nuaisiah ding hi. Tua tham loin TOPA keimah in nang a lianin hong bawlin, suanlekhak na neihna ding thu nang tungah kong gen hi.

¹¹Na nuntakna bei-in na pate kiang na zuat ciangin nangma nungah na tapate khat ka khangsak ding a, ama kumpi gam ka kipsak ding hi.

¹²Amah in kei a dingin biakinn khat hong lamsak ding a, keimah in ama kumpi tokhom ka kipsak paisuak ding hi.

¹³Kei pen ama pa ka hi ding a, amah pen keima tapa hi ding hi. Nangma hun ma-a sem Saul’ tung panin ka lakkhiat bangin nangma tung panin ka itna kip ka lakhia kei ding a,

¹⁴ka mite le ka kumpi gam a kem dingin amah ka koih ding a, ama kumpi tokhom kip paisuak ding hi,’ ci hi,” a ci hi.

¹⁵Hih kammalte khempeuh tawh kizui le hih maangmuhna khempeuh tawh kizui-in Nathan in David kiangah a gen hi.

¹⁶Tua ciangin Kumpi David tumin TOPA’ mai-ah tu a, “TOPA Pasian aw, nangmah in hih ciang dong kei nong tunpihna kei kua hi a, ka innkuanpihte bang ahi hiam?

¹⁷Hih a beisa thu pen nangma mitah na neu khat ahi hi, Pasian aw. Nangmah in a hong tung ding hunpi khat sung tang ding na nasempa’ suanlekhak tawh kisai thu zong na gen khin a, mailam a khang dingte thu kei nong lak khin hi, TOPA Pasian!

¹⁸Na nasempa nong pahtawina-ah David in nang tungah bang gen ding nei nawn ahi hiam? Bang hang hiam cih leh nangmah in na nasempa na thei hi.

¹⁹TOPA aw, na nasempa’ hang, le nangma lungsim bangin hih na liante khempeuh na kitheihsakna-ah hih liatna khempeuh na hih hi.

²⁰Ka bilun ka zakna uh tawh kizui-in TOPA aw, nangmah tawh a kibang kuamah om lo a, nang simloh Pasian dang om lo hi.

²¹Egypt panin na hotkhiat na mite’ mai-ah minam dangte hawlkhiatna tawh nang a dingin a lian a lauhuai min khat na bawlna, Pasian pai-in ama mi dingin a hotkhiat Israel-te tawh a kibang mi leitungah minam dang kua om ahi hiam?

²²Na mi Israel-te a tawntungin nangma mi ahi dingin na bawl hi. Tua ciangin TOPA aw, nang pen amaute’ Pasian na suak hi.

²³“Tu-in TOPA aw, na nasempa le a suan a khakte tawh kisai-in na gensa thu a tawntungin kip hen la, na gensa bangin hong hih in.

²⁴Tua ciangin, ‘Israel Pasian, Vanglian TOPA pen Israel-te’ Pasian hi,’ ci-in nangma min a tawntungin kipin kiliansak ding a, na nasempa David’ ukna nangma mai-ah kip tawntung ding hi.

²⁵Bang hang hiam cih leh nang ka Pasian in keima suante kumpi-in nong bawlsakna ding na nasempa tungah nong lak khinzo hi. Tua ahih ciangin na nasempa in na mai-ah thu nget ding hanna lungsim hong nei hi.

²⁶Tu-in TOPA aw, nang, Pasian na hi a, na nasempa tungah hih na hoih na ciam khin hi.

²⁷Tua ahih ciangin tu-in nangma mai-ah a kizop tawntung theih nadingin na nasempa’ suanlekhakte thupha na piak ding nang hong lungkim ta in; bang hang hiam cih leh TOPA aw, nangmah in thupha na piaksate a tawntungin thupha ngah ahi hi,” a ci hi.