Read Tedim Chin 1 KHANG TANGTHU MASATE 20 Bible Online

1 KHANG TANGTHU MASATE 20 - Tedim Chin bible

1 KHANG TANGTHU MASATE 20

¹Khuakhal sungin galsimin kumpite kuankhia zel uh hi. Tua bang hunhoih khuakhal hong tun ciangin Joab in galkapte kuan khiatpihin Ammon mite’ gam sugawp a, hong pai-in Rabbah khua umcih hi. Ahih hangin Jerusalem-ah David om hi. Tua ciangin Joab in Rabbah khua vatin lumlet hi.

²Tua ciangin David in amau’ kumpipa’ kumpi lukhu ama tung panin lakkhiatsak hi. Tua lukhu kham talen khat gikin a sungah suangmanpha khat a omna amah in thei hi. Tua hi a, David in tua lukhu ama lu tungah khu hi. Tua ciangin amah in tua khuapi van kinusiate tampi tak khat paikhiatpih hi.

³Tua ciangin amah in tua sunga om mite paikhiatpihin singatnate le tuzumte le heite tawh na a sem dingin a koih hi. Tua bangin Ammon mite’ khuapite khempeuhah David in hih hi. Tua ciangin David le mi khempeuh Jerusalem-ah a ciah uh hi.

⁴Hih thute khit ciangin Gezer-ah Filistia mite tawh kidona hong om a, Hushah khuami Sibbekai in mithagolte’ suanlekhakte khat ahi Sippai a that hi. Tua bangin Filistia mite kinuaisiah hi.

⁵Tua ciangin Filistia mite tawh kidona omkik leuleu hi. Tua hi a, Jair’ tapa Elhanan in a teipi kung siamlawngpi cia a pha, Gath khuami Goliath’ sanggampa Lahmi a that hi.

⁶Tua ciangin a khut langtuakah khutme guk a nei, a khe langtuakah zong kheme guk mah a nei, a vekpi-in sawmnih le li a nei, mi thalian khat a omna Gath-ah gal omkik hi. Tua mipa zong mithagolte’ sung pana hong piang ahi hi.

⁷Amah in Israel a to ciangin David’ sanggampa Shimea’ tapa Jonathan in amah that hi.

⁸Hih mi thumte pen Gath-a mithagolte sung pana hong piang ahi uh hi. David le a nasemte’ khutin amaute puk uh hi.